ອີງຕາມແຜນການດຳເນີນງານຂອງຄະນະຊີ້ນຳລະດັບຊາດ ກໍ່ຄືອະນຸກຳມະການເນື້ອໃນ ເພື່ອສະເຫຼີມສະຫຼອງວັນປະຫວັດສາດປີ 2015 ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 95 ປີ ວັນສ້າງຕັ້ງສູນກາງຊາວໜຸ່ມ ຄົບຮອບ 60 ປີ ຄະນະໂຄສະນາອົບຮົມສູນກາງພັກ (ຄອສພ) ໄດ້ເປີດບັ້ນການແຂ່ງຂັນຖາມ-ຕອບ ກ່ຽວກັບ 60 ປີ ພັກປະຊາຊົນປະຕິວັດລາວ ແລະ 40 ປີ ສະຖາປະນາ ສປປ ລາວ.
ຄອສພ ໃນນາມອະນຸກຳມະການເນື້ອໃນລະດັບຊາດ ສະເຫຼີມສະຫຼອງວັນປະຫວັດສາດປີ 2015 ໄດ້ຈັດກິດຈະກຳຖາມ-ຕອບວິທະຍາສາດ ກ່ຽວກັບວັນສຳຄັນດັ່ງກ່າວຂຶ້ນທີ່ສະໂມສອນໃຫຍ່ ຄອສພ ວັນທີ 2 ເມສາ 2015 ໂດຍມີທ່ານ ສຈ.ດຣ. ກິແກ້ວ ໄຂຄຳພິທູນ ກຳມະການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ມີບັນດາຄະນະພັກ ເລຂາຊາວໝຸ່ມ ຜູ້ອຳນວຍການໂຮງຮຽນ ແລະ ສະມາຊິກຊາວໜຸ່ມອ້ອມຂ້າງສູນກາງເຂົ້າຮ່ວມ.
ທ່ານ ສຈ.ດຣ. ກິແກ້ວ ໄຂຄຳພິທູນ ໄດ້ກ່າວວ່າ: ການຈັດກິດຈະກຳຖາມ-ຕອບວິທະຍາສາດ ກ່ຽວກັບວັນສຳຄັນຂອງຊາດ ໃນປີ 2015 ນີ້ແມ່ນເຮັດໃຫ້ຄົນຮຸ່ນໜຸ່ມເຫັນໄດ້ຜົນງານ ແລະ ມູນເຊື້ອແຫ່ງໄຊຊະນະ ໃນພາລະກິດຕໍ່ສູ້ປົດປ່ອຍຊາດ ໃນໄລຍະປົກປັກຮັກສາປະເທດຊາດ ເປັນການປຸກລະດົມຈິດໃຈຮັກຊາດ ຮັກລະບອບໃໝ່ ເຊີດຊູຄວາມເຊື່ອໝັ້ນຕໍ່ການນຳພາຂອງພັກ ກໍ່ຄືຈຸດໝາຍສັງຄົມນິຍົມ ຖືເອົາການສະເຫຼີມສະຫຼອງ 2 ວັນປະຫວັດສາດ ເປັນການໂຄສະນາແນວທາງນະໂຍບາຍຂອງພັກ-ລັດ ແລະ ເປັນການຕ້ານກົນອຸບາຍເລ່ລ່ຽມຂອງອິດທິກຳລັງປໍລະປັກ ທີ່ຍັງບໍ່ທັນລົດລະໃນການມ້າງເພທຳລາຍລະບອບໃໝ່ຂອງພວກເຮົາ ພ້ອມດຽວກັນ ກໍ່ເປັນການສຶກສາອົບຮົມຄົນຮຸ່ນໜຸ່ມທາງດ້ານການເມືອງ-ແນວຄິດ ມີການກະທຳອັນຖືກຕ້ອງຮັກສາມູນເຊື້ອວັດທະນະທຳອັນດີງາມຂອງຊາດ ເອກອ້າງທະນົງໃຈໃນຊາດຂອງຕົນ ຕັ້ງໜ້າເຂົ້າໃນການຄົ້ນຄວ້າຮ່ຳຮຽນ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ສຳລັບເນື້ອໃນຄຳຖາມ-ຄຳຕອບ ທີ່ທາງຄະນະໂຄສະນາອົບຮົມສູນກາງພັກຮ່າງຂຶ້ນມີທັງໝົດ 130 ຄຳຖາມ-ຄຳຕອບ ກິດຈະກຳໃນຄັ້ງນີ້ແມ່ນຈະເລີ່ມຕົ້ນໃນເດືອນເມສາຈົນເຖິງທ້າຍປີ 2015 ໂດຍເລີ່ມຈາກຊາວໜຸ່ມ ຄອສພ ແລະ ສູນກາງຊາວໜຸ່ມປະຊາຊົນປະຕິວັດລາວ ຈາກນັ້ນ ກໍ່ຂະຫຍາຍໄປຍັງບັນດາສຳນັກງານ ອົງການ ໂຮງຮຽນ ແລະ ສະຖາບັນການສຶກສາຕ່າງໆ ຕາມສະພາບເງື່ອນໄຂຂອງແຕ່ລະແຫ່ງ.
ແຫລ່ງຂ່າວ: ວຽງຈັນໃໝ່