ວັນທີ 31 ມີນາ 2015 ຜ່ານມາ ທີ່ໂຮງແຮມຈຳປາສັກແກຣນ ເມືອງປາກເຊ ແຂວງຈຳປາສັກ ລາວໂທລະຄົມໄດ້ຈັດພິທີເປີດໃຫ້ບໍລິການ 4G LTE ຢ່າງເປັນທາງການ ເປັນປະທານຂອງທ່ານ ດຣ. ບຸນຖອງ ດີວິໄຊ ເຈົ້າແຂວງຈຳປາສັກ ທ່ານ ດຣ. ທັນສະໄໝ ກົມມະສິດ ລັດຖະມົນຕີຊ່ວຍວ່າການ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ທ່ານ ທອງໃສ ຊານໄຊຍະ ຜູ້ອຳນວຍການໃຫຍ່ ລາວໂທລະຄົມ ມີທ່ານເຈົ້າເມືອງປາກເຊ ແຂກຖືກເຊີນ ແລະ ຮ້ານຕົວແທນຈຳໜ່າຍເຂົ້າຮ່ວມ.
ລາວໂທລະຄົມ ເປັນຜູ້ໃຫ້ບໍລິການທາງດ້ານໂທລະຄົມມະນາຄົມຢ່າງເຕັມຮູບແບບໃນ ລາວ ມາຍາວນານກວ່າ 18 ປີແລ້ວ ແລະ ທັງເປັນຜູ້ນຳໃນການໃຫ້ບໍລິການທາງດ້ານ Data ໂດຍການຂະຫຍາຍເຄືອຂ່າຍພື້ນທີ່ໃຫ້ບໍລິການ ແລະ ຄວບຄຸມຄຸນະພາບການໃຫ້ບໍລິການໃນມາດຕະຖານສາກົນ ໂດຍການພັດທະນາທາງດ້ານເທັກນິກ ການນຳເອົາເຕັກໂນໂລຢີໃໝ່ໆເຂົ້າມານຳໃຊ້ ແລະ ດ້ານອື່ນໆ ທັງໝົດນີ້ກໍ່ເພື່ອປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ຕາມທິດທາງພັກ-ລັດທີ່ວາງໄວ້ ເພື່ອຕອບສະໜອງຄວາມຕ້ອງການຂອງລູກຄ້າ ກໍ່ຄືຜູ້ຊົມໃຊ້ ເພື່ອກຽມຄວາມພ້ອມກ້າວເຂົ້າສູ່ປະຊາຄົມເສດຖະກິດອາຊຽນໃນໄວໆນີ້.
ລາວໂທລະຄົມ ເປີດໃຫ້ບໍລິການ 4G LTE ໃນວັນທີ 26 ຕຸລາ 2012 ທີ່ຜ່ານມາ ເພື່ອນຳມາຮັບໃຊ້ກອງປະຊູມສຸດຍອດອາເຊັມ ຄັ້ງທີ 9 ທີ່ ສປປ ລາວ ໄດ້ຮັບກຽດເປັນເຈົ້າພາບ ໂດຍມີພື້ນທີ່ໃຫ້ບໍລິການໃນນະຄອນຫຼວງວຽງຈັນ ເບື້ອງຕົ້ນ 20 ຈຸດ ແລະ ໄດ້ເພີ່ມຂຶ້ນເປັນ 80 ຈຸດ ໃນປັດຈຸບັນ ເພື່ອຕອບສະໜອງຄວາມຕ້ອງການຂອງລູກຄ້າທີ່ມີເພີ່ມຫຼາຍຂຶ້ນ ແລະ ວັນນີ້ກໍ່ເປັນວັນໜຶ່ງທີ່ມີຄວາມໝາຍຄວາມສຳຄັນຢ່າງຍິ່ງ ແລະ ເປັນບາດກ້າວສຳຄັນ ໃນວົງການການໃຫ້ບໍລິການດ້ານໂທລະຄົມມະນາຄົມຂອງລາວ ກໍ່ຄືການຂະຫຍາຍການໃຫ້ບໍລິການ 4G ມາຍັງຕ່າງແຂວງ ກໍ່ຄືແຂວງຈຳປາສັກ ເຊິ່ງໃນເບື້ອງຕົ້ນມີພື້ນທີ່ໃຫ້ບໍລິການເຖິງ 30 ຈຸດ ເພື່ອໃຫ້ລູກຄ້າ ແລະ ພໍ່ແມ່ປະຊາຊົນ ໄດ້ສຳຜັດກັບປະສົບການທີ່ເໜືອລະດັບໃນການໃຫ້ບໍລິການ Data 4G ຂອງລາວໂທລະຄົມ ແລະ ຍັງຈະສືບຕໍ່ຂະຫຍາຍພື້ນທີ່ໃຫ້ຄວບຄຸມພາຍໃນແຂວງໃຫ້ຫຼາຍຂຶ້ນ ນອກຈາກແຂວງຈຳປາສັກແລ້ວ ຍັງໄດ້ສືບຕໍ່ຂະຫຍາຍໄປຍັງແຂວງອື່ນໆອີກ ເພື່ອຕອບສະໜອງກັບຄວາມຕ້ອງການຂອງລູກຄ້າ ໃຫ້ໄດ້ນຳໃຊ້ເທັກໂນໂລຢີທີ່ທັນສະໄໝ ວ່ອງໄວ ແລະ ທຽບເທົ່າກັບສາກົນ ສຳລັບລູກຄ້າທ່ານໃດທີ່ສົນໃຈສາມາດເຂົ້າໄປທົດລອງນຳໃຊ້ ແລະ ເປີດນຳໃຊ້ບໍລິການ 4G ໄດ້ທີ່ສູນບໍລິການລູກຄ້າຂອງລາວໂທລະຄົມ.
ແຫລ່ງຂ່າວ: ວຽງຈັນໃໝ່