ໂຄສົກກຸ່ມລັດອິດສະລາມ ປະກາດຮັບເອົາກຸ່ມກໍ່ການຮ້າຍ ໂບໂກຮາຣາມ ຈາກອາຟຣິກາຕາເວັນຕົກ ເຂົ້າຮ່ວມເປັນພັນທະມິດ.
ສຳນັກຂ່າວຕ່າງປະເທດ ລາຍງານໃນວັນທີ 13 ມີນາຜ່ານມານີ້ວ່າ ໂຄສົກກອງກຳລັງລັດອິດສະລາມ ໄດ້ອອກມາປະກາດວ່າ ກຸ່ມລັດອິດສະລາມ ໄດ້ຮັບຮອງເອົາກອງກຳລັງໂບໂກຮາຣາມຈາກອາຟຣິກາຕາເວັນຕົກເຂົ້າເປັນພັນທະມິດ ໂດຍການປະກາດດັ່ງກ່າວ ຖືກບັນທຶກສຽງເຜີຍແຜ່ທາງສື່ອອນລາຍ ໂດຍການເຂົ້າຮ່ວມເປັນພັນທະມິດກັນລະຫວ່າງ 2 ກຸ່ມດັ່ງກ່າວ ໄດ້ເປັນການຂະຫຍາຍອິດທິພົນຂອງກຸ່ມລັດອິດສະລາມ ໄປຍັງພາກພື້ນອາຟຣິກາຕາເວັນຕົກແລ້ວ.
ທັງນີ້, ກຸ່ມໂບໂກຮາຣາມ ເປັນກຸ່ມກໍ່ການຮ້າຍຫົວຮຸນແຮງ ທີ່ກໍ່ເຫດໃນປະເທດໄນຈີເຣຍ ແລະ ຂະຫຍາຍໄປຍັງຊາຍແດນປະເທດເພື່ອນບ້ານ ເຊັ່ນ: ຄາແມຣູນ ແລະ ຊາດ ອີກດ້ວຍ ໂດຍໃນປີທີ່ຜ່ານມາກຸ່ມໂບໂກຮາຣາມ ໄດ້ສັງຫານປະຊາຊົນໄປແລ້ວກ່ວາໝື່ນຄົນ ແລະ ກໍ່ເຫດລັກພາຕົວເດັກນັກຮຽນຍິງອີກກ່ວາ 200 ຄົນ.