ເພື່ອເປັນການສ້າງຄວາມເຂັ້ມແຂງທາງດ້ານເສດຖະກິດຢ່າງຕໍ່ເນື່ອງ ທະນາຄານໂລກ ສະຖາບັນການເງິນ ແລະ ທະນາຄານທຸລະກິດ ໄດ້ວາງງົບປະມານ 96 ຕື້ກີບ ກຽມສະໜອງສິນເຊື່ອ ໃຫ້ແກ່ວິສາຫະກິດຂະໜາດນ້ອຍ ແລະ ກາງ (SME) ໃນສົກປີ 2014-2015 ຈຳນວນເມັດເງິນດັ່ງກ່າວ ຈະຊ່ວຍເຮັດໃຫ້ສະພາບການຄ້າ ການລົງທຶນ ຂອງນັກທຸລະກິດລາວ ໃຫ້ມີສະພາບຄ່ອງຕົວສ້າງຄວາມເຂັ້ມໃຫ້ກັບຕົນເອງຮອງຮັບ AEC ທ້າຍປີ 2015.
ກອງປະຊຸມເຜີຍແຜ່ກ່ຽວກັບ “ການເຂົ້າຫາແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ ສຳລັບໂຄງການສະໜອງສິນເຊື່ອ ໂດຍຜ່ານທະນາຄານທຸລະກິດ” ໄດ້ຈັດຂຶ້ນວັນທີ 24 ເມສາ 2015 ທີ່ໂຮງແຮມລາວພລາຊາ ເປັນປະທານຂອງທ່ານ ສົມດີ ອິນມີໄຊ ຫົວໜ້າກົມສົ່ງເສີມນັກທຸລະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ມີຜູ້ຕາງໜ້າຈາກທະນາຄານໂລກ ທະນາຄານແຫ່ງ ສປປ ລາວ ທະນາຄານທຸລະກິດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສົມດີ ອິນມີໄຊ ໄດ້ກ່າວວ່າ: ພາຍຫຼັງທີ່ໄດ້ບັນລຸສັນຍາກູ້ຢືມເງິນຈາກທະນາຄານໂລກ ຈຳນວນ 96 ຕື້ກີບ ໃນມໍ່ໆນີ້ ທາງກົມສົ່ງເສີມ SME ກຽມຈະປ່ອຍເງິນຈຳນວນດັ່ງກ່າວ ໃຫ້ກັບບັນດານັກທຸລະກິດ ເພື່ອນຳໄປລົງທຶນເຂົ້າໃນກິດຈະກຳຕ່າງໆ ໃຫ້ເກີດປະໂຫຍດທີ່ຈະເປັນການສ້າງຄວາມເຂັ້ມແຂງ ທາງດ້ານເສດຖະກິດຂອງປະເທດ ໃຫ້ມີຄວາມເຕີບໂຕ ສິນເຊື່ອຈຳນວນດັ່ງກ່າວ ເປັນສິນເຊື່ອໄລຍະຍາວ ທີ່ມີອັດຕາດອກເບ້ຍທີ່ເໝາະສົມ ແຕ່ຍັງບໍ່ມີລາຍລະອຽດຊັດເຈນເຖິງອັດຕາດອກເບ້ຍ.
ປັດຈຸບັນ ການເຂົ້າຫາແຫຼ່ງທຶນຍັງເປັນໜຶ່ງ ອຸປະສັກຕົ້ນຕໍຂອງການເລີ່ມຕົ້ນ ແລະ ຂະຫຍາຍຕົວຂອງວິສາຫະກິດຂະໜາດນ້ອຍ ແລະ ກາງ ຕາມການສຳຫຼວດຂອງທະນາຄານໂລກ ໃນປີ 2012 ເຫັນໄດ້ວ່າ ມີພຽງ 24,7% ຂອງວິສາຫະກິດ ທີ່ໄດ້ຈົດທະບຽນໄດ້ຮັບເງິນກູ້ຈາກທະນາຄານ ແລະ ວິສາຫະກິດຂະໜາດກາງ ມີພຽງແຕ່ 46,7% ເນື່ອງຈາກເງື່ອນໄຂ ໃນການປ່ອຍກູ້ເງິນແມ່ນຕ້ອງການຫຼັກຊັບຄ້ຳປະກັນ ແລະ ຫຼັກຊັບຄ້ຳປະກັນຕ້ອງມີມູນຄ່າ 3 ເທົ່າຂອງວົງເງິນທີ່ຈະກູ້ສິນເຊື່ອ ທີ່ທະນາຄານປ່ອຍກູ້ໃຫ້ SME ສ່ວນຫຼາຍແມ່ນເປັນໄລຍະສັ້ນ ເນື່ອງຈາກແຫຼ່ງທຶນຂອງທະນາຄານ ແມ່ນໄດ້ມາຈາກການລະດົມເງິນຝາກໄລຍະສັ້ນ ທີ່ມີໄລຍະເວລາພຽງແຕ່ 1-3 ປີ.
ໂຄງການສະໜອງສິນເຊື່ອ ໂດຍຜ່ານທະນາຄານທຸລະກິດຄັ້ງນີ້ປະກອບມີ: ການສະໜອງສິນເຊື່ອ ຜ່ານລະບົບທະນາຄານທຸລະກິດ ເຊິ່ງມີເປົ້າໝາຍໃນການຊ່ວຍໃຫ້ SME ເຂົ້າເຖິງແຫຼ່ງທຶນໄດ້ຫຼາຍຂຶ້ນ ໂດຍສະເພາະແມ່ນ ປະເພດທຶນໄລຍະຍາວ ການຄ້ຳປະກັນສິນເຊື່ອ ແມ່ນວຽກງານທີ່ມີເປົ້າໝາຍໃນການຊ່ວຍຫຼຸດຜ່ອນຄວາມສ່ຽງ ແລະ ຄວາມເສຍຫາຍ (ໜີ້ເສຍ) ທີ່ອາດເກີດຂຶ້ນ ໃນການປ່ອຍກູ້ໃຫ້ແກ່ SME ຂອງທະນາຄານທີ່ເຂົ້າຮ່ວມໂຄງການ ຄຽງຄູ່ກັນນັ້ນ ກໍ່ເປັນການສ້າງເງື່ອນໄຂໃຫ້ບັນດາຫົວໜ່ວຍທຸລະກິດ ທີ່ບໍ່ມີຫຼັກຊັບຄ້ຳປະກັນທີ່ພຽງພໍສາມາດເຂົ້າເຖິງແຫຼ່ງທຶນໄດ້ ໂດຍຜ່ານກົນໄກດັ່ງກ່າວ ແລະ ໜ້າວຽກສຸດທ້າຍເປັນການສ້າງຄວາມເຂັ້ມແຂງດ້ານວິຊາການ ໃຫ້ແກ່ໜ່ວຍງານຂອງກົມສົ່ງເສີມວິສາຫະກິດຂະໜາດນ້ອຍ ແລະ ກາງ ທະນາຄານທຸລະກິດ ແລະ SME ເອງ.
ໄລຍະຜ່ານມາກົມສົ່ງເສີມວິສາຫະກິດຂະໜາດນ້ອຍ ແລະ ກາງ ໄດ້ສະໜອງສິນເຊື່ອໃຫ້ SME ໂດຍຜ່ານທະນາຄານພັດທະນາລາວແລ້ວ ຈຳນວນ 14 ຕື້ກີບ ແຕ່ກໍ່ຍັງບໍ່ພຽງພໍກັບຄວາມຕ້ອງການ ໃນການຂະຫຍາຍທຸລະກິດຂອງ SME ຄາດວ່າສິນເຊື່ອໄດ້ມາໃໝ່ ທີ່ກຽມຈະປ່ອຍນີ້ ຈະເຮັດໃຫ້ບັນດາຜູ້ປະກອບການ ນຳໄປໃຊ້ເຂົ້າໃນການລົງທຶນທີ່ຈະເປັນການສ້າງຄວາມເຂັ້ມແຂງ ຮອງຮັບ AEC ທັງເປັນການສ້າງວຽກເຮັດງານທຳໃຫ້ກັບປະຊາຊົນ ຢູ່ບໍລິເວນທີ່ມີການລົງທຶນນຳດ້ວຍ.
ແຫລ່ງຂ່າວ: ວຽງຈັນໃໝ່