ລັດຖະມົນຕີຊ່ວຍວ່າການກະຊວງແຮງງານ ແລະ ສະຫວັດດີການສັງຄົມ ໃຫ້ ຮູ້ໃນງານຖະແຫລງຂ່າວທີ່ໄດ້ຈັດຂຶ້ນໃນວັນທີ 6 ພຶດສະພານີ້ວ່າ: ງານມະຫະ ກຳຕະຫຼາດ ແຮງງານລາວຄັ້ງທີ 4 ປະຈຳປີ 2015 ,ຈະໄດ້ຈັດຂຶ້ນ ໃນວັນທີ 5- ມີຖຸນາທີ່ຈະມາເຖິງນີ້, ຢູ່ຫໍປະຊຸມແຫ່ງຊາດ,ໂດຍກະຊວງແຮງງານ ແລະ ສະຫວັດດີການສັງຄົມ, ຮ່ວມກັບບໍລິສັດ ຈັດຫາງານໄອຈ໋ອບ, ພາຍໃຕ້ໂຄງ ການສ້າງຄວາມເຂັ້ມແຂງວຽກງານບໍລິການຈັດຫາງານ ແລະ ຂໍ້ມູນຂ່າວ ສານຕະຫຼາດແຮງງານ, ໂດຍການສະໜັບສະໜູນຈາກລັດຖະບານ ຈີນ, ຜ່ານອົງການແຮງງານສາກົນ, ເພື່ອສ້າງໂອກາດ, ໃຫ້ຜູ້ໃຊ້ແຮງງານ ແລະ ຜູ້ອອກແຮງງານ, ກໍຄືຊາວໜຸ່ມຜູ້ທີ່ກຳລັງສຶກສາຮ່ຳຮຽນຢູ່ໃນລະບົບອາຊີວະສຶກສາ ແລະ ມະຫາວິທະຍາໄລແຫ່ງຊາດໄດ້ມີໂອກາດພົບປະແລກປ່ຽນຂໍ້ ມູນຂ່າວສານທາງດ້ານຕະຫຼາດແຮງງານ, ທັງເປັນການສ້າງເງື່ອນໃຫ້ ແກ່ຜູ້ດຳເນີນ ການຝຶກ ອົບຮົມວິຊາຊີບດ້ານສີມືແຮງງານໄດ້ມີຂໍ້ມູນດ້ານຄວາມຕ້ອງການຂອງຕະຫຼາດ, ຊຶ່ງເຫັນໄດ້ ຄວາມຕ້ອງການ ຂອງຕະຫຼາດແຮງງານ, ກໍຄືຜູ້ອອກແຮງງານທີ່ຕ້ອງການວຽກເຮັດງານທຳ ແລະ ຄວາມຕ້ອງການຂອງຜູ້ໃຊ້ແຮງງານ ເຂົ້າໃນການຜະລິດທຸລະກິດຂອງເຂົາເຈົ້າ, ໂດຍສະເພາະແມ່ນພາກສ່ວນເສດຖະກິດພິເສດ-ສະເພາະ ແລະ ໂຄງການລົງທຶນ ທັງພາຍໃນ ແລະ ຕ່າງປະເທດຈຳນວນໜຶ່ງ, ຊຶ່ງຕາມການສັງລວມເບື່ອງຕົ້ນຄວາມຕ້ອງການ ແຮງງານຂອງລາວໃນສົກປີ
2014-2015 ແມ່ນຫຼາຍກວ່າ 37 ພັນຄົນ, ດັ່ງນັ້ນ ຈຶ່ງມີຄວາມ ຈຳເປັນທີ່ຈະຕ້ອງສ້າງໂອກາດໃຫ້ຜູ້ໃຊ້ແຮງງານ ແລະ ໜ່ວຍງານຕ່າງໆໄດ້ມີໂອກາດ ເປີດຮັບສະໝັກ ແລະ ຄາດວ່າໃນງານຄັ້ງນີ້ຈະມີບັນດາຫົວໜ່ວຍແຮງງານ, ຜູ້ປະກອບການ ແລະ ອົງການລົງທຶນຕ່າງໆເຂົ້າຮ່ວມປະມານ 150 ກວ່າບຸດ, ທີ່ຈະມາຮັບສະໝັກພະນັກງານ ແລະ ໃຫ້ຂໍ້ແນະນຳຕ່າງໆກ່ຽວ ກັບວຽກງານແຮງງານ, ພ້ອມນັ້ນກໍຍັງຈະມີກິດຈະກຳອື່ນໆ ອີກຫຼາກຫຼາຍເຊັ່ນ: ການວາງສະແດງ ແລະ ຂາຍສິນຄ້າສີມືແຮງ ງານ ແລະ ການສະແດງ ດ້ານສີມືແຮງງານຫຼາຍໆຢ່າງ ແລະ ເຊື່ອວ່າໃນງານດັ່ງກ່າວຈະມີຕຳແໜ່ງງານຫວ່າງ ລໍ້ຖ້າຜູ້ມາສະ ໝັກປະມານ 2.000 ຕຳແໜ່ງງານ,ດັ່ງນັ້ນຈຶ່ງຮຽກຮ້ອງມາຍັງອົງການລົງ ທືນທັງພາຍໃນ ແລະ ຕ່າງປະເທດ, ບັນດາຫົວ ໜ່ວຍແຮງງານ, ຜູ້ໃຊ້ແຮງງານ, ກໍຄືຜູ້ອອກແຮງງານທັງໝົດຈົ່ງເຂົ້າມາຮ່ວມງານມະຫະກຳຕະຫຼາດແຮງງານຄັ້ງນີ້ດ້ວຍ.
ແຫລ່ງຂ່າວ: ລາວພັດທະນາ