ຕະລຶງທົ່ວສັງຄົມໄທ ເມື່ອເຈົ້າໜ້າທີ່ຂຸດພົບສົບເດັກນ້ອຍ ຖືກຝັງໄວ້ກ້ອງຖານພະພົມຢູ່ວັດແຫ່ງໜຶ່ງໃນແຂວງຊຽງໃໝ່ ເພື່ອສະກົດວິນຍານເຮັດເຄື່ອງລາງຂອງຂັງ.
ສຳນັກຂ່າວໄທຣັດ ໄດ້ລາຍງານໃນວັນທີ 21 ເມສາຜ່ານມານີ້ວ່າ ເຈົ້າໜ້າທີ່ຕຳຫລວດ ໄດ້ສົມທົບກັບເຈົ້າໜ້າທີ່ກ່ຽວຂ້ອງ ໄດ້ລົງກວດກາ ແລະ ຂຸດຄົ້ນຊອກຫາສົບເດັກນ້ອຍ ຢູ່ວັດຫ້ວຍດິນຈີ່ ເມືອງດອຍສະເກັດ ແຂວງຊຽງໃໝ່ ຣາຊະອານາຈັກໄທ ຕາມການໃຫ້ປາກຄຳຂອງ ທ້າວ ສະເຫລີມ ດ້ວງທອງ ອາຍຸ 31 ປີ ເຊິ່ງເປັນອະດີດເຈົ້າອາວາດວັດດັ່ງກ່າວ ແຕ່ໄດ້ຖືກຈັບສິກ ຍ້ອນຜິດຄະດີເສບເມຖຸນ ໂດຍຜູ້ກ່ຽວໄດ້ຖືກກ່າວຫາຈາກຊາວບ້ານວ່າ ໃນເວລາທີ່ບວດເປັນພະຢູ່ນັ້ນ ໄດ້ມີການສະກົດວິນຍານຈາກສົບເດັກນ້ອຍ ເພື່ອສ້າງເຄື່ອງລາງຂອງຂັງ ຂາຍໃຫ້ກັບນັກທ່ອງທ່ຽວຊາວຈີນ.
ຜ່ານການຂຸດຢູ່ 2 ຈຸດຄື ຢູ່ກ້ອງຖານຮູບປັ້ນພະພົມ ແລະ ຮູບປັ້ນພະລືສີ ໃຊ້ເວລາປະມານ 1 ຊົ່ວໂມງ ເຈົ້າໜ້າທີ່ ແລະ ປະຊາຊົນທີ່ມາລໍຖ້າເບິ່ງກໍຕ້ອງຕົກຕະລຶງ ເມື່ອໄດ້ພົບກັບຫີບສົບທີ່ເປັນໂລງແກ້ວ ຝັງຢູ່ໃນຈຸດກ້ອງຖານຮູບປັ້ນພະພົມຢູ່ແທ້ງຈິງ ໂດຍອ້ອມຮອບໂລງສົບໄດ້ພົບວ່າ ມີການເຮັດໄມ້ແຫລມທີ່ຄາດວ່າເປັນການລົງຄາຖາເພື່ອສະກົດວິນຍານໄວ້, ອີກທັງໃນບໍລິເວນອ້ອມຮອບໂລງແກ້ວ ກໍມີຜ້າຍັນຕິດໄວ້ອີກດ້ວຍ.
ເມື່ອເຈົ້າໜ້າທີ່ເປີດໂລງອອກ ກໍພົບກັບເສື້ອຜ້າຂອງເດັກນ້ອຍຜູ້ຍິງ, ເກີບເດັກນ້ອຍ, ຜ້າຂົນໜູສີຂາວ ແລະ ສິ່ງຂອງເຄື່ອງໃຊ້ສຳລັບເດັກອ່ອນ, ເງິນໃບລະ 100 ບາດ ຈຳນວນ 10 ໃບມັດລວມກັນ, ສ່ວນສົບເດັກນ້ອຍນັ້ນ ແມ່ນມີສະພາບແຫ້ງຈົນຕິດກະດູກ ມີການປິດທອງຄຳທົ່ວຕົນຕົວ ໂດຍມີຫົວຂະໜາດເທົ່າກັບກ່ຳປັ້ນຜູ້ໃຫຍ່ ເຊິ່ງຍັງບໍ່ສາມາດລະບຸໄດ້ວ່າ ເປັນເພດຍິງ ຫລື ຊາຍເທື່ອ.
ດ້ານເຈົ້າໜ້າທີ່ຕຳຫລວດຊຸດສືບສວນຄະດີດັ່ງກ່າວນີ້ໄດ້ກ່າວວ່າ ເຖິງແມ່ນຈະມີການຂຸດພົບສົບເດັກນ້ອຍແລ້ວກໍຕາມ ແຕ່ກໍຍັງບໍ່ສາມາດເອົາຄວາມຜິດກັບ ທ້າວ ສະເຫລີມ ໄດ້ເທື່ອ ຕ້ອງລໍຖ້າຜົນການຊັນນະສູດຈາກແພດເສຍກ່ອນ ເພື່ອປະກອບເປັນຫລັກຖານໃນການດຳເນີນຄະດີ ກັບບຸກຄົນທີ່ກ່ຽວຂ້ອງຕໍ່ໄປ.
