ໃນວັນທີ 22 ພຶດສະພາ 2015ທີ່ຜ່ານມາ, ເວລາ 10:30 ນາທີ ເຈົ້າໜ້າທີ່ໄທໄດ້ຮັບຂ່າວຈາກສາຍວ່າຈະມີສາວລາວ ຂົນເງິນຈຳນວນ 400,000 ໂດລາສະຫະລັດ ຂ້າມມາຝາກທີ່ທະນາຄານໄທໂດຍຜ່ານ
ທີ່ດ່ານ ທ່າເຮືອບັກ, ບ້ານຫົວວຽງ ອຳເພີຊຽງຂອງ, ຈັງຫວັດຊຽງຣາຍ,ຈົນຮອດເວລາ ປະມານ 19:00 ໃນວັນດຽວກັນ, ໄດ້ພົບຍິງສາວລາວ ທີ່ຂ້າມມາແຕ່ຝັ່ງລາວ ແລ້ວມີພິລຸດ ຂ້າມດ່ານ ມາພ້ອມກັບກອງນ້ອຍ, ເຈົ້າໜ້າທີ່ຈິ່ງໄດ້ເຂົ້າກວດ ພົບເຫັນເງິນ ໂດຣາ ຈຳນວນ 400,000 ໂດລາສະຫະລັດ ທີ່ເປັນໃບ 100 ຈຳນວນ 4 ມັດ.
ຈາກການສືບສວນ ຍິງສາວດັ່ງກ່າວຊື່ ນາງໝອນ ອິນຕະພັນ ອາຍຸ 35 ປີ, ສັນຊາດລາວ. ໂດຍຜູ້ກ່ຽວບອກວ່າມີຜົວເປັນຄົນໄທໄດ້ເຮັດທຸລະກິດເປີດຮ້ານປ່ຽນເງິນຢູ່ລາວໃນເມືອງຫ້ວຍຊາຍ, ແຂວງບໍ່ແກ້ວ. ຈິ່ງໄດ້ນຳເອົາເງິນດັ່ງກ່າວຂ້າມມາ ເພື່ອຈະຝາກໄວ້ທະນາຄານ ກຸງໄທ ສາຂາ ໂລຕັດ ຊຽງຂອງ, ເຊິ່ງເອົາເງິນມາຄັ້ງນີ້ເປັນຄັ້ງທີສອງແລ້ວ.
ນາງໝອນຍັງກ່າວອີກວ່າ ຕົນເອງໄດ້ແຕ່ງງານກັບຄົນໄທ ແລະ ເຄີຍຢູ່ໄທ ໄດ້ ປີປາຍ, ນອກຈາກເປີດຮ້ານປ່ຽນເງິນ, ກໍ່ຍັງເຮັດທຸລະກິດຂາຍຕົງ, ໂດຍທີ່ ເງິນຈຳນວນ 400,000 ໂດລາສະຫະລັດ ນີ້ແມ່ນມີຄົນຈ້າງໃຫ້ເອົາມາຝາກທີ່ທະນາຄານຢູ່ໄທແຕ່ຖືກເຈົ້າໜ້າທີ່ຈັບຕົວໄດ້ກ່ອນ.
ໃນເບື້ອງຕົ້ນທາງເຈົ້າໜ້າທີ່ໄທໄດ້ຕັ້ງຂໍ້ຫານຳເງິນເຂົ້າ-ອອກ ປະເທດໂດຍບໍ່ປະຕິບັດຕາມເວລາ ແລະ ຈຸດເຂດຊາຍແດນ, ແລະ ນຳເງິນໂດລາສະຫະລັດເກີນກຳນົດເຂົ້າໄປປະເທດໄທ, ເພາະວ່າກົດໝາຍໄດ້ກຳນົດໄວ້ບໍ່ໃຫ້ກາຍ 20,000 ໂດລາສະຫະລັດ ຖ້າຈະເອົາເຂົ້າເກີນ ກໍ່ຕ້ອງມີການແຈ້ງກັບພາສີອາກອນທີ່ດ່ານກ່ອນ
ເຊີ່ງຕໍ່ມາເຈົ້າໜ້າທີ່ໄທໄດ້ຮັບການຕິດຕໍ່ຈາກເຈົ້າຂອງເງິນທີ່ຢູ່ລາວ ແລະ ຈະເຂົ້າໄປສູ້ຄະດີໃນຂັ້ນສານຕໍ່ໄປ.