ສະ­ຖານ­ທີ່​ແຄມ​ງື່ມ​ບ້ານ​ເກິນເມືອງ​ທຸ­ລະ­ຄົມແຂວງ​ວຽງ​ຈັນ ເຊິ່ງສະ­ພາບ​ເດີມ​ເຄີຍ​ນຳ​ໃຊ້​ໃຫ້​ເປັນ​ສະຖານ​ທີ່​ຈັດ​ງານ​ບຸນ­ຊ່ວງ­ເຮືອ​ປະ­ຈຳ​ປີທີ່​ຜູ້​ຄົນ­ຮູ້​ຈັກ­ດີ​ດ້ານ​ກີ­ລາ​ຊ່ວງ​ເຮືອ​ນັ້ນ, ພວມ​ຖືກ​ເນ­ລະ­ມິດ​ໃຫ້​ກາຍ­ເປັນແຫລ່ງ​ທ່ອງ​ທ່ຽວ​ຫາດ​ຊາດ​ຂາວບ້ານ​ເກິນ ເຊິ່ງ​ຈະ​ສ້າງ​ເປັນ​ແຫລ່ງ​ທ່ອງທ່ຽວ ເພື່ອ​ຜັກ​ຜ່ອນ​ຢ່ອນ​ອາ­ລົມ​ຂອງນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ​ປະເທດ​ທີ່​ຈະ​ມີ​ສິ່ງ​ອຳ­ນວຍ​ຄວາມ​ສະດວກທັນ​ສະ­ໄຫມ, ເຊັ່ນ: ກິດ­ຈະ­ກຳກີ­ລາ​ທາງ­ນ້ຳ, ໂຮງ­ແຮມ,ເຮືອນ​ພັກ, ຮ້ານ​ອາຫານ, ສິ່ງ​ບັນ­ເທີງ ແລະ ອື່ນໆ, ໂດຍ​ກຸ່ມ​ບໍລິ​ສັດ​ມາ­ລີ​ນີ​ຈະ​ລົງ­ທຶນເຖິງ 4,8  ລ້ານ​ໂດ​ລາ​ສະຫະ​ລັດ ເພື່ອ​ສ້າງ​ລຽບ​ຍາວ​ຕາມ​ແຄມ​ນ້ຳ​ດັ່ງກ່າວ 1 ກິ­ໂລ­ແມັດ ປະ­ຈຸບັນ​ສຳ­ເລັດ 30%.

ທ່ານ ພຸດ​ສະ​ດຸ ອິນທະ​ວົງ ປະ­ທານກຸ່ມ​ບໍ​ລິສັດ​ມາ­ລີ​ນີ​ ກ່າວ​ວ່າ: ກຸ່ມບໍ­ລິ­ສັດ​ຂອງ​ຕົນ​ໄດ້​ຮັບອະ­ນຸ­ຍາດ​ຈາກ​ພາກ​ລັດໃຫ້​ສຳ​ປະ­ທານ​ເນື້ອ­ທີ່ດິນ​ແຄມ​ຝັ່ງ​ນ້ຳ​ງື່ມ​ທີ່​ບ້ານ​ເກິນຄວາມ​ຍາວ 1 ກິ­ໂລ­ແມັດ ລຽບ​ຕາມ​ລຳສາຍ​ນ້ຳ ເພື່ອ​ພັດ­ທະ­ນາ​ສະ­ຖານທີ່​ແຫ່ງ​ນີ້ ໃຫ້​ກາຍ­ເປັນ​ແຫລ່ງ​ທ່ອງທ່ຽວ​ທີ່​ທັນ​ສະ­ໄຫມ​ໂດຍ​ມີ​ຊື່­ວ່າ: ໂຄງການ​ພັດ­ທະ­ນາ​ແຫລ່ງ​ທ່ອງ​ທ່ຽວ​ຫາດ ຊາຍ​ຂາວ​ບ້ານ​ເກິນ, ສະ­ຖານ­ທີ່​ແຫ່ງນີ້ ສະ­ພາບ​ເດີມ​ເປັນ​ພຽງ​ແຄມ​ຝັ່ງ​ນ້ຳທຳ​ມະ​ດາ​ບໍ່​ມີ​ສິ່ງ​ປຸກ​ສ້າງ ແລະ ຫາດຊາຍ​ແຕ່​ຢ່າງ­ໃດ ແຕ່​ລະ​ປີ​ປະ­ຊາ­ຊົນເມືອງ​ທຸ­ລະ­ຄົມ​ຈະ​ນຳ​ໃຊ້​ສະ­ຖານ­ທີ່​ແຫ່ງນີ້​ເປັນ​ບ່ອນ​ປະ​ລອງ​ແຂ່ງ­ຂັນ​ຄວາມເກ່ງ​ດ້ານ​ສີ­ພາຍ (ບຸນ­ຊ່ວງ­ເຮືອ), ແຕ່ຫລັງ​ຈາກ​ໄດ້​ຮັບ​ອະ­ນຸ­ຍາດ​ໃຫ້​ສຳ​ປະທານ​ກຸ່ມ​ບໍ­ລິ­ສັດ​ຂອງ​ຕົນ​ຈະ​ສ້າງສະ­ຖານ­ທີ່​ນີ້​ໃຫ້​ມີ​ສິ່ງ​ອຳ­ນວຍ​ຄວາມສະ­ດວກ​ຕ່າງໆ​ເຊັ່ນ:  ໂຮງ­ແຮມ​ຂະຫນາດ​ນ້ອຍ, ເຮືອນ​ພັກ​ປະ­ມານ 30-40 ຫລັງເຊິ່ງ​ອອກ​ແບບ​ໃຫ້​ທັນ​ສະ­ໄຫມປະ­ສົມ​ຊົງ​ລາວ​ຂ້າງ​ໃນ​ມີ​ສິ່ງ​ອຳນວຍ​ຄວາມ​ສະ­ດວກ​ທີ່​ທັນ​ສະໄຫມ, ມີ​ສະ­ໂມ­ສອນ​ທີ່​ຮອງ​ຮັບໄດ້ 300 ກວ່າ​ຄົນ, ມີ​ສິ່ງ​ອຳນວຍ​ຄວາມ​ສະ­ດວກ​ດ້ານ​ຄວາມມ່ວນ­ຊື່ນ, ມີ​ເຮືອ​ເຈັດ​ສະ​ກີ​ໄວ້​ບໍລິ​ການ 10 ກວ່າ​ລຳ, ສ້າງ​ຫາດຊາຍ​ຂາວ (ຫາດ​ທຽມ) ລຽບຕາມ​ແຄມ​ນ້ຳ​ດັ່ງ­ກ່າວ​ຂຶ້ນ​ມາ ເພື່ອ​ເປັນ​ສະ­ຖານ­ທີ່​ສຳ­ລັບ​ຫລິ້ນ ແລະ ຜັກ​ຜ່ອນ​ຂອງ​ນັກ​ທ່ອງທ່ຽວ.

ທ່ານ​ປະ­ທານ​ກ່າວ​ອີ​ກວ່າ ຜ່ານ​ການ­ຈັດ­ຕັ້ງ​ປະ­ຕິ­ບັດ​ໂຄງການ​ນີ້ ເປັນ​ເວ­ລາ 3 ເດືອນ​ກວ່າ ຮອດ​ປະ­ຈຸ​ບັນ ຫນ້າ​ວຽກ​ທັງຫມົດ​ໄດ້​ຄືບ​ຫນ້າ​ປະ­ມານ 30%, ໃນ​ນີ້ ໄດ້​ມີ​ການ​ຖົມ​ດິນຍົກ​ລະ­ດັບ, ສ້າງ​ກັນ​ເຈື່ອນ; ສ່ວນ​ວຽກ​ທີ່​ຍັງ​ຄ້າງ​ກໍ່​ຈະ​ສືບ­ຕໍ່ກໍ່­ສ້າງ​ພື້ນ­ຖານ​ໂຄງ​ລ່າງ ແລະ ຄາດ​ວ່າ​ຈະ​ໄດ້​ເລີ່ມ​ເປີດ​ບໍ­ລິ­ການບາງ​ກິດ­ຈະ­ກຳ​ໃນ​ທ້າຍ​ເດືອນ​ມີນາ​ນີ້ ແລະ ເປີດ​ບໍ­ລິ­ການ​ແກ່​ນັກທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ໃນ​ເດືອນ​ທັນ­ວາ 2013 ຄຽງ​ຄູ່​ກັນ​ກັບ​ການ​ເປີດນຳ​ໃຊ້​ຂົວ​ຂ້າມ​ນ້ຳ​ງື່ມ​ທີ່​ບ້ານເມືອງ­ເກົ່າ​ປາກ​ກະ​ຍຸງ,ທ່ານ​ກ່າວ​ຕໍ່​ວ່າ: ຕົນ​ຈະ​ມີລາຍ​ໄດ້​ຈາກ​ໂຄງ­ການ​ນີ້ ໃນ 3 ກິດ­ຈະ­ກຳ​ຄື: ເກັບ​ຄ່າ​ບໍ­ລິ­ການຜູ້​ຄົນ​ທີ່​ເຂົ້າ​ພັກ​ໃນ​ໂຮງ­ແຮມ, ເຮືອນ​ພັກ, ສະ­ຖານ­ທີ່​ມ່ວນ­ຊື່ນ, ສະ­ໂມ­ສອນ; ເກັບ​ຄ່າ​ບໍ­ລິ­ການ​ກີລາ​ທາງ­ນ້ຳ; ຈັດ­ການ​ແຂ່ງ­ຂັນກີ­ລາ​ທາງ­ນ້ຳ​ປະ­ຈຳ​ເດືອນ, ປີຕາມ​ຄວາມ​ເຫມາະ​ສົມ​ຈົນ​ຄົບອາ­ຍຸ​ການ​ສຳ​ປະ­ທານ 38 ປີ​ແລ້ວມອບ​ໃຫ້​ລັດ.

ທີ່ມາhttp://www.ecom.org.la/