ການພົບປະສ້າງສັນຊຸມແຊວເປັນສິ່ງທີ່ດີຖ້າດື່ມພໍປະມານກໍ່ພາໃຫ້ມ່ວນຊື່ນແລະເກີດມິດຕະພາບແຕ່ການດື່ມສິ່ງມຶນເມົາເກີນຂອບເຂດ ກໍ່ຈະເຮັດໃຫ້ຄົນເຮົາຂາດສະຕິ ເຊິ່ງບັນຫາແບບນີ້ປາກົດມີໃຫ້ເຫັນຢູ່ໃນສັງຄົມເປັນປະຈຳ, ດັ່ງກໍລະນີທ້າວ ປອນ ອາຍຸ 42 ປີ, ກຳມະກອນ ບ້ານຫນອງແຕ່ງເມືອງສີໂຄດຕະບອງນະຄອນຫລວງວຽງຈັນເມົາແລ້ວຂາດ ສະຕິທຳຮ້າຍຮ່າງກາຍຜູ້ອື່ນຈົນເສຍຊີວິດ, ເຫດການນີ້ເກີດຂຶ້ນໃນມື້ສົ່ງທ້າຍປີເກົ່າຕ້ອນຮັບປີໃຫມ່ 2013, ທີ່ບ້ານໂນນບໍ່ແກ້ວ ເມືອງໄຊທານີ ນະຄອນຫລວງວຽງຈັນ.
ເຈົ້າຫນ້າທີ່ ປສກ ເມືອງໄຊທານີໃຫ້ຮູ້ວ່າ: ຜູ້ເຄາະຮ້າຍລາຍນີ້ ຊື່ທ້າວ ຈັນ ອາຍຸ 38 ປີ, ມາພັກເຊົ່າຢູ່ບ້ານໂນນບໍ່ແກ້ວ ເມືອງໄຊທານີ ນະຄອນຫລວງວຽງຈັນ, ໃນມື້ເກີດເຫດຜູ້ຖືກຫາກັບ ທ້າວ ຈັນ ໄດ້ພາກັນຊຸມແຊວຢູ່ເຮືອນຂອງ ທ້າວ ໄຊໂຍ ອາຍຸ 56 ປີ, ໂດຍພາກັນນັ່ງດື່ມເຫລົ້າແຕ່ 7:00 ໂມງເຊົ້າຈົນຮອດ 10:00 ໂມງ. ຈາກນັ້ນ, ຫມູ່ຂອງ ທ້າວ ໄຊໂຍ ຢູ່ບ້ານດຽວກັນກໍ່ໄດ້ມາດື່ມນຳ, ພໍດີເຫລົ້າຫມົດຜູ້ຖືກຫາກໍ່ເອົາເງິນ ຈຳນວນ 20.000 ກີບໃຫ້ຫມູ່ ທ້າວ ໄຊໂຍ ໄປຊື້ເຫລົ້າຂາວ ແລະ ຂອງແກ້ມມາຕື່ມອີກ, ຈາກນັ້ນ, ພວກກ່ຽວກໍ່ໄດ້ລົມກັນສ່ວນທ້າວ ຈັນ ຮູ້ສຶກເມົາແຮງກໍ່ເຂົ້າໄປນອນແຕ່ນອນບໍ່ຫລັບ, ໃນຂະນະນັ້ນ, ທ້າວ ປອນ ກໍ່ເວົ້າໄປຮອດຜູ້ສາວຂອງທ້າວ ຈັນ ຈິ່ງເຮັດໃຫ້ຜູ້ກ່ຽວບໍ່ພໍໃຈ ແລະ ຈັບໄມ້ຄ້ອນມາຟາດຫົວ ທ້າວ ປອນ ຈົນນອນຫມົດສະຕິພໍຕື່ນຂຶ້ນມາໄດ້ແນມເຫັນ ທ້າວ ຈັນ ກຳລັງຈະຕີ ທ້າວ ໄຊໂຍ ຈິ່ງລຸກຂຶ້ນເອົາກຳປັ້ນຕີຫນ້າຂອງ ທ້າວ ຈັນ ລົ້ມລົງພື້ນເຮືອນແລ້ວເຕະຫນຶ່ງບາດ ແລະ ຕີນຢັນອີກ 2 ບາດ ເຮັດໃຫ້ຕົກເຮືອນແລ້ວນຳລົງມາເຕະ ທ້າວ ຈັນ ຕື່ມອີກ 2 ບາດ ຈົນຜູ້ກ່ຽວຫມົດສະຕິ. ຈາກນັ້ນ, ການຈັດຕັ້ງບ້ານກໍ່ໄດ້ນຳຕົວ ທ້າວ ຈັນ ສົ່ງໂຮງຫມໍ ທ່າງ່ອນ ແຕ່ຜູ້ກ່ຽວໄດ້ເສຍຊີວິດໃນເວລາຕໍ່ມາ ແລະ ສົ່ງໂຕ ທ້າວ ປອນ ໃຫ້ເຈົ້າຫນ້າທີ່ ປກສ ເມືອງໄຊທານີດຳເນີນຄະດີໃນຂໍ້ຫາທຳຮ້າຍຮ່າງກາຍຜູ້ອື່ນຈົນ ເສຍຊີວິດ.
ຄະດີນີ້, ກໍ່ເປັນສິ່ງເຕືອນໃຈປະຊາຊົນທຸກໆຄົນຕ້ອງມີສະຕິ ແລະ ກໍ່ຕ້ອງຄິດງຳກ່ອນຈະເວົ້າສິ່ງໃດສິ່ງຫນຶ່ງອອກມາ ເພື່ອຈະບໍ່ກະທົບຕໍ່ຈິດໃຈຂອງຄົນອື່ນ. ແຕ່ສິ່ງສຳຄັນບໍ່ຄວນໃຊ້ກຳລັງໃນການຕັດສິນບັນຫາເພາະການໃຊ້ກຳລັງໄປໃນທາງທີ່ຜິດກໍ່ເປັນການສ້າງຄວາມບໍ່ສະຫງົບໃຫ້ສັງຄົມ, ການກະທຳດັ່ງກ່າວເຖິງຈະເປັນການເຈຕະນາ ຫລື ບໍ່ ເຈຕະນາກໍ່ຖືວ່າເປັນການກະທຳທີ່ຜິດຕໍ່ກົດຫມາຍ. ປະຈຸບັນ ກອງບັນຊາການ ປກສ ເມືອງໄຊທານີພວມສະຫລຸບສຳນວນຄະດີສົ່ງໃຫ້ໄອຍະການສັ່ງຟ້ອງສານຕັດສິນຕາມກົດຫມາຍ.
ທີ່ມາhttp://www.ecom.org.la