ແຜ່ນ​ດິນ​ໄຫວ​ເນ​ປານ​ຮອບ 2 ພົບ​ຜູ້​ເສຍ​ຊີ​ວິດ​ລ່າ​ສຸດເກືອບ 80 ຄົນ​ ແລະ ບາດ​ເຈັບ​ກ່​ວາ 2,300 ຄົນ​ແລ້ວ ທາງ​ການ​ຄາດ​ວ່າ ຈຳ​ນວນ​ຜູ້​ເຄາະ​ຮ້າຍ​ອາດ​ມີ​ເພີ່ມ​ຂຶ້ນ​ອີກ ໂດຍ​ເຈົ້າ​ໜ້າ​ທີ່​ເລັ່ງ​ຄົ້ນ​ຫາ​ຕໍ່​ເນື່ອງ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ຄວາມ​ຄືບ​ໜ້າ ໃນ​ວັນ​ທີ 14 ພຶດ​ສະ​ພ​າ​ນີ້​ວ່າ ເຫດ​ແຜ່ນ​ດິນ​ໄຫວ​ຮອບ 2 ຢູ່​ປະ​ເທດ​ເນ​ປານ ເຊິ່ງ​ແຮງ​ສັ່ນ​ສະ​ເທືອນ 7.3 ແມັກ​ນິ​ຈູດ ໃນ​ມື້​ວັນ​ອັງ​ຄານ​ທີ່​ຜ່ານ​ມາ​ນີ້ ພົບ​ວ່າ​ມີ​ຜູ້​ເສຍ​ຊີ​ວິດ​ແລ້ວ 79 ຄົນ ໃນ​ຂະ​ນະ​ທີ່​ຈຳ​ນວນ​ຜູ້​ໄດ້​ຮັບ​ບາດ​ເຈັບ ສູງ​ກ່​ວາ 2,300 ຄົນ​ແລ້ວ ຕາມ​ທີ່​ທາງ​ການ​ລາຍ​ງານ.

ຢ່າງ​ໃດ​ກໍ​ຕາມ ຈຳ​ນວນ​ຜູ້​ເສຍ​ຊີ​ວິດ​ສ່ວນ​ໃຫຍ່ ແມ່ນ​ຢູ່​ໃນ​ພື້ນ​ທີ່​ພູ​ດອຍ​ເຂດດອນ​ກາ ທາງ​ຕອນ​ເໜືອ​ຂອງ​ນະ​ຄອນ​ຫລວງ​ກາດ​ມັນ​ດຸ ແລະ ຄາດ​ວ່າ​ຈະ​ມີ​ຈຳ​ນວນ​ເພີ່ມ​ຂຶ້ນ​ອີກ ເຊິ່ງ​ເຈົ້າ​ໜ້າ​ທີ່​ຍັງ​ຄົງ​ໃຊ້​ເຮືອ​ບິນ​ເຮ​ລິ​ຄ​ອັບ​ເຕີ້​ຈາກ​ທີມ​ກູ້​ໄພ​ຕ່າງ​ປະ​ເທດ ເຂົ້າ​ຄົ້ນ​ຫາ​ຢ່າງ​ຕໍ່​ເນື່ອງ.