ທາງການຈີນຕັ້ງຂໍ້ຫາ ອະດີດກົມການເມືອງ ໂຈວ ຢົ່ງຄັງ ຫລາຍກະທົງຢ່າງເປັນທາງການ ປູທາງສູ່ການດຳເນີນຄະດີໃນຊັ້ນສານໃນອີກບໍ່ດົນນີ້.
ສຳນັກຂ່າວຕ່າງປະເທດ ລາຍງານໃນວັນທີ 4 ເມສາຜ່ານມານີ້ວ່າ ສຳນັກງານໄອຍະການປະຊາຊົນສູງສຸດຂອງຈີນ ໄດ້ອອກຖະແຫລງການໃນວັນທີ 3 ເມສາຜ່ານມານີ້ ກ່ຽວກັບການຕັ້ງຂໍ້ກ່າວຫາ ທ່ານ ໂຈວ ຢົ່ງຄັງ ອາຍຸ 72 ປີ ຖານໃຊ້ຕຳແໜ່ງຂອງຕົນເອງ ຮັບສິນບົນມູນຄ່າມະຫາສານຢ່າງຜິດກົດໝາຍ, ໃຊ້ອຳນາດໜ້າທີ່ໃນທາງທີ່ບໍ່ຖືກຕ້ອງ ແລະ ເປັນຕົ້ນເຫດແຫ່ງການສູນເສຍຊັບສິນຂອງລັດ ແລະ ປະຊາຊົນຢ່າງໃຫຍ່ຫລວງ.
ທ່ານ ໂຈວ ຢົ່ງຄັງ ເຄີຍດຳລົງຕຳແໜ່ງຕ່າງໆ ນັບຕັ້ງແຕ່ເປັນຮອງຜູ້ຈັດການທົ່ວໄປ ຂອງບໍລິສັດປິໂຕລຽມແຫ່ງຊາດຈີນ (CNPC), ເລຂາຄະນະພັກແຂວງເສສວນ, ລັດຖະມົນຕີວ່າການກະຊວງປ້ອງກັນຄວາມສະຫງົບ ແລະ ສູງຂຶ້ນຈົນເຖິງກຳມະການກົມການເມືອງ ສູນກາງພັກກອມມູນິດຈີນ ໃນປີ 2007 ກ່ອນທີ່ຈະອອກຮັບບຳນານໃນປີ 2012 ກອ່ນທີ່ຈະຖືກກວດສອບເອົາຄວາມຜິດ ເຊິ່ງເປັນໄປຕາມນະໂຍບາຍຂອງ ປະທານາທິບໍດີ ສີ ຈິ້ນຜິງ ທີ່ປະກາດຈະປາບປາມການສໍ້ລາດບັງຫລວງໃນສັງຄົມຢ່າງບໍ່ມີການຍົກເວັ້ນ.
ທາງການຈີນ ໄດ້ຈັບກຸມ ທ່ານ ໂຈວ ຢົ່ງຄັງ ແລະ ໄລ່ອອກຈາກການເປັນສະມາຊິກພັກກອມມູນິດ ໃນປີ 2014 ທີ່ຜ່ານມາ ຫລັງຈາກທີ່ຜົນການສອບສວນພົບວ່າ ເຂົາໄດ້ຮັບເງິນສິນບົນ ແລະ ເປີດເຜີຍຄວາມລັບຂອງລັດຖະບານ ພ້ອມໆກັບການຈັບກຸມລູກສະໝຸນຄົນໃກ້ຊິດ ທີ່ຮ່ວມກັນກະທຳຜິດອີກນັບສິບຄົນ.
ການພິຈາລະນາຄະດີຂອງ ທ່ານ ໂຈວ ຢົ່ງຄັງ ແມ່ນຍັງບໍ່ທັນມີການກຳນົດວັນເວລາທີ່ແນ່ນອນ ແຕ່ຄາດວ່າອາດເລີ່ມຂຶ້ນໃນອີກບໍ່ດົນນີ້ ໂດຍສື່ມວນຊົນທາງການຂອງຈີນໄດ້ລາຍງານຜ່ານມາວ່າ ຈີນຈະດຳເນີນການພິຈາລະນາຄະດີໃນຊັ້ນສານຂອງເຂົາໂດຍເປີດເຜີຍ ເພື່ອສະແດງຄວາມໂປ່ງໃສຂອງຂະບວນການຍຸດຕິທຳຂອງຈີນ.