ລັດຖະບານມາເລເຊຍ ຮ່ວມກັບຄະນະກຳມະການໂອແລມປິກແຫ່ງຊາດມາເລເຊຍ ໄດ້ຈັດພິທີມອບທຸງຊາດ ແລະ ຈັດງານລ້ຽງສົ່ງນັກກິລາ ທີ່ຈະເຂົ້າຮ່ວມການແຂ່ງຂັນ ກິລາ ຊີເກມ ຄັ້ງທີ 28 ທີ່ເມືອງປຸຕຣາຈາຢາ ມາເລເຊຍ ເມື່ອວັນທີ 24 ພຶດສະພາ ຜ່ານມາ ໂດຍການເປັນປະທານຮ່ວມຂອງທ່ານ ໄຄຫຼີ ຈາມາລຸດດິນ ລັດຖະມົນຕີວ່າການ ກະຊວງເຍົາວະຊົນ ແລະ ກິລາ ກັບ ທ່ານ ຕົນກູ ອິມຣານຕວນກູ ຈາຟາ ປະທານຄະນະກຳມະການໂອລິມປິກແຫ່ງຊາດມາເລເຊຍ ໂດຍມີ ຫຼີ ຊອງເວີຍ ນັກກິລາດອກປີກໄກ່ ເປັນຕົວແທນນັກກິລາຂຶ້ນຮັບທຸງຊາດຢ່າງເປັນທາງການ.
ໂອກາດດັ່ງກ່າວ ທ່ານ ໄຄຫຼີ ຈາມາລຸດດິນ ກ່າວວ່າ ກິລາຊີເກມ ຄັ້ງທີ 28 ທີ່ປະເທດສິງກາໂປເປັນເຈົ້າພາບ ລະຫວ່າງວັນທີ 5-6 ມິຖຸນາ 2015 ມາເລເຊຍ ສົ່ງຄະນະນຳ ແລະ ນັກກິລາ ເຂົ້າຮ່ວມການແຂ່ງຂັນຈຳນວນ 670 ຄົນ ໃນ 35 ປະເພດກິລາ ໂດຍນັກກິລາຂອງມາເລເຊຍ ຊຸດນີ້ ຫຼາຍກວ່າເຄິ່ງໜຶ່ງ ມີອາຍຸນ້ອຍກວ່າ 21 ປີ ເຊິ່ງເປັນທີມຊາດທີ່ມີອາຍຸສະເລ່ຍນ້ອຍທີ່ສຸດ ທີ່ຢູ່ໃນແຜນການກຽມທີມ ເພື່ອການແຂ່ງຂັນກິລາຊີເກມ ຄັ້ງທີ 29 ທີ່ມາເລເຊຍ ຈະເປັນເຈົ້າພາບໃນອີກ 2 ປີ ຕໍ່ໜ້າ ດັ່ງນັ້ນ ມາເລເຊຍ ຈຶ່ງບໍ່ໄດ້ຕັ້ງເປົ້າໝາຍຫຼຽນລາງວັນ ໂດຍສະເພາະຫຼຽນຄຳ ຄືຄັ້ງຜ່ານໆມາ ແຕ່ເປົ້າໝາຍຫຼັກໆແມ່ນ ນັກກິລາຕ້ອງມີຜົນງານ 56 ເປີເຊັນ ຂອງຈຳນວນຫຼຽນທີ່ເຂົ້າແຂ່ງຂັນ ເຊິ່ງລວມທັງຫຼຽນເງິນ ແລະ ຫຼຽນທອງ ແລະ ນັກກິລາທຸກຄົນ ທຸກລາຍການຕ້ອງມີຜົນງານດີຂຶ້ນກວ່າເກົ່າ. ທ່ານ ໄຄຫຼີ ກ່າວເນັ້ນວ່າ ສຳລັບກິລາບາງປະເພດ ເຊັ່ນ ໂດດນ້ຳ, ສະວອຊ, ດອກປີກໄກ່ ມີການຕັ້ງເປົ້າໝາຍຈຳນວນຫຼຽນຄຳຕາມເງື່ອນໄຂ ສ່ວນກິລາບາງປະເພດ ເຊັ່ນ ບານເຕະ, ແລ່ນ-ລານ, ລອຍນ້ຳ ແລະ ກະຕໍ້ ເຖິງແມ່ນວ່າບໍ່ມີເປົ້າໝາຍຫຼຽນທອງ ແຕ່ກໍ່ຕ້ອງມີຜົນງານດີກວ່າຄັ້ງຜ່ານມາຢ່າງເປັນຮູບປະທຳ.
“ສຳລັບ ຊີເກມ ຄັ້ງທີ 27 ທີ່ສະຫະພາບມຽມາ ມາເລເຊຍ ຕັ້ງເປົ້າໄວ້ 40 ຫຼຽນຄຳ ແຕ່ໄດ້ມາ 43 ຫຼຽນຄຳ ຖືວ່າລື່ນຄາດໝາຍ 3 ຫຼຽນຄຳ ແລະ ຊີເກມຄັ້ງນີ້ ເຮົາໝັ້ນໃຈວ່າ 50 ຫຼຽນຄຳ ມີຄວາມເປັນໄປໄດ້ສູງ ແລະ ໃກ້ຄຽງຄວາມເປັນຈິງທີ່ສຸດ” ທ່ານ ທ່ານ ຕົນກູ ກ່າວ
