ຫຼວງພະບາງເມືອງເຈົ້າສະເໜ ປາຍທາງແຫ່ງການທ່ອງທ່ຽວຍາມໃດກໍຍັງເປັນທີ່ນິຍົມຂອງຜູ້ຄົນຈາກ ທຸກມູມໂລກ ຍ້ອນຄວາມເປັນເອກະລັກທີ່ບໍ່ມີໃຜຄືໃນດ້ານການທ່ອງທ່ຽວ ວັດທະນະທຳ ແລະ ທຳມະຊາດຕິດພັນກັບວິຖີຊີວິດຂອງປະຊາຊົນອັນສາມາດ ເຊີນຊວນເຫຼົ່ານັກເດີນທາງເຂົ້າມາພັກຜ່ອນໃຊ້ຈ່າຍໃນແຂວງນີ້ສູງ ເຖິງພັນກວ່າຕື້ກີບ ຫຼື 100 ລ້ານກວ່າໂດລາສະຫະລັດ ໃນໄລຍະເວລາພຽງ 3 ເດືອນຂອງງວດທຳອິດສົກປີນີ້.
ຈາກການສະຫຼຸບສະຖິຕິວຽກງານການທ່ອງທ່ຽວຂອງພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງໃຫ້ຮູ້ວ່າ: ໃນໄລຍະ 3 ເດືອນຕົ້ນ ປີ 2014-2015 ນີ້ ມີນັກທ່ອງທ່ຽວເຂົ້າມາທ່ຽວຊົມຫຼວງພະບາງມີທັງຫມົດ 132.667 ຄົນ, ໃນນັ້ນມີນັກທ່ອງທ່ຽວສາກົນ 98.287 ຄົນ, ແຂກພາຍໃນມີ 34.380 ຄົນ, ນັກທ່ອງທ່ຽວສ່ວນໃຫຍ່ແມ່ນມາຈາກທະວີບອາຊີ ແລະ ປາຊີຟິກມີ 40.430 ຄົນ, ຖັດມາແມ່ນທະວີບເອີຣົບມີ 37.127 ຄົນ, ອາເມຣິກາມີ 12.945 ຄົນ ແລະ ທະວີບອາຟຣິກາມີ 7.785 ຄົນ, ສ່ວນນັກທ່ອງທ່ຽວຈາກຊາຍແດນອ້ອມຂ້າງອັນດັບໜຶ່ງຍັງແມ່ນໄທ ມີ 14.299 ຄົນ, ຕາມມາດ້ວຍຈີນ 11.472 ຄົນ, ຫວຽດນາມ 1.190 ຄົນ, ກຳປູເຈຍ ມີ 153 ຄົນ ແລະ ມຽນມາມີ 96 ຄົນ.
ການເຂົ້າມາທ່ອງທ່ຽວຂອງແຂກຄົນຈຳນວນຫຼວງຫຼາຍເຫຼົ່ານັ້ນ ສ່ວນ ໃຫຍ່ແມ່ນໄດ້ແວ່ພັກແຮມຢູ່ແຂວງເປັນ ເວລາຫຼາຍວັນຈິ່ງເປັນຜົນໃຫ້ໄຕມາດທຳ ອິດປີນີ້ມີລາຍຮັບຂອງແຂວງຫຼວງພະບາງທີ່ໄດ້ຈາກການທ່ອງທ່ຽວສູ ງເຖິງ 146 ລ້ານກວ່າໂດລາສະຫະລັດ.
ດ້ານໜຶ່ງ ກໍຍ້ອນຫຼວງພະບາງມີຄວາມກຽມພ້ອມເລື່ອງພື້ນຖານໂຄງລ່າງສຳລັບຮອງ ຮັບນັກທ່ອງທ່ຽວທີ່ເພີ່ມຂຶ້ນໃນແຕ່ລະປີໄດ້ ຊຶ່ງຈຳນວນໂຮງແຮມ-ເຮືອນພັກ ແລະ ຮ້ານອາຫານໄດ້ມີການກໍ່ສ້າງເພີ່ມຂຶ້ນຢ່າງລຽນຕິດ ທັງມີຫຼາຍລະດັບໃຫ້ແຂກເລືອກໃຊ້ບໍລິການ.
ໂດຍມາຮອດປະຈຸບັນມີໂຮງແຮມ-ຣີສອດທັງຫມົດ 74 ແຫ່ງ, ທຽບໃສ່ປີ ຜ່ານມາເພີ່ມຂື້ນ 2 ແຫ່ງ, ມີຫ້ອງນອນ ທັງໝົດ 3.489 ຫ້ອງ, ເຮືອນພັກມີ 326 ຫຼັງ, ທຽບໃສ່ປີຜ່ານມາເພີ່ມຂຶ້ນ 1 ຫຼັງ, ມີຫ້ອງນອນທັງໝົດ 2.218 ຫ້ອງ ແລະ ມີຮ້ານອາຫານລາວ-ສາກົນ ລວມທັງໝົດ 286 ຮ້ານ, ເພີ່ມຂຶ້ນ 3 ຮ້ານ.
ແຫລ່ງຂ່າວ: ເສດຖະກິດ – ສັງຄົມ