ວັນທີ 30 ມີນາ 2015 ທີ່ໂຮງແຮມແດນມາກ ນະຄອນຫຼວງວຽງຈັນ ໄດ້ເປີດກອງປະຊຸມພົບປະລະຫວ່າງນັກທຸລະກິດ ລາວ-ຈີນ (ຊານຕົ້ງ) ໂດຍການເຂົ້າຮ່ວມຂອງທ່ານ ສຽວສະຫວາດ ສະແຫວງສຶກສາ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ທ່ານ ເຊ້ຍເກິ່ງ (Xia Geng) ຮອງເຈົ້າແຂວງຊານຕົ້ງ ສປ ຈີນ ພ້ອມດ້ວຍສະພາການຄ້າ ແລະ ອຸດສາຫະກຳແຫ່ງຊາດ ແລະ ບັນດານັກທຸລະກິດຈາກທັງສອງຝ່າຍເຂົ້າຮ່ວມ.
ທ່ານ ສີສະຫວາດ ທິຣະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອ) ກ່າວວ່າ: ການຢ້ຽມຢາມຂອງທ່ານຮອງເຈົ້າແຂວງຊານຕົ້ງ ພ້ອມດ້ວຍນັກທຸລະກິດ ເພື່ອເປັນການສຶກສາຂໍ້ມູນແລກປ່ຽນບົດຮຽນ ແລະ ມີຄວາມຕ້ອງການຮ່ວມມືທາງດ້ານການຄ້າ ການລົງທຶນກັບນັກທຸລະກິດລາວຫຼາຍຂະແໜງການ ເຊັ່ນ: ການຄ້າ ຕັດຫຍິບ ກະສິກຳ-ປ່າໄມ້ ເຟີນິເຈີ ກົນຈັກ ແລະ ອື່ນໆ ເພື່ອເປັນການສົ່ງເສີມການຮ່ວມມືລະຫວ່າງນັກທຸລະກິດ ລາວ-ຈີນ ໃຫ້ນັບມື້ຂະຫຍາຍຕົວ ປາກົດຜົນເປັນຈິງ ທີ່ຈະສົ່ງຜົນດີຕໍ່ລະບົບເສດຖະກິດໃນອະນາຄົດ.
ສະພາການຄ້າ ແລະ ອຸດສາຫະກຳແຫ່ງຊາດລາວ ແມ່ນຕົວແທນໃຫ້ແກ່ກຸ່ມທຸລະກິດ ສປປ ລາວ ມີຫຼາຍກວ່າ 100.000 ຫົວໜ່ວຍທຸລະກິດ ເຊິ່ງເປັນສະມາຊິກຂອງ ສຄອ ຫຼາຍກວ່າ 3.000 ຫົວໜ່ວຍ ເປັນຂົວຕໍ່ລະຫວ່າງພາກລັດກັບທຸລະກິດ ເພື່ອແກ້ໄຂບັນຫາຮ່ວມກັນ.
ທ່ານປະທານສະພາການຄ້າ ແລະ ອຸດສາຫະກຳແຫ່ງຊາດລາວ ສະເໜີຕໍ່ກອງປະຊຸມຄັ້ງນີ້ວ່າ: ສປປ ລາວ ເປັນປະເທດທີ່ໜ້າລົງທຶນ ຂອງນັກລົງທຶນຈາກຕ່າງປະເທດຢ່າງຫຼວງຫຼາຍ ເຊິ່ງມີທີ່ຕັ້ງພູມສັນຖານທີ່ດີຄື: ບໍ່ມີໄພທຳມະຊາດ ແຜ່ນດິນໄຫວ ນ້ຳຖ້ວມ ມີການເມືອງທີ່ສະຫງົບ ມີຊັບພະຍາກອນທຳມະຊາດທີ່ອຸດົມສົມບູນ ເໝາະແກ່ການລົງທຶນໃນຂະແໜງການກະສິກຳ ພະລັງງານໄຟຟ້າ ການທ່ອງທ່ຽວ ຂົນສົ່ງ ແລະ ອື່ນໆ.
ທ່ານ ເຊ້ຍເກິ່ງ ກ່າວວ່າ: ນັກທຸລະກິດໃນແຂວງຊານຕົ້ງ ທີ່ເປັນແຂວງທີ່ມີເສດຖະກິດຂະໜາດໃຫຍ່ອັນດັບ 3 ຂອງ ສປ ຈີນ ໃນປີ 2014 ມີລວມຍອດຜະລິດຕະພັນພາຍໃນ (GDP) 5.940 ຕື້ຢວນ ມີຄວາມສົນໃຈກັບນັກທຸລະກິດໃນ ສປປ ລາວ ຫຼາຍຂະແໜງການດ້ວຍກັນ ເປັນຕົ້ນແມ່ນເຂດເສດຖະກິດສະເພາະບຶງທາດຫຼວງ ທີ່ມີນັກທຸລະກິດຈີນເປັນຜູ້ພັດທະນາ ໂດຍລັດຖະບານຈີນ ມີຍຸດທະສາດແນວທາງການຮ່ວມມືກັບບັນດາປະເທດອ້ອມຂ້າງ ລວມທັງລາວ ປະກອບມີ 3 ຢ່າງຄື: ສ້າງກົນໄກການຮ່ວມມືສະໜັບສະໜູນພາກລັດ ຮ່ວມກັບສະພາການຄ້າສະມາຄົມກັບ ສປປ ລາວ ເພີ່ມທະວີການເຊື່ອມຕໍ່ກະສິກຳ ອຸດສາຫະກຳ ການຜະລິດ ກະເສດ ເຄື່ອງຈັກ ແລະ ພັດທະນາດ້ານອຸດສາຫະກຳ ແລະ ສະໜັບສະໜູນສາຍການບິນຊານຕົ້ງ-ສປປ ລາວ ທີ່ຈະເປັນການເຊື່ອມຕໍ່ດ້ານເສດຖະກິດທີ່ສຳຄັນຂອງແຂວງຊານຕົ້ງເຖິງ ສປປ ລາວ ໂດຍກົງ.
ແຫລ່ງຂ່າວ: ວຽງຈັນໃໝ່