ກຸ່ມ​ລັດ​ອິດ​ສະ​ລາມ ຫລື IS ກໍ່​ເຫດລະ​ເບີດ​ສະ​ຖານ​ທູດ​ໂມ​ຣັອກ​ໂຄ ໃນ​ປະ​ເທດ​ລິ​ເບຍ ຍັງ​ບໍ່​ມີ​ລາຍ​ງານ​ຜູ້​ໄດ້​ຮັບ​ບາດ​ເຈັບ ຫລື ເສຍ​ຊີ​ວິດ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ມື້​ນີ້ (13 ເມ​ສາ) ວ່າ ຄວາມ​ຮຸນ​ແຮງ​ຢູ່​ໃນ​ປະ​ເທດ​ລິ​ເບຍ ແມ່ນ​ນັບ​ມື້​ນັບ​ເພີ່ມ​ທະ​ວີ​ຂຶ້ນ ຫລັງ​ຈາກ​ໃນ​ມື້​ວານ​ນີ້ (12 ເມ​ສາ) ເກີດ​ເຫດ​ຄົນ​ຮ້າຍ​ບຸກ​ໂຈມ​ຕີກວາດ​ຍິງ​ໜ້າ​ສະ​ຖານ​ທູດ​ເກົາ​ຫລີ​ໃຕ້ ໃນ​ນະ​ຄອນ​ຫລວງ​ຕິ​ໂປ​ລີ ເຮັດ​ໃຫ້​ມີ​ຜູ້​ເສຍ​ຊີ​ວິດ 2 ຄົນ ແລະ ບາດ​ເຈັບ​ອີກ 1 ຄົນ, ລ່າ​ສຸດ​ໃນ​ມື້​ນີ້ ໄດ້​ເກີດ​ເຫດ​ໂຈມ​ຕີ​ສະ​ຖານ​ທູດ​ໂມ​ຣັອກ​ໂຄ ໂດຍ​ເຫດ​ການ​ດັ່ງ​ກ່າວ ທາງກອງ​ກຳ​ລັງ​ລັດ​ອິດ​ສະ​ລາມ ຫລື IS ໄດ້​ອອກ​ມາ​ສະ​ແດງ​ຕົນ​ເປັນ​ຜູ້​ກໍ່​ເຫດ​ອີກ​ຄັ້ງ ເຊິ່ງ​ຜູ້​ທີ່​ຢູ່​ໃນ​ເຫດ​ການ​ໄດ້​ໃຫ້​ຂໍ້​ມູນ​ວ່າ ເກີດ​ສຽງ​ດັງ​ພ້ອມ​ກັບ​ແຮງ​ສັ່ນ​ສະ​ເທືອນໄປ​ທົ່ວ​ທັງ​ສະ​ຖານ​ທູດ ຫລັງ​ຈາກວັດ​ຖຸ​ລະ​ເບີດ​ທີ່​ບັນ​ຈຸ​ຢູ່​ໃນ​ຖົງ​ສີ​ດຳ ແລ້ວ​ຖືກ​ນຳ​ມາ​ຖິ້ມ​ໄວ້​ໃນ​ຖັງ​ຂີ້​ເຫຍື້ອ ຢູ່​ທາງ​ດ້ານ​ຊ້າຍ​ທາງ​ເຂົ້າ​ອາ​ຄານ​ສະ​ຖານ​ທູດ ເຊິ່ງ​ລ່າ​ສຸດ​ຮອດ​ປັດ​ຈຸ​ບັນ ແມ່ນ​ຍັງ​ບໍ່​ທັນ​ມີ​ລາຍ​ງານ​ເຖິງ​ຜູ້​ໄດ້​ຮັບ​ບາດ​ເຈັບ ຫລື ເສຍ​ຊີ​ວິດ​ເທື່ອ.