ສຳນັກຂ່າວຕ່າງປະເທດ ລາຍງານໃນວັນທີ 14 ພຶດສະພານີ້ວ່າ ໃນມື້ວານນີ້ (13 ພຶດສະພາ) ໄດ້ເກີດເຫດໄຟໄໝ້ໂຮງງານຜະລິດເກີບອີ່ແຕະຂອງ ບໍລິສັດ ເຄນເທັກ ແມນູແຟັກເຕີຣິ່ງ ຄອັບ ຊານເມືອງຫລວງມະນິລາ ປະເທດຟິລິບປິນ ເປັນເຫດເຮັດໃຫ້ມີກຳມະກອນເສຍຊີວິດຢ່າງໜ້ອຍ 58 ຄົນ ແລະ ສູນຫາຍອີກ 13 ຄົນ ແລະ ຄາດວ່າອາດເສຍຊີວິດທັງໝົດ ໃນຂະນະທີ່ມີຜູ້ໄດ້ຮັບບາດເຈັບເລັກໜ້ອຍອີກ 30 ຄົນ.
ທ່ານ ເຣັກ ກັດຊາລຽນ ຫົວໜ້າເທດສະບານເມືອງວາເລນຊູລາ ເຊິ່ງຕັ້ງຢູ່ທາງພາກເໜືອຂອງນະຄອນຫລວງມະນິລາ ໄດ້ເປີດເຜີຍຕໍ່ແຫລ່ງຂ່າວວ່າ ເຈົ້າໜ້າທີ່ຕຳຫລວດໄດ້ລະງັບການຄົ້ນຫາຜູ້ສູນຫາຍໃນຕອນຄ່ຳຂອງມື້ວານນີ້ (13 ພຶດສະພາ) ຍ້ອນຢ້ານຄວາມຮ້ອນຈາກໄຟໄໝ້ ອາດເຮັດໃຫ້ໂຄງສ້າງຂອງໂຮງງານ ເຊິ່ງເປັນອາຄານ 2 ຊັ້ນພັງຖະຫລົ່ມລົງມາໄດ້ ເຊິ່ງອາດເປັນອັນຕະລາຍແກ່ເຈົ້າໜ້າທີ່, ແນວໃດກໍຕາມ ການຄົ້ນຫາຜູ້ສູນຫາຍໄດ້ເລີ່ມຂຶ້ນອີກເທື່ອໜຶ່ງ ໃນຕອນເຊົ້າຂອງມື້ນີ້.
ສຳລັບສາເຫດຂອງໄຟໄໝ້ຄັ້ງນີ້ ແມ່ນເກີດຂຶ້ນຈາກປະກາຍໄຟ ທີ່ເກີດຈາກກຳມະກອນເຮັດວຽກຢູ່ບໍລິເວນທາງເຂົ້າໂຮງງານ ແລ້ວເຮັດໃຫ້ສານເຄມີທີ່ໃຊ້ຜະລິດເກີບອີ່ແຕະລະເບີດຂຶ້ນ ແລ້ວມີແປວໄຟລຸກໄໝ້ຢ່າງຮຸນແຮງ ເປັນເຫດເຮັດໃຫ້ພະນັກງານທີ່ເຮັດວຽກຢູ່ຊັ້ນ 2 ຂອງອາຄານໂຮງງານ ບໍ່ສາມາດຫລົບໜີລົງມາໄດ້ ໂດຍເຈົ້າໜ້າທີ່ດັບເພີງໄດ້ກ່າວດ້ວຍຄວາມເສຍໃຈວ່າ ພວກເຂົາພົບກັບສົບຖືກໄຟໄໝ້ດຳທົ່ວຮ່າງກາຍ ຢູ່ເທິງຊັ້ນ 2 ເປັນຈຳນວນຫລວງຫລາຍ ແລະ ຮອດດຽວນີ້ ກໍຍັງບໍ່ທັນລະບຸຕົວເລກຜູ້ເສຍຊີວິດທີ່ແນ່ນອນໄດ້.
