ບັນຫາການຖິ້ມຂີ້ເຫຍື້ອໃສ່ແຄມທາງ ເປັນບັນຫາຊ້ຳເຮື້ອມາໄດ້ຫຼາຍປີແລ້ວ ບໍ່ວ່າຈະເປັນຖະໜົນ 13 ໃຕ້ 13 ເໜືອ 450 ປີ ແລະລວມທັງຖະຖົນເສັ້ນນີ້ ທີ່ຕັດແຕ່ບ້ານໜອງບົວທອງ ໄປຫາບ້ານໜອງບຶກ ເມືອງສີໂຄດຕະບອງ ນະຄອນຫຼວງວຽງຈັນ. ບັນຫານີ້ຖືກສື່ມວນຊົນຫຼາຍສຳນັກ ເຄີຍໄດ້ອອກຂ່າວມາແລ້ວຫຼາຍຄັ້ງ ແຕ່ພຶດຕິກຳຂອງຜູ້ຖິ້ມຂີ້ເຫຍື້ອໃສ່ແຄມທາງ ຍັງບໍ່ມີການປ່ຽນແປງ ອາດຈະເປັນຍ້ອນພວກກ່ຽວບໍ່ແມ່ນກຸ່ມຄົນ ທີ່ຈະເສບສື່ຄືໄທເຮົາເຈົ້າຂ້ອຍ ຫຼືອຳນາດການປົກຄອງທ້ອງຖິ່ນທີ່ກ່ຽວຂ້ອງ ອ່ອນແອ ບໍ່ສາມາດແກ້ໄຂບັນຫາຂີ້ເຫຍື້ອໄດ້ ຫຼືເພາະເຫດໃດກໍບໍ່ຮູ້.
ດັ່ງນັ້ນ, ມື້ນີ້ ມີສື່ມວນຊົນຜູ້ໜຶ່ງໄດ້ໄປຖ່າຍຄລິບ ກ່າວຮຽກຮ້ອງເຖິງພາກສ່ວນທີ່ກ່ຽວຂ້ອງ ເຊັ່ນ ອພບ ອຳນາດການປົກຄອງ ຫຼືໃຜໆ ກໍໄດ້ ທີ່ເວົ້າແລ້ວມີຄົນຈັດຕັ້ງປະຕິບັດ ຈົ່ງໄດ້ເອົາໃຈໃສ່ແກ້ໄຂບັນຫານີ້ດ້ວຍ. ແລະລວມທັງກະໂຕຜູ້ທີ່ເອົາຂີ້ເຫຍື້ອໄປຖິ້ມ ໃສ່ບໍລິເວນດັ່ງກ່າວນັ້ນກໍຂໍໃຫ້ປັບປ່ຽນ ພຶດຕິກຳດັ່ງກ່າວ ເພາະເຮົາເປັນຄົນນະຄອນຫຼວງ ເປັນຄົນເມືອງສີວິໄລ ດ້ານຈິດໃຈຂອງເຮົາກໍຄວນຈະໄດ້ສີວິໄລໄປນຳ. ບໍ່ດັ່ງນັ້ນ, ຄຳຂວັນ ສ.ສະອາດ ນະຄອນຫຼວງຈະບໍ່ສົມບູນໄດ້ຢ່າງແນ່ນອນ.