ພິທີເຊັນສັນຍາໂຄງການກໍ່ສ້າງຕາຂ່າຍໄຟຟ້າ 22 ກິໂລໂວນ, 0,4 ກິໂລໂວນ ແລະ ຕິດຕັ້ງຫມໍ້ແປງເຂົ້າ 32 ບ້ານທີ່ຂຶ້ນກັບເມືອງໄຊ ແລະ ເມືອງປາກແບງ ແຂວງອຸໄຊລະຫວ່າງພະແນກພະລັງງານ ແລະ ບໍ່ແຮ່ ກັບບໍລິສັດໂຊກໄຊກໍ່ສ້າງຄົບວົງຈອນ ຈຳກັດຜູ້ດຽວ ໄດ້ຈັດຂຶ້ນ ເມື່ອທ້າຍອາທິດຜ່ານມາທີ່ພະແນກແຜນການ ແລະ ການລົງທຶນແຂວງ.
ໂຄງການກໍ່ສ້າງຕາຂ່າຍແຮງດັນກາງ 22 ກິໂລໂວນ, ແຮງຕ່ຳ 0,4 ກິໂລໂວນ ແລະ ຕິດຕັ້ງຫມໍ້ແປງເຂົ້າ 32 ບ້ານ ໃນນີ້ ຢູ່ເມືອງໄຊ ມີ 14 ບ້ານ ແລະ ເມືອງປາກແບງຈຳນວນ 18 ບ້ານ, ປະກອບດ້ວຍບັນດາຫນ້າວຽກຕ່າງໆທີ່ຜູ້ຮັບເຫມົາຈະຕ້ອງໄດ້ຈັດຕັ້ງປະຕິບັດຕາມສັນຍາ ແລະ ປະຕິບັດຕາມແບບການກໍ່ສ້າງທີ່ໄດ້ຮັບຮອງ ເຊິ່ງປະກອບມີກໍ່ສ້າງ ແລະ ຕິດຕັ້ງຕາຂ່າຍໄຟຟ້າແຮງດັນ 22 ກິໂລໂວນ ລວມທັງຫມົດ 205 ກິໂລແມັດກວ່າ, ກໍ່ສ້າງ ແລະ ຕິດຕັ້ງຕາຂ່າຍໄຟຟ້າແຮງດັນຕ່ຳ 0,4 ກິໂລໂວນ, ຍາວ 46,3 ກິໂລແມັດ, ຕິດຕັ້ງຫມໍ້ແປງໄຟຟ້າ 32 ຊຸດ ຕິດຕັ້ງຫມໍ້ແປງຂະຫນາດ 50 KVA ຈຳນວນ 27 ຊຸດ, ຫມໍ້ແປງຂະຫນາດ 30 KVA 5 ຊຸດ, ລວມມູນຄ່າການກໍ່ສ້າງທັງຫມົດ 81,93 ຕື້ກວ່າກີບ, ໂດຍແມ່ນບໍລິສັດເປັນຜູ້ລົງທຶນກ່ອນໃນກຳນົດ 2 ປີ ໃຫ້ສຳເລັດນັບແຕ່ມື້ລົງນາມເຊັນສັນຍາເປັນຕົ້ນໄປ ພ້ອມນີ້ ຜູ້ຮັບເຫມົາກໍ່ສ້າງຈະຕ້ອງຮັບປະກັນທາງດ້ານຄຸນນະພາບ, ເຕັກນິກໃຫ້ແກ່ເຈົ້າຂອງໂຄງການຫລັງຈາກການກວດກາ ແລະ ມອບຮັບໂຄງການພາຍໃນກຳນົດ.
ຮ່ວມລົງນາມເຊັນສັນຍາຕາງຫນ້າເຈົ້າຂອງໂຄງການ ໂດຍແມ່ນທ່ານ ຫຸມແພງ ມິງບຸບຜາ ຫົວຫນ້າພະແນກພະລັງງານ ແລະ ບໍ່ແຮ່ແຂວງອຸດົມໄຊຝ່າຍ ບໍລິສັດໂດຍແມ່ນ ທ່ານ ໂສດາໄຊ ດວງມະນີ ອຳນວຍການບໍລິສັດ ໂຊກໄຊກໍ່ສ້າງຄົບວົງຈອນ ຈຳກັດຜູ້ດຽວ ໂດຍມີການນຳຂັ້ນແຂວງ, ເມືອງ, ຫົວຫນ້າ, ຮອງຫົວຫນ້າພະແນກການ, ຫ້ອງການ, ທີ່ກ່ຽວຂ້ອງພ້ອມດ້ວຍພະນັກງານ-ວິຊາການເຂົ້າຮ່ວມ.
ທີ່ມາhttp://www.ecom.org.la