ແຜ່ນດິນໄຫວເນປານຮອບ 2 ມື້ວານນີ້ ລ່າສຸດມີຜູ້ເສຍຊີວິດແລ້ວ 68 ຄົນ ບາດເຈັບ 1,261 ຄົນ ພ້ອມກັນນັ້ນ ຢູ່ປະເທດອິນເດຍ ຍັງມີຜູ້ເສຍຊີວິດອີກ 17 ຄົນ ໃນຂະນະທີ່ປະເທດຈີນ ແຮງສັ່ນສະເທືອນໄດ້ກໍ່ໃຫ້ເກີດດິນຖະຫລົ່ມ ທັບຖົມລົດຂອງປະຊາຊົນ ແລະ ຖະໜົນຫົນທາງຖືກຕັດຂາດ.
ສຳນັກຂ່າວຕ່າງປະເທດ ໄດ້ລາຍງານເຫດການລ່າສຸດໃນມື້ນີ້ (13 ພຶດສະພາ) ວ່າ ເຫດແຜ່ນດິນໄຫວຮອບ 2 ຢູ່ເນປານ ຂະໜາດ 7.3 ແມັກນິຈູດ ໃນມື້ວັນທີ 12 ພຶດສະພາຜ່ານມານີ້ ແມ່ນເຈົ້າໜ້າທີ່ໄດ້ຮັບລາຍງານຕົວເລກຜູ້ເສຍຊີວິດແລ້ວ ຮອດປັດຈຸບັນແມ່ນມີຈຳນວນ 68 ຄົນ ແລະ ບາດເຈັບອີກ 1,261 ຄົນ ເຊິ່ງໃນນັ້ນຢູ່ປະເທດອິນເດຍ ແຮງສັ່ນສະເທືອນໄດ້ກໍ່ໃຫ້ເກີດມີຜູ້ບາດເຈັບອີກຢ່າງໜ້ອຍ 17 ຄົນ.
ທັງນີ້ ແຮງສັ່ນສະເທືອນດັ່ງກ່າວ ຍັງສົ່ງຜົນກະທົບໄປເຖິງເຂດຊາຍແດນຈີນ ທີ່ຕິດກັບປະເທດເນປານ ເຮັດໃຫ້ມີດິນຖະຫລົ່ມລົງມາ ທັບຖົມລົດຂອງປະຊາຊົນ ໂດຍມີລາຍງານວ່າມີຜູ້ເສຍຊີວິດອີກ 1 ຄົນ ຖະໜົນຫົນທາງບາງສາຍໃນພື້ນທີ່ ກໍຖືກຕັດຂາດອີກດ້ວຍ.
