​​ໃນ​ວັນ​ທີ 21 ​ເມສາ​ນີ້, ນັກ​ຂ່າວ​ຂອງ​ພວກ​ເຮົາ​ໄດ້​ລົງ​ສຳພາດ​ຊາວ​ຄ້າຂາຍ ​ແລະ ຜູ້​ບໍລິ​ໂພ​ກ, ຢູ່​ຕາມ​ທ້ອງ​ຕະຫລາດ​ບາງ​ແຫ່ງ​ໃນ​ນະຄອນຫລວງ​ວຽງ​ຈັນຄື: ທົ່ງ​ຂັນ​ຄຳ, ຂົວ​ດິນ ​ແລະ ​ໂພນ​ສະຫວ່າງ ​ຮູ້​ວ່າ: ສິນຄ້າ​ບາງ​ປະ​ເພດ​​ແມ່ນ​ໄດ້ຂຶ້ນລາຄາ​ເລັກ​ໜ້ອຍ, ​ໃນ​ໄລຍະ​ບຸນປີ​ໃໝ່​ທີ່​ຜ່ານ​ມາ, ​ແຕ່​ມາ​ຮອດ​ປັດຈຸບັນ​ແມ່ນ​ກັບ​ມາ​ຢູ່​ໃນ​ເກນ​ປົກກະຕິ​ແລ້ວ​ເຊັ່ນ: ຊີ້ນ​ງົວ, ຄວາຍ 75-80 ພັນ​ກີບ/ກິ​ໂລ, ຊີ້ນ​ໝູ 35-38 ພັນ​ກີບ/ກິ​ໂລ, ປາ​ນິນ ​ແລະ ປາດຸກ​ພັນ 16-18 ພັນ​ກີບ, ປາດຸກ​ນາ 65-70 ພັນ​ກີບ/ກິ​ໂລ, ປາ​ຄໍ່ 60 ພັນ​ກີບ/ກິ​ໂລ, ​ໄກ່​ພັນ​ປອກ 35 ພັນ​ກີບ/ກິ​ໂລ, ​ເປັດ​ປອກ 38 ພັນ​ກີບ/ກິ​ໂລ, ​ເຂົ້າສານ​ໜຽວ 10 ພັນ​ກີບ/ກິ​ໂລ, ​ເຂົ້າສານ​ຈ້າວ 11 ພັນ​ກີບ/ກິ​ໂລ. ສຳລັບ ປະ​ເພດ​ພືດ​ຜັກ​ຕ່າງໆ​ຄື: ໝາກ​ເພັດ 25-28 ພັນ​ກີບ/ກິ​ໂລ, ໝາກ​ນາວ 15-18 ພັນ​ກີບ/ກິ​ໂລ, ໝາກ​ເລັ່ນ 8-10 ພັນ​ກີບ/ກິ​ໂລ, ໝາກ​ຖົ່ວ 6-8 ພັນ​ກີບ/ກິ​ໂລ, ໝາກ​ເຂືອ, ໝາກ​ແຕງ, ຜັກ​ສະ​ລັດ, ກະ​ລ່ຳ, ຜັກ​ບົ້ງ, ​ຜັກ​ສະ​ລັດ ​ແລະ ຜັກກາດ 4-6 ພັນ​ກີບ/ກິ​ໂລ, ຫອມປ້ອມ 6-8 ພັນ​ກີບ/ກິ​ໂລ, ຫອມ​ບົ່ວ 18-20 ພັນ​ກີບ/ກິ​ໂລ, ຜັກ​ບົວລະພາ, ສະ​ນາລີ ​ແລະ ຜັກ​ອີ່​ຕູ່ 10 ພັນ​ກີບ/ກິ​ໂລ ​ແລະ ພືດ​ຜັກ​ອື່ນໆ​ກໍ​ເຊັ່ນ​ດຽວ​ກັນ.

ນາງ ນອດ ​ແມ່​ຄ້າ​ຢູ່​ຕະຫລາດ​ທົ່ງຂັນ​ຄຳ ​ໃຫ້​ຄຳ​ເຫັນ​ວ່າ: ​​ໃນ​ໄລ​ຍະ​ບຸນປີ​ໃໝ່​ປີ​ນີ້ ລາຄາ​ພືດ​ຜັກ​ຕ່າງໆທີ່​ຊາວ​ສວນ​ນຳ​ມາ​ຈຳໜ່າຍ​ນັ້ນແມ່ນ​ປົກກະຕິ ສິນຄ້າ​ບໍ່​ຂາດຕະຫລາດ ​ແລະ ເຮັດ​ໃຫ້​ລາຄາ​ຢູ່​ໃນ​ເກນ​ປົກກະຕິ ບໍ່​ຂຶ້ນສູງ​ເກີນ​ທີ່​ພາກສ່ວນ​ກ່ຽວ ຂ້ອງ​ກຳນົດ​ເອົາ​ໄວ້. ສະ​ນັ້ນ ຈຶ່ງ​ເຮັດ​ໃຫ້ການ​ຂາຍ​ສິນຄ້າ ​ແລະ ພືດ​ຜັກ​ຕ່າງໆ ດຳ​ເນີນ ​ໄປ​ຢ່າງ​ສະຫງົບ ບໍ່​ມີ​ຫາງ​ສຽງ​ຈາກ​ລູກ​ຄ້າ​ທີ່​ມາ​ໃຊ້​ບໍລິການ​ໃດໆ.

​ເຖິງ​ແນວ​ໃດ​ກໍ​ຕາມ ຖ້າ​ຫາກ​ພາກສ່ວນ​ກ່ຽວຂ້ອງ ລົງ​ຕິດຕາມ​ລາຄາ​ສິນຄ້າ ຢ່າງ​ເປັນ​ປົກກະຕິ ​ແລະ ​ແມ່ຄ້າ​ທຸກ​ຄົນປະຕິບັດ​ກົດ​ລະບຽບຢ່າງ​ເຂັ້ມ​ງວດ ບັນຫາ​ສິນຄ້າ​ຂຶ້ນ ລາຄາ​ແບບ​ລຳພັງ​ໃຈ​ກໍ​ຈະ​ບໍ່​ເກີດ​ຂຶ້ນ​ຢ່າງ​ແນ່ນອນ.

ແຫລ່ງ​ຂ່າວ: ລາວ​ພັດ​ທະ​ນາ