ເຮືອບິນເຢຍລະມັນວິງສ໌ ທ່ຽວບິນ 4U9525 ຕົກທີ່ສາຍພູແອລຟ໌ ມື້ນີ້ ວັນທີ 24 ມີນາ 2015  ສຳນັກຂ່າວໃນປະເທດຝຣັ່ງລາຍງານວ່າ ເກີດເຫດເຮືອບິນແອບັດ ເອ 320 ຂອງສາຍການບິນເຢຍລະມັນວິງສ໌ ແອໄລ ທ່ຽວບິນ 4U9525 ໄດ້ປະສົບອຸບັດເຫດໃນເຂດສາຍພູແອລຟ໌ ທາງຕອນໃຕ້ຂອງປະເທດຝຣັ່ງ ໃກ້ກັບເມືອງດິນເຢ່ ມີລາຍງານວ່າສັນຍານຂອງທ່ຽວບິນທີ່ເກີດເຫດ ໄດ້ຫາຍໄປເມື່ອເວລາ 09:41 ຂອງມື້ນີ້ ຕາມເວລາໃນທ້ອງຖິ່ນ ເຊິ່ງກົງກັບເວລາ 4:41 ນາທີ ຂອງປະເທດລາວ. ທັງນີ້ສຳນັກຂ່າວເອເອຟພີລາຍງານວ່າທ່ຽວບິນດັ່ງກ່າວ ບິນຈາກເມືອງບາເຊໂລນ່າຂອງສະເປນ ແລະມີຈຸດໝາຍປາຍທາງທີ່ເມືອງ ດຸສເຊນດອບຂອງເຢຍລະມັນ ມີຜູ້ໂດຍສານ 142 ຄົນ ແລະຈຸບິນອີກ 6 ຄົນ ເຊິ່ງປະທານາທິບໍດີ ຟຣັງຊົວ ອາວລອງ ຂອງຝຣັ່ງ ເປີດເຜີຍກັບສຳນັກຂ່າວ ເອເອຟພີວ່າ ບໍ່ມີຜູ້ລອດຊີວິດຈາກເຫດການນີ້.