ກຸ່ມລັດອິດສະລາມ ຫລື IS ເຜົາໂຮງງານນ້ຳມັນ ເຊິ່ງເປັນແຫລ່ງລາຍຮັບຫລັກຂອງຕົນຖິ້ມ ຫລັງຖືກທາງການອີຣັກ ແລະ ພັນທະມິດບຸກໜັກ.
ສຳນັກຂ່າວຕ່າງປະເທດ ລາຍງານໃນວັນທີ 9 ເມສາຜ່ານມານີ້ວ່າ ກຸ່ມກໍ່ການຮ້າຍລັດອິດສະລາມ ຫລື IS ໄດ້ສູນເສຍແຫລ່ງລາຍຮັບຫລັກຂອງຕົນ ຫລັງຈາກຕ້ອງໄດ້ຖອນກຳລັງອອກຈາກພື້ນທີ່ແຫລ່ງນ້ຳມັນ ຢ່າງໜ້ອຍ 3 ແຫລ່ງໃຫຍ່ ເນື່ອງຈາກຖືກບຸກໜັກຈາກກອງທັບອີຣັກ ແລະ ກອງກຳລັງເພັດເມີກ້າ ເຊິ່ງເປັນກຳລັງພັນທະມິດຂອງຊາວເຄີດ.
ທັງນີ້ ກຸ່ມ IS ໄດ້ຖືກຈັດໃຫ້ເປັນກຸ່ມກໍ່ການຮ້າຍທີ່ລວຍທີ່ສຸດໃນໂລກ ຈາກການປຸ້ນທະນາຄານ ລວມເຖິງສາມາດຄອບຄອງແຫລ່ງນ້ຳມັນໃນປະເທດໄວ້ພຽງຜູ້ດຽວ, ຜ່ານການເດີນໜ້າປາບປາມຂອງເຈົ້າໜ້າທີ່ອີຣັກ ແລະ ກອງກຳລັງພັນທະມິດ ທີ່ບຸກໂຈມຕີໜັກໃນໄລຍະຜ່ານມາ ເຮັດໃຫ້ກຸ່ມດັ່ງກ່າວຕັດສິນໃຈເຜົາທຳລາຍໂຮງກັ່ນນ້ຳມັນຂອງຮິມຣິນ ແລະ ອາຈິນ ທາງພາກຕາເວັນຕົກສຽງເໜືອຂອງເມືອງຕຣິກິດ ໂດຍບໍ່ຮູ້ສຶກເສຍດາຍຕໍ່ການສູນເສຍແຫລ່ງລາຍໄດ້ຂອງຕົນ.
ຢ່າງໃດກໍຕາມ ກຸ່ມກໍ່ການຮ້າຍລັດອິດສະລາມ ຍັງສາມາດຄວບຄຸມແຫລ່ງຜະລິດນ້ຳມັນໄດ້ຫລາຍແຫ່ງຢູ່ ແຕ່ພວກເຂົາບໍ່ມີຄວາມຊ່ຽວຊານດ້ານການຜະລິດນ້ຳມັນ ເຮັດໃຫ້ຜະລິດນ້ຳມັນອອກມາໄດ້ ພຽງແຕ ່5% ຈາກກຳລັງການຜະລິດທັງໝົດ.