ລິໂອເນວ ເມດສ໌ຊີ ດາວເຕະຊຸບເປີສະຕາຣ໌ແຫ່ງບາເຊໂລນາ ສ້າງສະຖິຕິໄໝ່ເກີດຂື້ນກັບຕົ້ນສັງກັດ ຫຼັງຈາກຍິງປະຕູທີ 400 ໃນການຫຼິ້ນອາຊີບກັບ ບາເຊໂລນາ ລວມທຸກລາຍການໄດ້ສຳເລັດ ຫຼັງຈົບເກມທີ່ເປີດບ້ານເຊືອດ ບານເລນເຊຍ 2-0 ໃນລາລີກາ ສະເປນ ເມື່ອຄືນວັນທີ 18 ທີ່ຜ່ານມາ
ເກມທີ່ ຄັມປ໌ ຫຼຸຍ ຊົວເຣດຊ໌ ຈັດການລູກທຳອິດໃນເວລາ 58 ວິນາທີ ໃຫ້ບາຊາ ອອກນຳກ່ອນຈົນຮອດທົດເວລາບາດເຈັບເຄີ່ງເວລາທີ 2 ດາວຍິງຊາວອາເຈນຕິນາກໍ່ມາເພີ່ມປະຕູໄຊຈາກການຫຼຸດດ່ຽວເຄີ່ງສະໜາມ ສົ່ງໃຫ້ທີມເກັບ 3 ຄະແນນເຂົ້າບ້ານແລະນຳເປັນຈ່າຝູງ ລາລີກາ ສະເປນ ຕໍ່ໄປ
ໄຊຊະນະທີ່ໄດ້ຈາກປະຕູຂອງ ເມດສ໌ຊີ ອາຍຸ 27 ປີ ຄົນນີ້ກາຍເປັນຜູ້ຫຼີ້ນຄົນທຳອິດທີ່ຍິງປະຕູຄົບ 400 ລູກໃຫ້ຕົ້ນສັງກັດຄົບທຸກລາຍການ ( ບໍ່ນັບເກມອຸ່ນເຄື່ອງ ) ແລະ ເປັນດາວຊັນໂວສູງສຸດຕະຫຼອດການໄປແລ້ວ ພ້ອມນີ້ຍັງເປັນປະຕູທີ 46 ຂອງເມດສ໌ຊີໃນລະດູການນີ້ນຳອີກຈາກການລົງຫຼີ້ນ 46 ນັດ