ທ່ານ ວັນເພັນ ສີສຸກ ຮອງຜູ້ອຳນວຍການສະຖານີຂົນສົ່ງສາຍໃຕ້-ສາຍຕ່າງປະເທດ ໃຫ້ສຳພາດໃນວັນທີ 3 ເມສາ 2015 ໄດ້ຮູ້ວ່າ: ເພື່ອຮອງຮັບການບໍລິການຂົນສົ່ງຜູ້ໂດຍສານ ທີ່ຈະເດີນທາງລະຫວ່າງພາກກາງສູ່ພາກໃຕ້ ໃນໄລຍະບຸນປີໃໝ່ລາວ ພສ 2558 ທີ່ຈະມາເຖິງບໍ່ດົນນີ້ ປັດຈຸບັນ ທາງສະຖານີຂົນສົ່ງສາຍໃຕ້-ສາຍຕ່າງປະເທດ ໄດ້ມີການກະກຽມຄວາມພ້ອມທຸກດ້ານແລ້ວ ບໍ່ວ່າຈະເປັນທາງດ້ານເຕັກນິກ ໄດ້ມີການປະສານງານກັບເຈົ້າໜ້າທີ່ ແລະ ບໍລິສັດທີ່ແລ່ນລົດໃນສະຖານີໂດຍສານ ເພື່ອເປັນການຕອບສະໜອງໃຫ້ກັບມວນຊົນທີ່ຈະເດີນທາງກັບບ້ານ (ພາກໃຕ້) ໄດ້ມີການເພີ່ມລົດໂດຍສານຈາກວັນປົກກະຕິ 50 ຄັນ ມາເປັນ 80 ຄັນຕໍ່ວັນ ແລະ ຍ້າຍເວລາອອກໄປເພີ່ມອີກ 1 ຊົ່ວໂມງ ຈາກເວລາ 4:30-22:00 ໂມງ (ເວລາປົກກະຕິ 4:30-21:00 ໂມງ) ແລະ ສາມາດຈ່ອງກ່ອນລ່ວງໜ້າ ໄດ້ພຽງແຕ່ລົດປະເພດດຽວເທົ່ານັ້ນຄື VIP ສ່ວນລົດທຳມະດາແມ່ນໄປຂຶ້ນກັບສະຖານີເທົ່ານັ້ນ.
ກ່ອນໜ້ານັ້ນຫຼາຍພາກສ່ວນເປັນຫ່ວງວ່າ ອາດຈະມີການປັບລາຄາຂຶ້ນເມື່ອມີຜູ້ໂດຍສານໄປ ໃຊ້ບໍລິການຫຼາຍຕໍ່ບັນຫາດັ່ງກ່າວນີ້ ທ່ານຮອງອຳນວຍການໄດ້ຢັ້ງຢືນວ່າ ຈະບໍ່ມີການປັບຂຶ້ນລາຄາຢ່າງເດັດຂາດຄືລາຄາຈະປົກກະຕິກັບວັນທຳ ມະດາ ວຽງຈັນ-ປາກຊັນ ລົດທຳມະດາ 30.000 ກີບ ລົດດ່ວນ 40.000 ກີບ VIP 50.000 ກີບ ວຽງຈັນ-ຫຼັກ 20 ລາຄາ 85.000 ກີບ ວຽງຈັນ-ທ່າແຂກລົດທຳມະດາ 60.000 ກີບ ລົດດ່ວນ 70.000 ກີບ ແລະ 80.000 ກີບ ວຽງຈັນ-ສະຫວັນນະເຂດ ທຳມະດາ 75.000 ກີບ ລົດດ່ວນ 90.000 ກີບ ແລະ VIP 110.000-120.000 ກີບ ວຽງຈັນ-ປາກເຊ ທຳມະດາ 110.000 ກີບ ລົດດ່ວນ 140.000 ກີບ VIP 170.000 ກີບ ວຽງຈັນ-ສາລະວັນ 130.000-190.000 ກີບ ວຽງຈັນ-ເຊກອງ 130.000-210.000 ກີບ ວຽງຈັນ-ອັດຕະປື 140.000-220.000 ກີບ ສ່ວນລາຍລະອຽດຕ່າງໆສາມາດຕິດຕໍ່ພົວພັນກັບບໍລິສັດຂົນສົ່ງ ຫຼື ສະຖານີໄດ້.
ສຳລັບປີໃໝ່ລາວປີນີ້ ຄາດວ່າຈະມີຈຳນວນຜູ້ໂດຍສານມາໃຊ້ບໍລິການຫຼາຍກວ່າທຸກປີ ເພາະມີເວລາພັກປະມານ 1 ທິດຈາກ ວັນທີ 14-16 ເມສາ ເຊິ່ງຜູ້ໂດຍສານຈະເລີ່ມມາໃຊ້ລົດນັບແຕ່ວັນທີ 10 ເມສາ ເປັນຕົ້ນໄປ.
ແຫລ່ງຂ່າວ: ວຽງຈັນໃໝ່