ປະ​ທາ​ນາ​ທິ​ບໍ​ດີ ສິ ຈິ້ນ​ຜິງ ແຫ່ງ​ ສ.ປ ຈີນ ຈະ​ເດີນ​ທາງ​ໄປ​ຮ່ວມ​ພິ​ທິ​ສະ​ຫລອງ ວັນ​ໄຊ​ຊະ​ນະ​ເໜືອ​ຟາ​ຊິດ ຄົບ​ຮອບ 70 ປີ ທີ່​ມົດ​ສະ​ກູ ປະ​ເທດ​ຣັດ​ເຊຍ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 4 ພຶດ​ສະ​ພາ​ຜ່ານ​ມາ​ນີ້ ໂດຍ​ອ້າງ​ຖະ​ແຫລງ​ການ​ຂອງ ກະ​ຊວງ​ການ​ຕ່າງ​ປະ​ເທດ​ຈີນວ່າ ພະ​ນະ​ທ່ານ ສີ ຈິ້ນ​ຜິງ ເລ​ຂາ​ທິ​ການ​ໃຫຍ່​ພັກ​ກອມ​ມູ​ນິດ​ຈີນ ປະ​ທາ​ນາ​ທິ​ບໍ​ດີ​ແຫ່ງ ສ​.ປ ຈີນ ຈະ​ເດີນ​ທາງ​ຢ້ຽມ​ຢາມ​ຣັດ​ເຊຍ ຕາມ​ຄຳ​ເຊີນ​ຂອງ ພ​ະ​ນະ​ທ່ານ ວະ​ລາ​ດິ​ເມຍ ປູ​ຕິນ ປະ​ທາ​ນາ​ທິ​ບໍ​ດີ​ແຫ່ງຣັດ​ເຊຍ ໃນ​ລະ​ຫວ່າງວັນ​​ທີ 8 – 10 ພຶດ​ສະ​ພາ​ນີ້ ເພື່ອ​ເຂົ້າ​ຮ່ວມ​ພິ​ທີ​ສະ​ຫລອງ​ຄົບ​ຮອບ 70 ປີ ວັນ​ໄຊ​ຊະ​ນະ​ເໜືອ​ຟາ​ຊິດ ເຊິ່ງ​ຈະ​ຈັດ​ຂຶ້ນ​ຢ່າງ​ຍິ່ງ​ໃຫຍ່ ທີ່​ສະ​ໜາມ​ແດງ ນະ​ຄອນ​ຫລວງ​ມົດ​ສະ​ກູ ໃນ​ມື້​ວັນ​ທີ 9 ພຶດ​ສະ​ພາ​ທີ່​ຈະ​ມາ​ເຖິງ​ນີ້.

ທັງ​ນີ້ ການ​ເດີນ​ທາງ​ເຂົ້າ​ຮ່ວມ​ໃນ​ພິ​ທີ​ດັ່ງ​ກ່າວຂອງ​ ປະ​ທາ​ນາ​ທິ​ບໍ​ດີ ສີ​ ຈິ້ນ​ຜິງ ໄດ້​ສະ​ແດງ​ໃຫ້​ເຫັນ​ເຖິງ ການ​ພັດ​ທະ​ນາ​ຄວາມ​ສຳ​ພັນ​ຮອບ​ດ້ານຢ່າງ​ແໜ້ນ​ແຟ້ນ ຂອງ​ສອງ​ມະ​ຫາ​ອຳ​ນາດ​ໃນ​ໄລ​ຍະໃໝ່​ຂອງ​ປະ​ຫວັດ​ສາດຈີນ ແລະ ຣັດ​ເຊຍ.