ຂ່າວລາວພັດທະນາ: ຜົນລາຍງານການວິໄຈສະພາບໄວໜຸ່ມຄັ້ງທຳອິດຂອງ ສປປ ລາວໄດ້ມີຂຶ້ນເພື່ອຮັບຮູ້ ແລະ ເຂົ້າໃຈບັນດາປັດໄຈຕ່າງໆທີ່ມີຜົນກະທົບຕໍ່ຊີວິດການເປັນຢູ່ຂອງໄວໜຸ່ມ ທັງດ້ານບວກ ແລະ ດ້ານລົບ ເພື່ອໄຈ້ແຍກຂົງເຂດບູລິມະສິດໃນການປະຕິບັດ, ປັບປຸງຊີວິດຂອງໄວໜຸ່ມໃຫ້ດີຂຶ້ນ ແລະ ສາມາດປະກອບສ່ວນເຂົ້າໃນການພັດທະນາເສດຖະກິດ -ສັງຄົມຂອງປະເທດຊາດໃນປັດຈຸບັນ ແລະ ອານະຄົດ.
ພິທີນຳສະເໜີບົດລາຍງານດັ່ງກ່າວໄດ້ມີຂຶ້ນໃນວັນທີ 23 ມີນານີ້, ຢູ່ນະຄອນຫຼວງວຽງຈັນ, ໂດຍ ການເຂົ້າຮ່ວມ ຂອງທ່ານ ລີຕູ ບົວປາວ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ, ທ່ານ ຄຳຜາ ພິມມະສອນ ຄະນະບໍລິ ຫານງານສູນກາງຊາວໜຸ່ມ ປະຕິວັດລາວ.
ທ່ານ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ ໃຫ້ຮູ້ວ່າ: ສປປ ລາວ ເປັນໜຶ່ງໃນປະເທດທີ່ມີປະ ຊາກອນໄວໜຸ່ມຫຼາຍໃນຂົງເຂດອາຊີຕາເວັນອອກສຽງໃຕ້, ປະຊາກອນໄວໜຸ່ມທີ່ມີອາຍຸຕໍ່າກ່ວາ 25 ປີ ມີຫຼາຍກ່ວາ 6 ລ້ານຄົນ ເທົ່າກັບ 60% ແລະ ເດັກຍິງທີມີອາຍຸ 15-19 ປີ ມີອັດຕາຖືພາປະມານ 94 ຄົນ ໃນ 1 ພັນຄົນ, ເປັນໜຶ່ງໃນປະເທດ ພາກ ພື້ນທີ່ມີອັດຕາການຖືພາ ແລະ ເກີດລູກໃນໄວເດັກສູງ, ເຖິງແມ່ນວ່າໄວໜຸ່ມຈຳນວນຫຼາຍມີຄວາມຮູ້ກ່ຽວກັບວິທີຄຸມ
ກຳເນີດແບບທັນສະໄໝ, ແຕ່ການນຳໃຊ້ວິທີດັ່ງກ່າວແມ່ນຍັງຕໍ່າ, ອາດຍ້ອນຫຼາຍປັດໄຈເຊັ່ນ: ຂໍ້ກຳຈັດໃນການ ເຂົ້າເຖິງ ຂໍ້ມູນຂ່າວສານ, ບໍລິການດ້ານສຸຂະພາບທາງເພດ, ສຸຂະພາບຈະເລີນພັນ ຈຶ່ງເຮັດໃຫ້ເກີດມີເພດ ສຳພັນແບບບໍ່ຕັ້ງໃຈ, ບໍ່ ປ້ອງກັນ ແລະ ເອົາລູກອອກທີ່ບໍ່ປອດໄພ ຈຶ່ງມີຄວາມສ່ຽງສູງໃນການຕິດຕໍ່ພະຍາດທາງເພດສຳພັນ. ການແຕ່ງງານ ຫຼື ການຖືພາໃນໄວເດັກມີຜົນກະທົບຮ້າຍແຮງຕໍ່ຊີວິດ ແລະ ອະນາຄົດຂອງໄວໜຸ່ມໂດຍສະເພາະແມ່ນເພດຍິງ, ເຊິ່ງເປັນສິ່ງ ກີດຂວາງການສຶກສາ, ການມີວຽກເຮັດງານທຳ, ໂອກາດ ແລະ ການປະກອບສ່ວນເຂົ້າໃນຊຸມຊົນຂອງເຂົາເຈົ້າ, ຖ້າ ໄວໜຸ່ມຍິງທີ່ອາໄສຢູ່ເຂດຊົນນະບົດໄດ້ເຂົ້າໂຮງຮຽນ, ສາມາດເຂົ້າເຖິງຂໍ້ມູນຂ່າວສານ, ການບໍລິການດ້ານສຸຂະພາບທາງເພດ, ຈະເລີນພັນ ແລະ ການວາງແຜນ ຄອບຄົວແມ່ນມີຄວາມສຳຄັນທີ່ສຸດສຳລັບເຂົາເຈົ້າ.
ໄວໜຸ່ມອາຍຸລະຫວ່າງ 10-24 ປີ ເປັນຈຸດໃຈກາງສຳຄັນໃນການບັນລຸເປົ້າ ໝາຍສະຫະສະວັດແຫ່ງການພັດທະນາ ແລະ ຮັບປະກັນວ່າ ສປປ ລາວ ຈະສາມາດ ໄດ້ຮັບຜົນປະໂຫຍດຢ່າງຫຼວງຫຼາຍໃນການພັດທະນາເສດຖະກິດຈາກການ ເຊື່ອມໂຍງກັບປະຊາຄົມເສດຖະກິດອາຊຽນ ແລະ ບັນລຸເປົ້າໝາຍແຫ່ງຊາດໃນການຫຼຸດພົ້ນ ອອກຈາກປະເທດ ທີ່ດ້ອຍພັດ ທະນາປີ 2020. ເດັກນ້ອຍໃນມື້ນີ້ຈະກາຍເປັນຜູ້ໃຫຍ່ໃນອະນາຄົດ ດັ່ງນັ້ນ 5 ຂົງເຂດວຽກງານເຊັ່ນ: ສຸຂະພາບ, ການສຶກສາ, ການມີວຽກເຮັດງານທຳ, ການປົກປ້ອງ ແລະ ການມີສ່ວນຮ່ວມ ຈຶ່ງເປັນວຽກງານສຳຄັນສາມາດຮັບປະກັນໄດ້ວ່າທຸກ ຄົນຈະ ບັນລຸເປົ້າໝາຍຕາມຄວາມສາມາດຂອງຕົນ ແລະ ຕອບສະໜອງຄວາມຕ້ອງການໄດ້ຢ່າງຈະແຈ້ງ.