ຜີກ່ອງກ່ອຍແມ່ນສັດຊະນິດໜຶ່ງ ທີ່ປະຊາຊົນຊົນນະບົດ ກໍຄືຜູ້ເຖົ້າຜູ້ແກ່ມັກເລົ່າວ່າ ມັນເປັນໂຕບໍ່ໃຫຍ່ປານໃດ ເທົ່າໆກັນກັບແມວໃຫຍ່ ມີພະລະກຳລັງຫຼາຍ ສາມາດໄງ້ກ້ອນຫິນໃຫຍ່ ລະດັບຮ້ອຍກິໂລໄດ້ ມັກຈັບກະປູເປັນອາຫານ ຮອຍຕີນຂອງມັນຄ້າຍຄືຮອຍຕີນເດັກນ້ອຍ ແຕ່ນິ້ວຂອງມັນປິ້ນກັບກັບຕີນຄົນ ມັນສາມາດຖອຍໄສ້ຄົນໃຫ້ອອກມານອກໄດ້ ໂດຍການດຶງດົ້ນຟືນທີ່ຄົນດັງນັ້ນອອກ (ເວລາຄົນເຮົາໄປນອນພັກຢູ່ປ່າ)
ຈາກກະແສຂ່າວທາງອອນລາຍວ່າ ປະຊາຊົນຈັງຫວັດສີສະເກດ ປະເທດໄທຈັບສັດປະຫຼາດ ຫຼືໂຕ(ຜີ)ກ່ອງກ່ອຍໄດ້ໂຕເປັນໆ ດັ່ງນັ້ນ, ທີມຂ່າວລາວໂພສຕ໌ຈຶ່ງໄດ້ກວດສອບ ແຫຼ່ງຂ່າວດັ່ງກ່າວ ນຳໄປເຖິງທີ່ມາຂອງຮູບພາບດັ່ງກ່າວ ແລະໄດ້ຮູ້ວ່າ ສັດປະຫຼາດດັ່ງກ່າວນັ້ນ ບໍ່ແມ່ນຜີກ່ອງກ່ອຍ ແຕ່ແມ່ນໝີໝາທີ່ຂາດສານອາຫານ ໃນປະເທດມາເລເຊຍ ແລ້ວເຮັດໃຫ້ຈ່ອຍໂຊແລະບໍ່ມີຂົນ ຈຶ່ງຖືກເຈົ້າໜ້າທີ່ຈັບມາເພື່ອປິ່ນປົວ ແລະປ່ອຍເຂົ້າປ່າຄືນໄປ.