ຍອມຮັບຜິດ! ສິຕີວີ່ຈີ ຂໍໂທດຫຼັງຈາກ ຖືກໃບແດງ ໃນເວລາອັນສຸດໄວວາ

ສະຕີເວັ່ນ ເຈີຣ໌ຣາຣ໌ດ ມິດຟິລດ໌ ລີເວີຣ໌ພູລ ກົ້ມໜ້າຂໍໂທດ ທຸກຝ່າຍຫຼັງຈາກທີ່ຖືກໃບແດງ ຢ່າງໄວວາໃນເກັມ ທີ່ຕົ້ນສັງກັດພ່າຍ ແມນເຊັສເຕີ ຢູໄນເຕັດ 1-2 ເມື່ອວັນອາທິດທີ່ຜ່ານມາ ພ້ອມແຈ້ງຕອນນັ້ນພະຍາຍາມກະໂດດໜີການເຂົ້າສະກັດຂອງ ອັນເດຣ໌ ເອຣ໌ເຣຣ່າ ກອງກາງ “ຜີສາດແດງ” ແຕ່ເຮັດພາດ

ສະຕີເວ່ນ ເຈີຣ໌ຣາຣ໌ດ ກອງກາງກັບຕັນທີມ ລີເວີຣ໌ພູລ ຍອດສະໂມສອນແຫ່ງວົງການ ພຣີເມຍລີກ ອັງກິດ ກ່າວຂໍໂທດເພື່ອນຮ່ວມທີມ ແລະ ແຟນບານ ຈາກການທີ່ ລາວຖືກໃບແດງ ໃນເກັມລີກນັດ “ແດງເດືອດ” ທີ່ທັບ “ຫົງແດງ” ພ່າຍແພ້ ແມນ.ຢູໄນເຕັດ 1-2 ຄາບ້ານ ເມື່ອວັນອາທິດ ທີ່ 22 ມີນາ 2015 ທີ່ຜ່ານມາ

ເກັມນີ້ເຈີ້ຣ໌ຣາຣ໌ດ ເລີ່ມຕົ້ນດ້ວຍການເປັນໂຕສໍາຮອງ ແລະ ລາວກໍ່ຖືກປ່ຽນລົງໄປແທນ ອະດໍາ ລັລລານ່າ ໃນຊ່ວງ ພັກເຄິ່ງທໍາອິດ ແຕ່ຫຼັງຈາກລົງໄປຫຼິ້ນໄດ້ຍັງບໍ່ຮອດ 1 ນາທີ ລາວກໍ່ໄປຢຽບໃສ່ທາງ ອັນເດຣ໌ ເອຣ໌ເຣຣ່າ ມິດຟິລດ໌ ຊາວສະເປນ ຂອງຄູ່ແຂ່ງ ຈົນຮັດໃຫ້ໄດ້ຮັບໃບແດງ ຈາກກໍາມະການຕັດສິນ ມາຣ໌ຕິນ ແອ໊ກກິນສັນ ແລະ ອອກຈາກສະໜາມ ທັນທີ!

ນັກເຕະໄວ 34​ປີ ໃຫ້ສໍາພາດກັບ ສະກາຍ ສະປອຣ໌ຕສ໌ ສື່ກິລາຊື່ດັງຂອງເມື່ອງຜູ້ດີວ່າ “ ຂ້າພະເຈົ້າຕ້ອງຍອມຮັບມັນ ມັນເປັນການຕັດສິນໃຈທີ່ຖືກຕ້ອງແລ້ວ ມື້ນີ້ຂ້າພະເຈົ້າ ເຮັດໃຫ້ເພື່ອນຮ່ວມທີມ ແລະ ຜູ້ຈັດການທີມຜິດຫວັງ ແລະ ທີ່ສໍາຄັນກວ່ານັ້ນຄື ເຮັດໃຫ້ແຟນບານທຸກຄົນຕ້ອງຜິດຫວັງ ແລະ ຂ້າພະເຈົ້າຂໍຮັບຜິດຊອບ ຕໍ່ການກະທໍາຂອງຕົນເອງຢ່າງເຕັມທີ່”

“ຂ້າພະເຈົ້າພະຍາຍາມກະໂດດໜີການເຂົ້າສະກັດຂອງລາວ (ເອຣ໌ເຣຣ່າ), ຂ້າພະເຈົ້າເຫັນການສະກັດຂອງລາວ ແລະ ຕອບສະໜອງໄປແບບຜິດໆ ຂ້າພະເຈົ້າຢູໃນວົງການນີ້ມາດົນນານຫຼາຍພໍ (ທີ່ຈະຮູ້ວ່າມັນຈະເກີດຫຍັງຂຶ້ນ) ຖ້າຫາກວ່າທ່ານເຮັດແບບນັ້ນລົງໄປ ແລະ ໂດຍສະເພາະຢ່າງຍິ່ງໃນຊ່ວງນັ້ນຂອງເກັມ, ໃນຊ່ວງພັກເຄິ່ງທີ່ຍັງເຫຼືອເວລາໃຫ້ຫຼິ້ນອີກ 45ນາທີ ແລະ ມີໂອກາດຍອດຢ່ຽມທີ່ຈະກັບມາໄດ້ແລ້ວນັ້ນ ຂ້າພະເຈົ້າຂໍຮັບຜິດຊອບຢ່າງເຕັມທີ່” ອາດີດມິດຟິລດ໌ທີມຊາດ ອັງກິດ ລະບຸ.