ປາພະຍານາກ ຍາວ 4.1 ແມັດ ຖືກຄື່ນຊັດຂຶ້ນມາເກີຍຕື້ນໃນຊາຍຫາດ ທາງພາກກາງຂອງຫວຽດນາມ ຊາວບ້ານພົບເຫັນຈະຊ່ວຍປ່ອຍລົງທະເລ ໂຊກຮ້າຍເສຍຊີວິດຍ້ອນຢູ່ເທິງບົກເປັນເວລາດົນ.
ສຳນັກຂ່າວຕ່າງປະເທດ ລາຍງານໃນວັນທີ 13 ພຶດສະພາຜ່ານມານີ້ວ່າ ປະຊາຊົນກຸ່ມໜຶ່ງໃນເຂດເມືອງ ບໍ໋ຈັ໊ກ (Bo Trach) ແຂວງກວາງບິ່ງ (Quang Binh) ປະເທດຫວຽດນາມ ໄດ້ພົບກັບປາພະຍານາກຕົວດັ່ງກ່າວ ໃນຂະນະທີ່ຈະລົງຫລິ້ນນ້ຳ ຕອນທ່ຽງຂອງມື້ວັນທີ 12 ພຶດສະພາຜ່ານມາ ໂດຍປາພະຍານາກທີ່ພົບເຫັນນີ້ ໄດ້ຖືກຄື່ນນ້ຳທະເລຊັດຂຶ້ນມາເກີຍຕື້ນ ນອນຢູ່ເທິງຊາຍຫາດ ຄວາມຍາວປະມານ 4.1 ແມັດ ແລະ ມີນ້ຳໜັກປະມານ 40 ກິໂລ, ຕອນພົບເຫັນແມ່ນປາຍັງມີຊີວິດຢູ່ ແຕ່ຜູ້ທີ່ພົບເຫັນເຂົ້າໃຈວ່າປາອາດຈະບາດເຈັບ ຈິ່ງແຈ້ງໃຫ້ເຈົ້າໜ້າທີ່ທາງການໃນທ້ອງຖິ່ນຮັບຊາບ ເພື່ອໃຫ້ຄວາມຊ່ວຍເຫລືອ ແຕ່ພາຍຫລັງເຈົ້າໜ້າທີ່ມາເຖິງ ເພື່ອຫາທາງຊ່ວຍເຫລືອລົງທະເລນັ້ນ ກໍຊ້າເກີນໄປແລ້ວ ໂດຍປາໂຕດັ່ງກ່າວໄດ້ເສຍຊີວິດລົງໃນເວລາຕໍ່ມາ.
ທັງນີ້ ປາພະຍານາກ (Oarfish ຫລື Paddlefish) ແມ່ນເປັນປາທີ່ຫາເບິ່ງໄດ້ຍາກ ເພາະປາຊະນິດນີ້ຈະອາໄສຢູ່ໃນມະຫາສະໝຸດເລິກ ນັບຕັ້ງແຕ່ລະດັບ 1,000 ແມັດຂຶ້ນໄປ.
