ສຳມະນາຫົວຂໍ້ “ພັດທະນາວາລະສານອະລຸນໃໝ່ໃຫ້ມີຄຸນະພາບ ສືບຕໍ່ເປັນອົງການທິດສະດີ ແລະ ພຶດຕິກຳຂອງພັກ” ເນື່ອງໃນໂອກາດລະນຶກວັນສ້າງຕັ້ງ ວາລະສານອະລຸນໃໝ່ ຄົບຮອບ 30 ປີ (22/3/1955-22/3/2015) ໄດ້ຈັດຂຶ້ນວັນທີ 30 ມີນາ 2015 ຢູ່ຄະນະໂຄສະນາອົບຮົມສູນກາງພັກ ໂດຍເປັນປະທານຂອງທ່ານ ດຣ. ບົວຈັນ ເພັງສະຫວັດ ຮອງຫົວໜ້າຄະນະໂຄສະນາອົບຮົມສູນກາງພັກ ບັນນາທິການໃຫຍ່ ວາລະສານອະລຸນໃໝ່ ມີທ່ານ ສຈ.ດຣ. ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ ທ່ານ ສະຫວັນຄອນ ຣາຊມົນຕຣີ ລັດຖະມົນຕີຊ່ວຍວ່າການກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາອະດີດບັນນາທິການໃຫຍ່ ວາລະສານອະລຸນໃໝ່ ແລະ ແຂກຖືກເຊີນເຂົ້າຮ່ວມ.
ວາລະສານອະລຸນໃໝ່ ໄດ້ສ້າງຕັ້ງຂຶ້ນໂດຍສືບທອດມາຈາກໜັງສືພິມ “ແສງສະຫວ່າງ” ຂອງພັກ ໃນເມື່ອກ່ອນຕາມມະຕິຕົກລົງ ສະບັບເລກທີ 12/ຄລສພ ລົງວັນທີ 8 ກຸມພາ 1985 ອະລຸນໃໝ່ ເປັນວາລະສານທິດສະດີການເມືອງ ແລະ ພຶດຕິກຳຂອງພັກປະຊາຊົນປະຕິວັດລາວ ຊີ້ນຳ-ນຳພາໂດຍກົງ ແລະ ຮອບດ້ານຂອງຄະນະໂຄສະນາອົບຮົມສູນກາງພັກ ມີພາລະບົດບາດຄົ້ນຄວ້າເຜີຍແຜ່ ແລະ ສະຫຼຸບຖອດຖອນບົດຮຽນກ່ຽວກັບທິດສະດີມາກ-ເລນິນ ແນວທາງການເມືອງ ນະໂຍບາຍ ແລະ ພຶດຕິກຳຂອງພັກ ລະບຽບກົດໝາຍຂອງລັດໃນແຕ່ລະໄລຍະ ຄົ້ນຄວ້າເຜີຍແຜ່ບົດຮຽນຂອງພັກ ແລະ ລັດປະເທດເພື່ອນມິດ ໂດຍສະເພາະ ການປັບປຸງ-ກໍ່ສ້າງພັກ ການຄຸ້ມຄອງລັດ ແລະ ການພັດທະນາເສດຖະກິດ-ສັງຄົມຂອງບັນດາປະເທດສັງຄົມນິຍົມ ວາລະສານອະລຸນໃໝ່ ເປັນວາລະສານລາຍ 2 ເດືອນ (6 ສະບັບຕໍ່ປີ) ມາຮອດປີ 2003 ໄດ້ປ່ຽນມາເປັນລາຍເດືອນເຄິ່ງ (8 ສະບັບຕໍ່ປີ) ແລະ ມີແຜນຈະປ່ຽນມາເປັນລາຍເດືອນ (12 ສະບັບຕໍ່ປີ) ໃນໄວໆນີ້.
ທ່ານ ດຣ. ບົວຈັນ ເພັງສະຫວັດ ໄດ້ກ່າວວ່າ: ສຳມະນາຄັ້ງນີ້ ເປັນການປັບປຸງພາຍໃນໃຫ້ມີຄວາມໜັກແໜ້ນເຂັ້ມແຂງ ເພື່ອໃຫ້ທົ່ວພັກ ທົ່ວລັດ ແລະ ສັງຄົມ ໄດ້ເຂົ້າໃຈເຖິງບົດບາດຄວາມສຳຄັນຂອງວາລະສານອະລຸນໃໝ່ ໃນນີ້ຈະໄດ້ພ້ອມກັນຮັບຟັງ ແລະ ປະກອບຄຳເຫັນໃສ່ເນື້ອໃນ 6 ຫົວຂໍ້ ຄື: 30 ປີ ແຫ່ງການເຕີບໃຫຍ່ຂະຫຍາຍຕົວຂອງວາລະສານອະລຸນໃໝ່ ພັດທະນາວາລະສານອະລຸນໃໝ່ໃຫ້ມີຄຸນະພາບ ສືບຕໍ່ເປັນອົງການທິດສະດີ ແລະ ພຶດຕິກຳຂອງພັກ ການເຄື່ອນໄຫວຂອງສື່ມວນຊົນພາຍໃຕ້ການນຳພາຂອງພັກ ແລະ ຄຸ້ມຄອງຂອງລັດ ບາງບົດຮຽນໃນການສ້າງເພື່ອນຮ່ວມງານປະຈຳ ແລະ ຜູ້ຂຽນປະຈຳຄໍລຳ ບາງບົດຮຽນໃນການກໍ່ສ້າງພະນັກງານບັນນາທິການ ໃຫ້ມີຄຸນະພາບສາມາດຕອບສະໜອງໜ້າ ທີ່ການເມືອງຂອງພັກໃນແຕ່ລະໄລຍະ ບົດຮຽນກ່ຽວກັບການໂຄສະນາເຜີຍແຜ່ ແລະ ເສີມຂະຫຍາຍຜົນສຳເລັດ ຂອງການຄົ້ນຄວ້າວິທະຍາສາດໃນວາລະສານ.
ແຫລ່ງຂ່າວ: ວຽງຈັນໃໝ່