ຕຳ​ຫລວດ​ມາ​ເລ​ເຊຍ ຖະ​ແຫລງ​ຜົນ​ການ​ຈັບ​ກຸມ​ຊາວ​ເມ​ເລ ຈຳ​ນວນ 17 ຄົນ ສົງ​ໄສ​ເປັນ​ແນວ​ຮ່ວມ​ສະ​ໜັບ​ສະ​ໜູນ​ກຸ່ມ IS.

ສຳນັກຂ່າວຕ່າງປະເທດ ລາຍງານໃນວັນທີ 7 ເມສານີ້ວ່າ ທ່ານ ຄາລິດ ອາບູ ບາຄາ ເຈົ້າໜ້າທີ່ຕຳຫລວດມາເລເຊຍ ໄດ້ຖະແຫລງຜົນການກວາດຈັບຊາຍໜຸ່ມ ຊາວມາເລເຊຍ 17 ຄົນ ໃນຖານະຜູ້ຖືກສົງໄສເປັນແນວຮ່ວມຂອງກຸ່ມກໍ່ການຮ້າຍ ໃນວັນທີ 5 ເມສາຜ່ານມານີ້ ໂດຍຜູ້ຕ້ອງສົງໄສ 2 ໃນຈຳນວນ 17 ຄົນ ແມ່ນຫາກໍເດີນທາງກັບມາຈາກປະເທດຊີເຣຍ  ໃນຖານະຜູ້ສະໜັບສະໜູນກອງກຳລັງຕິດອາວຸດລັດອິດສະລາມ ຫລື IS ໃນ​ອີ​ຣັກ ແລະ ຊີ​ເຣຍ ເຊິ່ງ​ເຮັດ​ໃຫ້​ສະ​ຖິ​ຕິ​ການ​ຈັບ​ກຸມ​ຜູ້​ຕ້ອ​ງ​ສົງ​ໄສ​ກໍ່​ການ​ຮ້າຍ​ຂອງ​ມາ​ເລ​ເຊຍ ນັບ​ຕັ້ງ​ແຕ່​ປີ 2014 ເປັນ​ຕົ້ນ​ມາ ໄດ້​ເພີ່ມ​ຂຶ້ນ​ເປັນ 92 ຄົນ​ແລ້ວ ໃນ​ຂະ​ນະ​ທີ່​ລັດ​ຖະ​ບານ​ຂອງ​ມາ​ເລ​ເຊຍ ຫາ​ກໍ​ສະ​ເໜີ​ຮ່າງ​ກົດ​ໝາຍ ເພື່ອ​ປ້ອງ​ກັນ ແລະ​ປາບ​ປາມ​ການ​ກໍ່​ການ​ຮ້າຍ​ສະ​ບັບ​ໃໝ່ ຈຳ​ນວນ 2 ສະ​ບັບ ເມື່ອ​ເດືອນມີ​ນາທີ່​ຜ່ານ​ມາ ເຊິ່ງ​ຈະ​ເປັນ​ການ​ມອບ​ອຳ​ນາດ​ໃຫ້​ແກ່​ຕຳ​ຫລວດ ໃນ​ການ​ກັກ​ຕົວ​ຜູ້​ຕ້ອງ​ສົງ​ໄສ ໂດຍ​ບໍ່​ຈຳ​ເປັນ​ຕ້ອງ​ຕັ້ງ​ຂໍ້​ຫາ ແລະ ບໍ່​ຈຳ​ກັດ​ໄລ​ຍະ​ເວ​ລາ​ໃນ​ການ​ຄວບ​ຄຸມ​ຕົວ ລວມ​ເຖິງ​ມີ​ອຳ​ນາດ​ສາ​ມາດ​ຍຶດ​ໜັງ​ສື​ຜ່ານ​ແດນ​ຂອງ​ຜູ້​ຕ້ອງ​ສົງ​ໄສ​ໄດ້​ອີກ​ດ້ວຍ.