ຕາມການລາຍງານຂອງກະຊວງການຕ່າງປະເທດລາວ ໃຫ້ຮູ້ວ່າ: ໃນວັນທີ 12 ພຶດສະພາຜ່ານມານີ້, ທ່ານ ດຣ ແຣນໂຮນ ມິດເຕີສັກໂມເລີ ຊາວໂອຕຣິດ, ໄດ້ນຳເອົາພະພຸດທະຮູບສອງອົງມອບຄືນໃຫ້ລັດຖະບານລາວ, ໂດຍມອບຜ່ານ ທ່ານທູດລາວປະຈຳໂອຕຣິດ ພູເຂົາ ພົມມະວົງສາ ທີ່ນະຄອນຫລວງວຽນ ປະເທດໂອຕຣິດ ເຊິ່ງພະພຸດທະຮູບທັງສອງອົງແມ່ນຜູ້ກ່ຽວ ໄດ້ຊື້ມາແຕ່ ບາງກອກປະເທດໄທແຕ່ປີ 2007, ໂດຍເຊື່ອວ່າເປັນພະພຸດທະຮູບໃນ ຈຳນວນຫລາຍອົງທີ່ຖືກລັກອອກມາຈາກຖ້ຳຕິ່ງ ແຂວງຫລວງພະບາງ ຊຶ່ງກ່ອນໜ້າທ່ານ ແຣນ ໂຮນ ໄດ້ສອບຖາມຂໍ້ມູນ ຈາກນັກວິທະຍາບູຮານນະຄະດີຊາວອົດສະຕຣາລີ ທີ່ພວມເຮັດການຄົ້ນຄວ້າເພື່ອອະນຸລັກພະພຸດທະຮູບ ຢູ່ຖ້ຳຕິ່ງແຂວງ ຫລວງພະບາງ ແລະ ໄດ້ຮັບການສັນນິຖານວ່າພະພຸດທະຮູບສອງອົງນີ້ເຮັດດ້ວຍໄມ້ເນື້ອແຂງ, ສູງປະມານ 41,7 ຊັງຕີແມັດ, ເຖິງວ່າບໍ່ມີເລກໝາຍ ບໍ່ສາມາດຢືນຢັນໃຫ້ໄດ້ວ່າເຮັດຂຶ້ນປີໃດ, ແຕ່ເບິ່ງຈາກຮູບຊົງຂອງພະພຸດທະຮູບ ແລະ ປະຫວັດທາງ ສະຖາປັດຕິຍະກຳແລ້ວແມ່ນມີຖິ່ນກຳເນີດຈາກສີນລະປະກຳລ້ານຊ້າງ ແລະ ຄົງຈະຖືກລັກອອກມາຈາກຖ້ຳຕິ່ງແລ້ວ ນຳມາຂາຍຢູ່ປະເທດໄທ, ຈຶ່ງຍິນດີມອບຄືນໃຫ້ລັດຖະບານລາວ.
ໃນໂອກາດດັ່ງກ່າວ, ທ່ານທູດລາວປະຈຳໂອຕຣິດ ໄດ້ຕາງໜ້າລັດຖະບານ ແລະ ປະຊາຊົນລາວ ສະແດງຄວາມຍ້ອງ ຍໍຊົມເຊີຍຕໍ່ທ່ານ ແຣນໂຮນ ທີ່ໄດ້ສະແດງຄວາມຈິງໃຈ, ຄວາມປາດຖະໜາດີຕໍ່ລັດຖະບານ ແລະ ປະ ຊາຊົນລາວ, ທັງເປັນ ການປະກອບສ່ວນສຳຄັນເຂົ້າໃນການປົກປັກຮັກສາວັດຖຸບູຮານອັນເກົ່າແກ່ໄວ້, ເປັນການສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງລັດຖະບານ ແລະ ປະຊາຊົນສອງປະເທດລາວ ແລະ ໂອຕຣິດງອກງາມຂຶ້ນ ເລື້ອຍໆ.
ແຫລ່ງຂ່າວ: ລາວພັດທະນາ