ສຳນັກຂ່າວຕ່າງປະເທດ ລາຍງານໃນວັນທີ 30 ເມສານີ້ວ່າ ເຈົ້າໜ້າທີ່ກູ້ໄພ ສາມາດຊ່ວຍຊີວິດເດັກນ້ອຍຊາຍ ອາຍຸ 4 ເດືອນ ອອກມາຈາກຊາກຕຶກ ແລະ ອາຄານທີ່ພັງຖະຫລົ່ມ ຈາກເຫດແຜ່ນດິນໄຫວຢູ່ເນປານ ໂດຍນັບຕັ້ງແຕ່ເກີດເຫດແຜ່ນດິນໄຫວ ໃນມື້ວັນເສົາທີ 25 ເມສາຜ່ານມາ ພໍ່ຂອງເດັກນ້ອຍຄົນດັ່ງກ່າວ ໄດ້ຮ້ອງຂໍໃຫ້ເຈົ້າໜ້າທີ່ທະຫານ ຊ່ວຍກັນຄົ້ນຫາສົບຂອງລູກຊາຍຕົນເອງ ຢູ່ຕາມຊາກຫັກພັງຂອງເຮືອນທີ່ຖະຫລົ່ມລົງມາ ແຕ່ພາຍຫລັງການຄົ້ນຫາຈົນຮອດເວລາກາງເດິກ ທີມຄົ້ນຫາກໍບໍ່ພົບສົບຂອງເດັກນ້ອຍຄົນດັ່ງກ່າວ ຈິ່ງໄດ້ຢຸດຕິການຄົ້ນຫາໄປ ຈົນມາເຖິງຕອນເຊົ້າຂອງມື້ຕໍ່ມາ ພໍ່ຂອງເດັກນ້ອຍຄົນດັ່ງກ່າວ ໄດ້ຍິນສຽງຮ້ອງໄຫ້ຂອງລູກຕົນເອງ ຈິ່ງໄດ້ຟ້າວໄປຮ້ອງຂໍເຈົ້າໜ້າທີ່ເຂົ້າໄປຄົ້ນຫາອີກເທື່ອໜຶ່ງ ພາຍຫລັງການຄົ້ນຫາເທື່ອທີສອງນີ້ ເຈົ້າໜ້າທີ່ກໍຕ້ອງຕົກຕະລຶງ ເມື່ອເດັກນ້ອຍຄົນດັ່ງກ່າວຍັງມີຊີວິດຢູ່ ເຖິງແມ່ນຈະຕິດຢູ່ກ້ອງຊາກເຮືອນດັ່ງກ່າວມາແລ້ວເຖິງ 5 ມື້.
ພາຍຫລັງຊ່ວຍເອົາເດັກນ້ອຍຄົນດັ່ງກ່າວອອກມາແລ້ວ ເຈົ້າໜ້າທີ່ກໍຟ້າວນຳສົ່ງໂຮງໝໍ ເພື່ອກວດຫາອາການບາດເຈັບ ໂດຍເປັນເລື່ອງປາຕິຫານຢ່າງແທ້ຈິງ ທີ່ເດັກນ້ອຍຄົນດັ່ງກ່າວນີ້ ບໍ່ໄດ້ມີບາດແຜເທິງຮ່າງກາຍແຕ່ຢ່າງໃດເລີຍ.