ພາຍຫລັງການກໍ່ຕັ້ງລັດວິສາຫະກິດຖືຮຸ້ນລາວ(ລຮລ)ໄດ້ 10 ປີພໍດີ ການດຳເນີນທຸລະກິດໃນໄລຍະຜ່ານມາ ປະສົບຜົນສຳເລັດເປັນຢ່າງດີ ໂດຍສະເພາະໄດ້ບັນລຸການລະດົມທຶນຮຸ້ນຂອງຕົນຈຳນວນ 536 ລ້ານກວ່າໂດລາສະ ຫະລັດ ເພື່ອປະກອບສ່ວນເປັນເງິນຮຸ້ນໃນ 4 ໂຄງການດ້ານພະລັງງານຄື ໂຄງການໄຟຟ້ານ້ຳເທີນ 2 ຈຳນວນ 112 ລ້ານກວ່າໂດລາສະຫະລັດ, ໂຄງການໄຟຟ້າຄວາມຮ້ອນຫົງສາ 220 ລ້ານກວ່າໂດລາສະຫະລັດ, ໂຄງການເຊປຽນ-ເຊນ້ຳນ້ອຍ 100 ລ້ານກວ່າໂດລາສະຫະລັດ ແລະ ໂຄງການໄຟຟ້ານ້ຳງຽບ 1 ຈຳນວນ 103 ລ້ານກວ່າໂດລາສະຫະລັດ. ນອກນີ້, ຕົ້ນປີ 2014 ຍັງໄດ້ຮັບມອບໝາຍຈາກລັດຖະບານ ໃຫ້ດຳເນີນທຸລະກິດຂີ້ເທົ່າລອຍ ຢູ່ໂຄງການໄຟຟ້າຫົງສາປັດຈຸບັນ ລຮລ ໄດ້ກຽມຄວາມພ້ອມເພື່ອປະຕິບັດໜ້າວຽກດັ່ງກ່າວໃນກາງປີ 2015D
ໃນໂອກາດສະເຫລີມສະຫລອງຄົບຮອບ10 ຄັ້ງນີ້ ໄດ້ຮັບກຽດເຂົ້າຮ່ວມຂອງທ່ານ ສົມສະຫວາດ ເລັ່ງສະ ຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດຂົງເຂດການຜະລິດ ແລະ ຈໍລະຈອນ. ໂດຍທ່ານ ດຣ. ສົມ ບູນ ມະໂນລົມ ປະທານລັດວິສາຫະກິດຖືຮຸ້ນລາວ ໄດ້ຍົກໃຫ້ເຫັນຜົນສຳເລັດການດຳເນີນທຸລະກິດໃນໄລຍະ 10 ປີຜ່ານມາ ເຊິ່ງມີການເຕີບ
ໃຫຍ່ຂະຫຍາຍຕົວ ແລະ ມີຄວາມເຂັ້ມແຂງທາງດ້ານປະລິມານ ແລະ ຄຸນນະພາບ ໂດຍສະເພາະການປະກອບທຶນເປັນຮຸ້ນໃນ 4 ໂຄງການໃຫຍ່ດັ່ງກ່າວ.ສຳລັບໂຄງການໄຟຟ້ານ້ຳເທີນ 2 ມີກຳລັງຕິຕັ້ງ 1.080 ເມກາວັດ ລຮລ ຖືຮຸ້ນ 25%, ເຊິ່ງໄດ້ສຳເລັດການກໍ່ສ້າງ ແລະ ດຳເນີນການຜະລິດໄຟຟ້າຂາຍຢ່າງເປັນທາງການໃນຕົ້ນປີ 2010, ຄາດຄະເນໄລຍະສຳປະທານ 25 ປີ ລັດຖະບານຈະມີລາຍຮັບເກືອບ 2.000 ລ້ານກວ່າໂດລາສະຫະລັດ ຈາກໂຄງການນີ້ ແລະ ລຮລ ກໍຈະໄດ້ຮັບເງິນປັນຜົນ ປະມານ 723 ລ້ານກວ່າໂດລາສະຫະລັດ. ສະເພາະແຕ່ປີ 2011-2014 ລຮລ ໄດ້ຮັບເງິນປັນຜົນຈຳນວນ 98 ລ້ານກວ່າໂດລາສະຫະລັດ, ໃນນັ້ນໄດ້ມອບພັນທະໃຫ້ລັດຖະບານ 60 ລ້ານກວ່າໂດລາສະຫະລັດ , ໃນຂະນະທີ່ພາກລັດຖະບານ ກໍໄດ້ຮັບເງິນຄ່າພາກຫລວງ 2009-2015 ຈຳນວນ 62 ລ້ານກວ່າໂດລາສະຫະລັດ, ລວມເງິນທັງໝົດທີ່ໄດ້ຮັບຈາກໂຄງການນ້ຳເທີນ 2 ປະມານ 160ລ້ານກວ່າໂດລາສະຫະລັດ.
ສ່ວນອີກ 3 ໂຄງການທີ່ກຳລັງດຳເນີນການກໍ່ສ້າງຄື: ໂຄງການໄຟຟ້າຄວາມຮ້ອນຫົງສາ ມີກຳລັງຕິດຕັ້ງ 1.878 ເມກາວັດ , ລຮລ ຖືຮຸ້ນ 20% ຕາມແຜນການຈັກເບີ 1 ຈະໃຫ້ສຳເລັດໃນກາງປີ, ຈັກເບີ 2 ຈະສຳເລັດທ້າຍປີ 2015 ແລະ ຈັກເບີ 3 ຈະສຳເລັດໃນຕົ້ນປີ 2016, ສ່ວນຄວາມຄືບໜ້າການກໍ່ສ້າງທັງໝົດກວ່າ 94%; ໂຄງການເຊປຽນ-ເຊນ້ຳນ້ອຍ ມີກຳລັງຕິດຕັ້ງ 410 ເມກາວັດ ລຮລ ຖືຮຸ້ນ 24%, ການກໍ່ສ້າງມາຮອດປັດຈຸບັນຄືບໜ້າແລ້ວ 12% ແລະ ຄາດວ່າຈະສ້າງສຳເລັດໃນຕົ້ນປີ 2019, ສ່ວນໂຄງການໄຟຟ້ານ້ຳງຽບ 1 ມີກຳລັງຕິດຕັ້ງ 290 ເມກາວັດ ລຮລ ຖືຮຸ້ນ 25%, ປັດຈຸບັນການກໍ່ສ້າງສຳເລັດແລ້ວກວ່າ 8%, ລວມກຳລັງຕິດຕັ້ງທັງ 4 ໂຄງການມີ 3.658 ເມກາວັດ , ລວມມູນຄ່າການກໍ່ສ້າງທັງໝົດ 6.900 ລ້ານກວ່າໂດລາສະຫະລັດ, ເມື່ອງສ້າງສຳເລັດທຸກໂຄງການ ຈະສາມາດຜະລິດໄຟຟ້າໄດ້ ປະມານ 21.215 ລ້ານກິໂລວັດໂມງ/ປີ ເຊິ່ງເຮັດໃຫ້ ລຮລ ມີທຶນປະກອບເຖິງ 536 ລ້ານກວ່າໂດລາສະຫະລັດ. ຄຽງຄູ່ການດຳເນີນທຸລະກິດຕາມພາລະບົດບາດ ແລະ ໜ້າທີ່ແລ້ວ ໄລຍະ 10 ຜ່ານມາ ລຮລ ຍັງໄດ້ປະກອບສ່ວນຊ່ວຍເຫລືອສັງຄົມ ທັງປະກອບສ່ວນໃນວັນສຳຄັນຂອງຊາດ ມີມູນຄ່າ 1,7 ຕື້ກວ່າກີບ.
ໂອກາດນີ້ ທ່ານຮອງນາຍົກລັດຖະມົນຕີ ໄດ້ຕາງໜ້າລັດຖະບານ ໃຫ້ກຽດປະດັບຫລຽນໄຊແຮງງານຊັ້ນ I ໃຫ້ ກົມກອງລວມໝູ່ ລຮລ, ພ້ອມນີ້ພະນັກງານການນຳ ແລະ ພະນັກງານວິຊາການຜູ້ມີຜົນງານດີເດັ່ນ ໃນການປະຕິບັດ ໜ້າທີ່ກໍໄດ້ຮັບຫລຽນກາແຮງງານ ແລະ ໃບຍ້ອງຕາມລຳດັບ.
ແຫລ່ງຂ່າວ: ລາວພັດທະນາ