ຄວາມຈິງແລ້ວມີຄົນໄທຈຳນວນຫຼາຍ ທີ່ທະຍອຍເອົາເງິນມາຝາກຢູ່ທະນາຄານ ຂອງປະເທດລາວ ແຕ່ທີ່ຜ່ານມາແມ່ນເຮັດແບບງຽບໆ ສ່ວນຫຼາຍຈະເປັນຜູ້ທີ່ທຽວມາຄ້າຂາຍ ຫຼືເຮັດທຸລະກິດ. ແຕ່ພາຍຫຼັງທີ່ມີຜູ້ຝາກເງິນທ່ານໜຶ່ງ ທີ່ເປັນຄົນໄທໄດ້ໂພສເລື່ອງລາວ ລາຍໄດ້ຈາກການຝາກເງິນຢູ່ທະນາຄານແຫ່ງໜຶ່ງຂອງລາວ ລົງໄປໃນສື່ສັງຄົມອອນລາຍ ເຮັດໃຫ້ກາຍເປັນກະແສຢ່າງໃຫຍ່ ມີຫຼາຍສຳນັກຂ່າວເອົາໄປເຜີຍແຜ່ຕໍ່ ຈົນເຮັດໃຫ້ຄົນໄທອີກຈຳນວນຫຼວງຫຼາຍ ກຽມຫຼັ່ງໄຫຼເຂົ້າມາຝາກເງິນໃນ ທະນາຄານຂອງລາວຫຼາຍຂຶ້ນ.
ນັກທຸລະກິດຄົນໄທທ່ານໜຶ່ງ ທີ່ບໍ່ປະສົງອອກນາມ ໄດ້ເປີດເຜີຍຕໍ່ສຳນັກຂ່າວ ລາວໂພສພວກເຮົາວ່າ ທີ່ຄົນໄທເອົາເງິນມາຝາກຢູ່ທະນາຄານຂອງລາວມີຫຼາຍເຫດຜົນ ເຊັ່ນ:
1. ປະເທດລາວມີຄວາມສະຫງົບ ການເມືອງມີສະຖຽນລະພາບ
2. ປະເທດລາວກຳລັງເປັນທຳເລທອງ ຂອງການລົງທຶນ ດັ່ງນັ້ນ ນັກລົງທຶນທີ່ເຂົ້າມາລົງທຶນໃນລາວ ກໍຕ້ອງຝາກເງິນໃນທະນາຄານລາວຢູ່ແລ້ວ.
3. ດອກເບ້ຍເງິນຝາກຢູ່ລາວໄດ້ຫຼາຍ ສູງສຸດ 5 ປີໄດ້ເຖິງ 13% ຕໍ່ປີ (ບາງທະນາຄານ) ແລະທະນາຄານລາວກໍບໍ່ໄດ້ຫັກເກັບພາສີ ຈາກດອກເບ້ຍເງິນຝາກ.
4. ຢູ່ໄທເງິນຝືດ ດອກເບ້ຍເງິນຝາກຕ່ຳກວ່າຢູ່ລາວຫຼາຍ ແລະຍັງມີການຫັກພາສີດອກເບ້ຍທີ່ແສນໜ້ອຍນັ້ນດ້ວຍ.
ລູກຄ້າທະນາຄານການຄ້າ ຕ່າງປະເທດລາວທ່ານໜຶ່ງ ທີ່ເປັນຄົນໄທ ໄດ້ເຜີຍແຜ່ລາຍໄດ້ຂອງຕົນ ອອກສູ່ສັງຄົມອອນລາຍ ໂດຍອ້າງວ່າ ຝາກເງິນພຽງ 6 ເດືອນ ແຕ່ໄດ້ດອກເບ້ຍເຖິງ 8% ດັ່ງຂໍ້ຄວາມສະແດງລຸ່ມນີ້:
ລູກຄ້າທະນາຄານລາວທີ່ເປັນຄົນໄທທ່ານໜຶ່ງກ່າວວ່າ ຖ້າຫາກມີທະນາຄານລາວແຫ່ງໃດແຫ່ງໜຶ່ງ ຈັດທຳໃບປິວ ຫຼືແຜ່ນພັບແນະນຳ ຜະລິດຕະພັນຂອງທະນາຄານຂອງຕົນ ເປັນພາສາໄທ ແລ້ວວາງໄວ້ຕາມດ່ານສາກົນຕ່າງໆ ເຊື່ອແນ່ວ່າຄົນໄທຈະຫຼັ່ງໄຫຼເຂົ້າມາເປັນລູກຄ້າຢ່າງແນ່ນອນ.
ແນວໃດກໍຕາມ ການຝາກເງິນຢູ່ລາວ (ສຳລັບຄົນໄທ) ຂໍແນະນຳໃຫ້ມີເອກະສານປະກອບຄື ໜັງສືເດິນທາງ (Passport) ແລະ ໃບຢັ້ງຢືນການເຮັດວຽກຢູ່ລາວ (Work Permit) ເຊິ່ງທ່ານສາມາດໃຫ້ຍາດພີ່ນ້ອງ ຫຼືຄົນຮັກແພງອອກເອກະສານດັ່ງກ່າວໃຫ້. ໃນຂະນະທີ່ບາງທະນາຄານ ໃຊ້ພຽງໜັງສືເດິນທາງກໍໄດ້ແລ້ວ.