ຫວຽດນາມຈະສ້າງຫໍຄອຍໂທລະພາບ ສູງທີ່ສຸດໃນໂລກ ກາຍຫໍຄອຍທີ່ສູງທີ່ສຸດໃນໂລກປັດຈຸບັນ ຢູ່ປະເທດຍີ່ປຸ່ນ 2 ແມັດ.
ສຳນັກຂ່າວຕ່າງປະເທດ ລາຍງານໃນວັນທີ 13 ມີນາຜ່ານມານີ້ວ່າ ທ່ານ ເຈິ່ນ ບິ່ງ ມິງ ຜູ້ອຳນວຍການໃຫຍ່ ສະຖານີໂທລະພາບ VTV ຂອງຫວຽດນາມ ໄດ້ຫາລືກັບນາຍົກລັດຖະມົນຕີ ກ່ຽວກັບການກໍ່ສ້າງຫໍຄອຍໂທລະພາບ ໂດຍຜູ້ນຳຂອງຫວຽດນາມລະບຸວ່າ ຫໍຄອຍໂທລະພາບຈະຕ້ອງສູງທີ່ສຸດໃນພາກພື້ນອາຊີ ແລະ ຈະເປັນຫໍຄອຍທີ່ສູງທີ່ສຸດໃນໂລກ ເພາະຫໍຄອຍທີ່ສູງທີ່ສຸດໃນໂລກນັ້ນ ແມ່ນຕັ້ງຢູ່ໃນປະເທດຍີ່ປຸ່ນ ແລະ ອັນດັບທີ 2 ແມ່ນຢູ່ປະເທດຈີນ.
ທ່ານ ເຈິ່ນ ບິ່ງ ມິງ ກ່າວວ່າ ຫໍຄອຍທີ່ຈະສ້າງໃໝ່ນີ້ແມ່ນຈະມີຄວາມສູງ 636 ແມັດ ເຊິ່ງໂຄງການກໍ່ສ້າງຫໍຄອຍໂທລະພາບນີ້ ຈະເປັນວຽກງານອັນສຳຄັນໃນການພັດທະນາວຽກງານໂທລະພາບຂອງຫວຽດນາມ ອັນຈະສົ່ງຜົນໃນທາງບວກຕໍ່ພາກການທ່ອງທ່ຽວ, ການລົງທຶນ ແລະ ສັງຄົມ ອີກທັງຍັງຈະກາຍເປັນສະຖາປັດຕະຍະກຳອັນໂດດເດັ່ນຂອງນະຄອນຫລວງຮ່າໂນ້ຍອີກດ້ວຍ.