ປະທານາທິບໍດີສະຫະລັດ ສະແດງຄວາມຮັບຜິດຊອບວ່າ ການໂຈມຕີກຸ່ມກໍ່ການຮ້າຍເມື່ອເດືອນມັງກອນຜ່ານມາ ໄດ້ຂ້າຊີວິດຂອງຕົວປະກັນ 2 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 24 ເມສານີ້ວ່າ ປະທານາທິບໍດີ ບາຣັກ ໂອບາມາ ແຫ່ງສະຫະລັດອາເມຣິກາ ໄດ້ເປີດເຜີຍວ່າ ປະຕິບັດການຕໍ່ຕ້ານການກໍ່ການຮ້າຍຂອງສະຫະລັດອາເມຣິກາ ໃນແຖວຊາຍແດນອັບການິສະຖານ – ປາກີສະຖານ ເມື່ອເດືອນມັງກອນທີ່ຜ່ານມາ ໄດ້ຂ້າຊີວິດຕົວປະກັນຊາວອາເມຣິກັນ 1 ຄົນ ແລະ ຊາວອີຕາລີ 1 ຄົນ ໂດຍເຂົາຄືຜູ້ທີ່ຕ້ອງຮັບຜິດຊອບກັບການສູນເສຍໃນຄັ້ງນີ້.
ທັງນີ້ ທ່ານ ບາຣັກ ໂອບາມາ ໄດ້ສະແດງຄວາມເສຍໃຈຢ່າງສຸດຊຶ້ງ ຕໍ່ກັບຄອບຄົວຂອງຕົວປະກັນທັງສອງຄົນ ໄດ້ແກ່ ທ້າວ ວໍເຣນ ເວນສະຕາຍ ແລະ ທ້າວ ຈິໂອວານນີ່ ໂລ ປໍໂຕ້ ແລະ ນອກຈາກນີ້ ຍັງມີ ທ້າວ ອາເໝັດ ຟາຣັກ ຊາວອາເມຣິກັນທີ່ເປັນສະມາຊິກຄົນສຳຄັນຂອງກຸ່ມອັນກໍອິດະ ແລະ ທ້າວ ດຳ ກາດານ ໂຄສົກຂອງກຸ່ມອັນກໍອິດະ ກໍໄດ້ຖືກສັງຫານພ້ອມໃນໃນປະຕິບັດການດັ່ງກ່າວ.
ທ່ານ ບາຣັກ ໂອບາມາ ໄດ້ກ່າວວ່າ ” ໃນຖານະຂອງປະທານາທິບໍດີສະຫະລັດອາເມຣິກາ ແລະ ຜູ້ບັນຊາການ ຂ້າພະເຈົ້າເອງ ຂໍສະແດງຄວາມຮັບຜິດຊອບ ຕໍ່ປະຕິບັດການຕໍ່ຕ້ານການກໍ່ການຮ້າຍທັງໝົດ ລວມເຖິງປະຕິບັດການທີ່ຂ້າຊີວິດຂອງຜູ້ບໍລິສຸດທັງ 2 ຄົນ ຂ້າພະເຈົ້າເອງ ມີຄວາມເສຍໃຈຕໍ່ສິ່ງທີເກີດຂຶ້ນ ໃນຖານະຕົວແທນຂອງລັດຖະບານອາເມຣິກັນ ຂ້າພະເຈົ້າຂໍສະແດງຄວາມເສຍໃຈຢ່າງສຸດຊຶ້ງ ຕໍ່ຄອບຄົວຂອງຜູ້ເສຍຊີວິດ “