ຊາວປະມົງທ້ອງຖິ່ນໃນອິນໂດເນເຊຍ ເຂົ້າຊ່ວຍເຫລືອຜູ້ອົບພະຍົບທາງທະເລ ຈຳນວນ 426 ຄົນ ທີ່ອອກມາຈາກປະເທດມຽນມາ ປັດຈຸບັນປອດໄພທຸກຄົນແລ້ວ.
ສຳນັກຂ່າວຕ່າງປະເທດ ລາຍງານໃນວັນທີ 20 ພຶດສະພານີ້ວ່າ ຊາວປະມົງອິນໂດເນເຊຍ ໄດ້ເຂົ້າຊ່ວຍເຫລືອຜູ້ອົບພະຍົບຫລາຍຮ້ອຍຄົນ ທີ່ເດີນທາງມາກັບເຮືອໄມ້ 2 ລຳ ຢູ່ນອກຊາຍຝັ່ງແຂວງອາເຈະ ທາງພາກຕາເວັນຕົກສຽງເໜືອຂອງອິນໂດເນເຊຍ ເຊິ່ງເຈົ້າໜ້າທີ່ໄດ້ລະບຸວ່າ ມີຜູ້ອົບພະຍົບຈຳນວນທັງໝົດ 426 ຄົນ ທີ່ເຊື່ອວ່າອອກມາຈາກປະເທດມຽນມາ ໄດ້ຮັບການຊ່ວຍເຫລືອຢ່າງປອດໄພແລ້ວ ໂດຍຜູ້ທັງໝົດແມ່ນຖືກພົບຫ່າງຈາກຊາຍຝັ່ງ 65 ກິໂລແມັດ.
ທັງນີ້ ການເຂົ້າຊ່ວຍເຫລືອຜູ້ອົບພະຍົບດັ່ງກ່າວ ແມ່ນມີຂຶ້ນຫລັງຈາກທີ່ມີຊາວໂຣຮິງຍາ ຫລາຍກ່ວາ 3,000 ຄົນ ໄດ້ຖືກຊ່ວຍເຫລືອຂຶ້ນຝັ່ງຢູ່ໃນປະເທດໄທ, ມາເລເຊຍ ແລະ ອິນໂດເນເຊຍ ໃນໄລຍະຜ່ານມາ ເຊິ່ງໂດຍສ່ວນໃຫຍ່ໄດ້ຕົກເປັນເຫຍື່ອຂອງການຄ້າມະນຸດ.