ປະທານາທິບໍດີເວເນຊູເອລາ ທ່ານ ນິໂກລັສ ມາດູໂຣ ໄດ້ຮັບອຳນາດສັ່ງການພິເສດຈາກລັດຖະສະພາເວເນຊູເອລາ ເພື່ອຕອບໂຕ້ສະຫະລັດອາເມຣິກາ ໃນມື້ວັນອາທິດທີ 15 ມີນາຜ່ານມານີ້ ຫລັງຈາກທີ່ເວເນຊູເອລາ ຖືປະທານາທິບໍດີ ບາຣັກ ໂອບາມາ ປະກາດຂວ້ຳບາດ ແລະ ຍັງຖືເວເນຊູດເອລາ ເປັນໄພຄຸກຄາມຕໍ່ຄວາມໝັ້ນຄົງຂອງສະຫະລັດອາເມຣິກາ.
ອຳນາດສັ່ງການພິເສດດັ່ງກ່າວ ແມ່ນເນື່ອງຈາກ ທ່ານ ນິໂກລັສ ມາດູໂຣ ໄດ້ສະເໜີກົດໝາຍ ” ຕໍ່ຕ້ານຈັກກະພັດນິຍົມ ” ເຂົ້າສູ່ລັດຖະສະພາເວເນຊູເອລາໄປກ່ອນໜ້ານີ້ ເຊິ່ງທາງລັດຖະສະພາກໍໄດ້ມີມະຕິເຫັນດີ ຜ່ານກົດໝາຍຕໍ່ຕ້ານຈັກກະພັດນິຍົມສະບັບດັ່ງກ່າວແລ້ວ ໃນມື້ວັນອາທິດທີ 15 ມີນາຜ່ານມາ ໂດຍກົດໝາຍສະບັບດັ່ງກ່າວນີ້ ໄດ້ມອບອຳນາດໃຫ້ປະທານາທິບໍດີເວເນຊູເອລາ ໃຊ້ຄຳສັ່ງທາງການທະຫານໄດ້ທັນທີ ໃນບັນຫາທີ່ກ່ຽວຂ້ອງກັບຄວາມໝັ້ນຄົງຂອງປະເທດ.
ທັງນີ້ ປະທານາທິບໍດີ ມາດູໂຣ ຕ້ອງການອຳນາດສັ່ງການດັ່ງກ່າວ ໃນຖານະປະທານາທິບໍດີເວເນຊູເອລາ ເພື່ອຕອບໂຕ້ສະຫະລັດອາເມຣິກາ ທີ່ປະກາດຂວ້ຳບາດຕໍ່ເຈົ້າໜ້າທີ່ລັດຖະບານເວເນຊູເອລາ ລວມໄປເຖິງການປະຕິເສດໃຫ້ວີຊ່າເຂົ້າປະເທດອາເມຣິກາ ແລະ ການຍຶດຊັບສິນຊາວເວເນຊູເອລາ ເຊິ່ງທ່ານ ມາດູໂຣ ອ້າງວ່າເປັນການລະເມີດສິດທິມະນຸດ.
ເວເນຊູອູລາ ພາຍໃຕ້ການນຳຂອງລັດຖະບານທີ່ມີແນວຄິດອຽງຊ້າຍ ຝັກໄຝ່ລັດທິສັງຄົມນິຍົມ ອັນໄດ້ຮັບແຮງສະໜັບສະໜູນຈາກປະຊາຊົນຊາວເວເນຊູເອລາມາແລ້ວຫລາຍສະໄໝນັ້ນ ໄດ້ຖືກທາງການສະຫະລັດ ກໍ່ຄວາມພະຍາຍາມທີ່ຈະໂຄ່ນລົ້ມລັດຖະບານຊຸດດັ່ງກ່າວນີ້ ດ້ວຍການແຊກແຊງປັ່ນປ່ວນທາງດ້ານການເມືອງ ໂດຍທາງການສະຫະລັດເອງກໍປະຕິເສດ ຕໍ່ການກ່ຽວຂ້ອງກັບເລື່ອງດັ່ງກ່າວມາຕະຫລອດ. ແນວໃດກໍຕາມ, ຫລັງຈາກກົດໝາຍຕ້ານຈັກກະພັດນິຍົມ ຂອງເວເນຊູເອລາຜ່ານລັດຖະສະພາອອກມາແລ້ວ ມວນຊົນຊາວເວເນຊູເອລາ ກໍໄດ້ພາກັນອອກມາເດີນຂະບວນສະໜັບສະໜູນ ເພື່ອສະແດງຄວາມສາມັກຄີ ຕໍ່ຕ້ານຈັກກະພັດອາເມຣິກາ ໂດຍທ່ານ ມາດູໂຣ ໄດ້ກ່າວປາໄສຕອນໜຶ່ງວ່າ ” ເຖິງແມ່ນອາເມຣິກາຈະມີເງິນໂດລາ ແລະພະລັງທາງສື່ມວນຊົນ ແຕ່ສະຫະລັດອາເມຣິກາ ບໍ່ມີສິ່ງໜຶ່ງທີ່ເຮົາຊາວເວເນຊູເອລາມີ ຄືພະລັງແຫ່ງຄວາມຊື່ສັດ ເຊິ່ງກົດໝາຍສະບັບນີ້ ຈະມອບອຳນາດໃຫ້ແກ່ຂ້າພະເຈົ້າ ເພື່ອປົກປ້ອງສັນຕິພາບ ແລະ ເວເນຊູເອລາ “