ພິທີ ຮ່ວມລົງນາມສັນຍາຮ່ວມມືທາງດ້ານການຄ້າລະຫວ່າງ ສປປ ລາວ ແລະ ສສ ຫວຽດນາມ ສະບັບໃໝ່ເພື່ອປ່ຽນແທນສະບັບເກົ່າທີ່ສອງຝ່າຍໄດ້ຕົກລົງນຳກັນ ເມື່ອປີ 1998 ຜ່ານມາ ໄດ້ມີຂຶ້ນໃນວັນທີ 3 ມີນານີ້ ທີ່ນະຄອນ ຫລວງວຽງຈັນ ລະ ຫວ່າງທ່ານນາງ ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າລາວ ແລະ ທ່ານ ຫວູ່ຮຸຍຮວາງ ລັດຖະມົນຕີວ່າການກະຊວງອຸດສາຫະກຳ-ການຄ້າ ສສ ຫວຽດນາມ ໂດຍການເຂົ້າ ຮ່ວມເປັນສັກຂີພິຍານຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດການຜະລິດ ແລະ ຈໍລະຈອນ ແລະ ທ່ານເອກອັກຄະລັດຖະທູດ ສສ ຫວຽດນາມປະຈຳລາວ ເພື່ອເພີ່ມທະວີຮັດແໜ້ນການພົວພັນຮ່ວມມືທາງດ້ານເສດຖະກິດການຄ້າ ລະຫວ່າງສອງປະເທດ ລາວ-ຫວຽດນາມ ໃຫ້ກວ້າງ ຂວາງເລິກເຊິ່ງ ແລະ ມີປະສິດທິພາບສູງຂຶ້ນ.
ສັນຍາຮ່ວມມືດ້ານການຄ້າສະບັບໃໝ່ນີ້ ປະກອບມີ 6 ໝວດ ແລະ 16 ມາດຕາ, ກວມເອົາວຽກງານທີ່ຕິດພັນກັບຂະແໜງການຄ້າ, ສິນຄ້າ ແລະ ດ້ານບໍລິການ ເພື່ອອຳນວຍຄວາມສະດວກໃຫ້ການພົວພັນແລກປ່ຽນສິນຄ້າ ແລະ ການເຂົ້າສູ່ຕະຫລາດ, ໃນນັ້ນ ສອງຝ່າຍໄດ້ເປັນເອກະພາບຕົກລົງລຶບລ້າງພາສີຫລາຍກວ່າ 95% ຂອງຈຳ ນວນລາຍການສິນຄ້າທີ່ມີຕົ້ນກຳເນີດຢູ່ສອງປະເທດ ແລະ ໃຫ້ບູລິມະສິດພາສີນຳເຂົ້າສິນຄ້າທີ່ຫວຽດນາມໄດ້ອະນຸຍາດພິເສດໃຫ້ແກ່ລາວ ແລະ ສັນຍາສະບັບໃໝ່ນີ້ຈະມີຜົນບັງຄັບນັບແຕ່ສອງຝ່າຍໄດ້ເຮັດສຳເລັດບັນດາເອກະສານມີການພົວພັນເຊິ່ງກັນ ແລະ ກັນລະຫວ່າງສອງຝ່າຍ.
ລັດຖະມົນຕີການຄ້າສອງປະເທດ ໃຫ້ຮູ້ໃນພິທີວ່າ: ສັນຍາຮ່ວມມືດ້ານການຄ້າລະຫວ່າງສອງປະເທດສະບັບໃໝ່ນີ້ ເຊິ່ງບໍ່ພຽງແຕ່ເປັນພື້ນຖານດ້ານລະບຽບກົດໝາຍເທົ່ານັ້ນ ມັນຍັງຊ່ວຍເປີດກວ້າງກາລະໂອກາດເພີ່ມທະວີການຮ່ວມມືໃນຂົງເຂດການຄ້າ, ການບໍລິການ ແລະ ປະກອບສ່ວນສຳຄັນເຂົ້າໃນການກະຕຸກຊຸກຍູ້ການພົວພັນແບບພິເສດ ແລະ ການຮ່ວມມືຮອບ ດ້ານລະຫວ່າງສອງປະເທດ ລາວ-ຫວຽດນາມ ທີ່ມີມູນເຊື້ອມາແຕ່ດົນນານແລ້ວນັ້ນ ນັບມື້ຂະຫຍາຍໂຕ ແລະ ແຕກດອກອອກຜົນງອກງາມຍິ່ງໆຂຶ້ນ. ພິເສດແມ່ນຈະຊ່ວຍໃຫ້ການພົວພັນຮ່ວມມືການຄ້າ ລາວ-ຫວຽດນາມ ໝັ້ນຄົງ, ໂປ່ງໃສ ແລະ ແທດເໝາະກັບຫລັກການລວມຂອງສາກົນ ແລະ ທ່າແຮງບົ່ມຊ້ອນຂອງແຕ່ລະປະເທດ, ນຳຜົນປະໂຫຍດອັນແທ້ຈິງມາສູ່ປະຊາຊົນ ແລະ ບັນດາຫົວໜ່ວຍທຸລະກິດຂອງສອງປະເທດ ສາມາດເສີມຂະຫຍາຍທ່າແຮງບົ່ມຊ້ອນຂອງແຕ່ລະຝ່າຍແທດເໝາະກັບສະພາບສາກົນ ແລະ ການເຊື່ອມໂຍງເຂົ້າກັບຂົງເຂດ ແລະ ຂອງໂລກ.
ທ່ານ ຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ມີຄຳເຫັນໃນພິທີວ່າ: ສັນຍາຮ່ວມມືດ້ານການຄ້າລະຫວ່າງສອງປະເທດສະບັບໃໝ່ນີ້ ມັນມີຄວາມໝາຍສຳຄັນຍິ່ງ ເພື່ອແນໃສ່ຈັດຕັ້ງປະຕິບັດຜົນການຊີ້ນຳຂອງການນຳສອງປະເທດ ກໍຄືຜົນກອງປະຊຸມຂອງຄະນະກຳມະການຮ່ວມມືສອງຝ່າຍ ຄັ້ງທີ 37 ແລະ ພ້ອມນີ້ ກໍຮຽກຮ້ອງໄປຍັງບັນດາກະຊວງ ແລະ ຂະແໜງການກ່ຽວຂ້ອງຕ່າງໆ ຈົ່ງເອົາໃຈໃສ່ປະສານສົມທົບແໜ້ນກັບກະຊວງຜູ້ເປັນເຈົ້າການເພື່ອ ຈັດຕັ້ງປະຕິບັດສັນຍາຮ່ວມມືສະບັບນີ້ປະສົບຜົນສຳເລັດສູງຕາມຄວາມມຸ້ງ ຫວັງຂອງສອງຝ່າຍ.
ແຫລ່ງຂ່າວ: ລາວພັດທະນາ