ການທີ່ຈະເຝິກໃຫ້ເດັກນ້ອຍໜຶ່ງຄົນນັ່ງລົງແລະຕັ້ງໃຈອ່ານຫນັງສືເປັນເລື່ອງເປັນລາວບໍ່ແມ່ນເລື່ອງງ່າຍເລີຍໂດຍສະເພາະເມື່ອລູກມີສິ່ງອື່ນລໍ້ໃຈເຊັ່ນ:ຄອມພິວເຕີ,ເກມ,ໂທລະພາບຫລືເມື່ອລູກຢາກອອກໄປຫລິ້ນທາງນອກເຮົາມີເຖິງ10ວິທີທີ່ຈະຊ່ວຍຈູງໃຈໃຫ້ລູກທີ່ບໍ່ມັກອ່ານຫນັງສືຂອງເຈົ້າໃຫ້ມີນິໄສຮັກການອ່ານມາຝາກແລະໜ້າຈະຊ່ວຍໃຫ້ພວກເຂົາມີນິໄສຮັກການອ່ານໄປຕະຫລອດຊີວິດເລີຍກໍວ່າໄດ້
ຜູ້ຄົນມັກຄິດວ່າສ່ວນຫລາຍແລ້ວຄົົນທີ່ມີອາຍຸເທົ່ານັ້ນຈະເປັນທີ່ຈະມັກອ່ານຫນັງສືຄົນລຸ້ນຫລັງມັກໃຊ້ເວລາກັບການຫລິ້ນເກມຫລືກິດຈະກຳອື່ນໆຫລິ້ນiPod iPad ຫລືອຸປະກອນສື່ສານອື່ນໆ ເຖິງແມ່ນວ່າຈະມີສິ່ງລໍ້ໃຈລູກຫລາຍພຽງໃດແຕ່ກໍສາມາດສົ່ງເສີມໃຫ້ລູກມີນິໄສຮັກການອ່ານໄດ້
ມີຫລາຍວິທີທີ່ສາມາດໃຊ້ປູກຝັງນິໄສຮັກການອ່ານຫນັງສືໃຫ້ລູກໄດ້ໃນບົດຄວາມນີ້ເຮົາມີ 10 ເຄັດລັບມາບອກກັນເພື່ອໃຫ້ເລີ່ມຕົ້ນເພື່ອແກ້ບັນຫາລູກບໍ່ມັກອ່ານຫນັງສືໄດ້ຢ່າງຖືກຕ້ອງ:
1.ໃຫ້ລູກໄດ້ໃຊ້ເວລາຢູ່ກັບຫນັງສືຕັ້ງແຕ່ລາວອາຍຸຍັງນ້ອຍຈາກນັ້ນກໍຄ່ອຍໆເລີ່ມປູກຝັງການອ່ານໃຫ້ກັບລູກໂດຍທີ່ບໍ່ມີສິ່ງລົບກວນອື່ນເຊັ່ນໂທລະພາບ,ໂທລະສັບມືຖື,ຄອມພິວເຕີ,ໃຫ້ລູກໄດ້ເລືອກຈັບຫນັງສືຂຶ້ນມາອ່ານຈາກນັ້ນພວກເຂົາຈະສ້າງນິໄສຮັກການອ່ານຂຶ້ນມາເອງ
2.ເຮັດເປັນຕົວຢ່າງໃຫ້ລູກເຫັນຖ້າເຈົ້າເອງກໍມີນິໄສຮັກການອ່ານຫລືເຈົ້າອ່ານຫນັງສືທຸກເທື່ອທີ່ເຈົ້າມີເວລາແລະມີໂອກາດລູກນ້ອຍຂອງເຈົ້າກໍຈະຮຽນແບບນິໄສຮັກການອ່ານຂອງເຈົ້າ
3.ຫາຫນັງສືແນວທີ່ລູກມັກມາໃຫ້ຫລາຍເທົ່າທີ່ຈະເຮັດໄດ້ເພາະການໄດ້ອ່ານຫນັງສືແນວທີ່ຕົນມັກຈະຊ່ວຍກໍາເນີດນິໄສຮັກການອ່ານໄດ້
4.ສອນໃຫ້ລູກອ່ານສິ່ງອື່ນໆນໍາບໍ່ສະເພາະໃນຫນັງສືເຊັ່ນ:ສອນໃຫ້ພວກເຂົາອ່ານຂໍ້ຄວາມຂ້າງກ່ອງຫລືທາໂຄດນາເປັນຕົ້ນ
5.ເຮັດໃຫ້ການອ່ານເປັນເລື່ອງມ່ວນຊື່ນພໍ່ແມ່ສ່ວນໃຫຍ່ຈະອ່ານຫນັງສືໃຫ້ລູກຟັງຕອນທີ່ລູກຍັງນ້ອຍຢູ່ແຕ່ພໍລູກໃຫຍ່ຂຶ້ນມາພວກເຂົາກໍອ່ານໜ້ອຍລົງມີງານວິໄຈພົບວ່າເດັກນ້ອຍທີ່ພໍ່ແມ່ອ່ານຫນັງສືໃຫ້ຟັງຕັ້ງແຕ່ຍັງນ້ອຍເມື່ອພວກເຂົາໃຫຍ່ຂຶ້ນແລະພໍ່ແມ່ເຊົາອ່ານຫນັງສືໃຫ້ຟັງພວກເຂົາຈະຄິດຮອດເວລາທີ່ພໍ່ຫລືແມ່ອ່ານຫນັງສືໃຫ້ຟັງດັ່ງນັ້ນເຖິງແມ່ນລູກເຈົ້າຈະໃຫຍ່ແລ້ວເຈົ້າກໍສາມາດອ່ານຫນັງສືໃຫ້ລູກຟັງໄດ້ໂດຍອາດຈະສະຫລັບໃຫ້ແຕ່ລະຄົນໃນຄອບຄົວເປັນຄົນອ່ານໃຫ້ສະມາຊິກຄົນອື່ນໆຟັງ
6.ໃຫ້ຫນັງສືເປັນຂອງຂວັນກັບລູກການທີ່ພໍ່ແມ່ໃຫ້ຫນັງສືກັບລູກຈະເປັນສິ່ງທີ່ໜ້າຕື່ນເຕັ້ນຫລາຍສຳລັບພວກເຂົາໂດຍສະເພາະຫນັງສືທີ່ພວກເຂົາຢາກໄດ້ການເຮັດເຊັ່ນນີ້ຈະຊ່ວຍສ້າງນິໄສຮັກການອ່ານໃຫ້ລູກໄດ້ແລະຈະເຮັດໃຫ້ທັງເຈົ້າແລະລູກມີຄວາມສຸກທີ່ເຫັນພວກເຂົາໄດ້ໄປນັ່ງໃນບ່ອນມັກເພື່ອອ່ານຫນັງສືທີ່ພວກເຂົາມັກ
7.ພະຍາຍາມສົ່ງເສີມໃຫ້ລູກຮັກການອ່ານໃຫ້ຫລາຍຮ່ວມໂອ້ລົມກ່ຽວກັບຫນັງສືທີ່ພວກເຂົາຫາກໍ່ອ່ານໄປການເຮັດແບບນີ້ຈະຊ່ວຍສ້າງນິໄສຮັກການອ່ານໄດ້ການໄດ້ໂອ້ລົມກັບລູກກ່ຽວກັບຫນັງສືທີ່ພວກເຂົາອ່ານແບບເປັນກັນເອງສະແດງເຖິງຄວາມເອົາໃຈໃສ່ແລະຄວາມສົນໃຈທີ່ເຈົ້າມີຕໍ່ຫນັງສືຂອງພວກເຂົານໍາອີກ
8.ຖ້າລອງວິທີອື່ນໆທີ່ກ່າວມາຂ້າງຕົ້ນແລ້ວລູກຍັງບໍ່ມັກອ່ານໜັງສືການໃຊ້ສິ່ງລໍ້ໃຈລູກໃຫ້ອ່ານຫນັງສືກໍ່ບໍ່ຜິດພໍ່ແມ່ບາງຄົນໃຊ້ວິທີນີ້ເພື່ອຈູງໃຈໃຫ້ລູກອ່ານຫນັງສືແລະພວກເຂົາກໍຮັກການອ່ານໃນທີ່ສຸດແລະບໍ່ຮຽກຮ້ອງສິ່ງຕອບແທນນໍາອີກ
9.ການມີສິ່ງກະຕຸ້ນເປັນອີກວິທີທີ່ໃຊ້ໄດ້ຜົນບໍ່ວ່າເດັກນ້ອຍຫລືຜູ້ໃຫຍ່ກໍຕ້ອງການການຍອມຮັບໃນຄວາມພະຍາຍາມອ່ານຫນັງສືຂອງພວກເຂົາທັງນັ້ນລອງໃຫ້ດາວຫລືຫຍັງກໍໄດ້ທີ່ເຈົ້າຄິດວ່າຈະເຮັດໃຫ້ລູກຮູ້ສຶກພາກພູມໃຈທີ່ໄດ້ລາງວັນຊຶ່ງແນວຄິດນີ້ເປັນແນວຄິດທີ່ດີພໍສົມຄວນ
10.ພາລູກໄປຫ້ອງສະມຸດຫລືຮ້ານຂາຍໜັງສືໄປໃນທີ່ທີ່ມີຫນັງສືຈຳນວນຫລາຍເພື່ອໃຫ້ລູກໄດ້ມ່ວນຊື່ນກັບການສຳຫລວດຫນັງສືຕ່າງໆຫລວງຫລາຍ