ປະຈຸບັນການຄ້າໄມ້ເຖື່ອນແມ່ນຍັງມີຢູ່ຢ່າງແພ່ຫຼາຍ ຊຶ່ງຈຳເປັນຕ້ອງຊອກຊ່ອງທາງຢຸດບັນຫາດັ່ງກ່າວ ໂດຍ ເພີ່ມຄວາມເຂັ້ມງວດຂອດການປະສານງານກັບເຈົ້າໜ້າທີ່ໆກ່ຽວຂ້ອງໃນ ການປົກປັກຮັກສາປ່າໄມ້ທຳມະຊາດ ເພື່ອຫຼຸດອັດຕາຄ້າໄມ້ຜິດກົດໝາຍກ້າວໄປເຖິງການຢຸດຕິດ້ວຍການ ບັງຄັບໃຊ້ກົດໝາຍ.
ບັນຫາການຄ້າໄມ້ເຖື່ອນພວມເປັນໄພຄຸກຄາມຕໍ່ພື້ນທີ່ປ່າໄມ້ໃນລາວ ຊຶ່ງນັບມື້ບົກແຫ້ງລົງ, ສະຫະພາບເອີຣົບ ຫຼື ອີຢູ ຈິ່ງຮ່ວມມືກັບລັດຖະບານເພື່ອຫາທາງແກ້ໄຂທີ່ຈິງຈັງ ແລະ ຖືກທິດ.
ທ່ານ ມີແຊນ ໂກແຟງ ອຸປະທູດສຳນັກງານຜູ້ຕາງໜ້າສະຫະພາບເອີຣົບປະຈຳ ສປປ ລາວ ໄດ້ກ່າວໃນກອງປະຊຸມທົບທວນກົດໝາຍວ່າດ້ວຍການຄຸ້ມ ຄອງ ແລະ ການຄ້າໄມ້ວ່າ: ຂໍ້ຕົກລົງການເປັນຄູ່ຮ່ວມສັນຍາການຄ້າແບບສະໝັກໃຈ (VPA) ແມ່ນມາດຕະການສຳລັບຂອດສະໜອງ ເພື່ອຊ່ວຍເຫຼືອປະເທດຕ່າງໆເປັນຕົ້ນ ສປປ ລາວ ໃນການແກ້ໄຂສິ່ງທ້າທາຍຂອງຂະແໜງປ່າໄມ້, ແຜນງານສັນຍາການຄ້າແບບສະໝັກໃຈ ໄດ້ພະຍາຍາມຊ່ວຍເຫຼືອແກ້ໄຂສິ່ງທ້າທາຍຕ່າງໆທີ່ທົ່ວຂະແໜງການ ພວມປະເຊີນ ບໍ່ສະເພາະແຕ່ພາກສ່ວນທີ່ກ່ຽວຂ້ອງກັບການສົ່ງອອກໄມ້ໄປຍັງ ຕະຫຼາດເອີຣົບ.
ກົດໝາຍວ່າດ້ວຍການຄ້າໄມ້ຂອງອີຢູ ແມ່ນໜຶ່ງໃນບັນດາເຄື່ອງມືຂອງແຜນປະຕິບັດງານພາຍໃຕ້ຂອບແຜນງານ ການຈັດຕັ້ງປະຕິບັດກົດໝາຍ, ການຄຸ້ມຄອງ ແລະ ການຄ້າໄມ້ ( FLEGT ) ຊຶ່ງມີເປົ້າໝາຍທີ່ຈະຢຸດເຊົາການຄ້າໄມ້ ເຖື່ອນ, ອີຢູ ໃນນາມທີ່ເປັນຜູ້ຊົມໃຊ້ຜະ ລິດຕະພັນໄມ້ ແລະ ເລີ່ມນຳໃຊ້ກົດໝາຍວ່າດ້ວຍການຄ້າ ໄມ້ຂອງອີຢູໃນເດືອນມີນາ 2013, ກົດໝາຍດັ່ງກ່າວນີ້ ໄດ້ຫ້າມການນຳເອົາໄມ້ ແລະ ຜະລິດຕະພັນໄມ້ທີ່ມີແຫຼ່ງທີ່ມາຜິດກົດໝາຍເຂົ້າໄປຂາຍໃນຕະຫຼາດ ເອີຣົບ, ສຳລັບຕະຫຼາດເອີຣົບຜະລິດຕະພັນເຟີນິເຈີໄມ້ເປັນໜຶ່ງໃນບັນດາ ຕະຫຼາດທີ່ໃຫຍ່ສຸດໃນໂລກ ມີມູນຄ່າເຖິງ 23 ຕື້ເອີໂຣຕໍ່ປີ ມີປະມານ 15-20% ແມ່ນມາຈາກການນຳເຂົ້າ.
ໂດຍພາຍໃຕ້ແຜນງານ FLEGT ອີຢູຍັງໄດ້ເລີ່ມນຳໃຊ້ລະບົບຂໍ້ຕົກລົງການເປັນຄູ່ຮ່ວມທາງການ ຄ້າແບບ ສະໝັກໃຈ ເພື່ອຮັບປະກັນວ່າມີສະເພາະໄມ້ ແລະ ຜະລິດຕະພັນໄມ້ທີ່ມີແຫຼ່ງທີ່ມາຖືກຕ້ອງຕາມກົດໝາຍເທົ່ານັ້ນ ທີ່ສົ່ງໄປຂາຍໃນຕະຫຼາດເອີຣົບຈາກບັນດາປະເທດທີ່ເຊັນຂໍ້ຕົກລົງ ເຂົ້າຮ່ວມໃນແຜນງານນີ້ ແລະ ໄດ້ເລີ່ມການເຈລະຈາຂໍ້ຕົກລົງການເປັນຄູ່ຮ່ວມທາງການຄ້າແບບ ສະໝັກໃຈສອງຝ່າຍກັບບັນດາປະເທດທີ່ສົ່ງອອກໄມ້ ແລະ ຜະລິດຕະພັນໄມ້ຈາກທົ່ວໂລກ, ສ່ວນໃນ ສປປ ລາວ ລັດຖະບານເຢຍລະມັນກໍໄດ້ໃຫ້ການຊ່ວຍເຫຼືອລາວ ມູນຄ່າ 5,8 ລ້ານເອີໂຣ ເພື່ອສະໜັບສະໜູນຂະບວນການຕ່າງໆພາຍໃຕ້ແຜນງານ FLEGT ແລະ ການເຈລະຈາຂໍ້ຕົກລົງ VPA ຜ່ານໂຄງການສະໜັບສະໜູນແຜນງານ FLEGT.
ພ້ອມດຽວກັນນີ້ ຫາກວ່າໄດ້ຕົກລົງ ກັນເປັນທີ່ຮຽບຮ້ອຍແລ້ວຂໍ້ຕົກລົງ VPA ຈະໄດ້ບັນຈຸເອົາບັນດາຄວາມມຸ່ງຫວັງ, ການຈັດຕັ້ງປະຕິບັດຕົວຈິງຂອງທັງສອງຝ່າຍ ເພື່ອຢຸດການຄ້າໄມ້ທີ່ຜິດກົດໝາຍ ໂດຍສະເພາະການສ້າງຂອບເພື່ອອອກໃບອະນຸຍາດເປັນການຢັ້ງຢືນຄວາມ ຖືກຕ້ອງທາງກົດໝາຍຂອງໄມ້ ແລະ ຜະລິດຕະພັນໄມ້ທີ່ສົ່ງອອກໄປຕະຫຼາດອີຢູ, ຂໍ້ຕົກລົງນີ້ ຊຶ່ງສ້າງຂຶ້ນບົນພື້ນຖານຮູບແບບການມີສ່ວນຮ່ວມຂອງທຸກພາກສ່ວນບໍ່ ວ່າຈະເປັນອົງການຈັດຕັ້ງທາງສັງຄົມ ແລະ ພາກເອກະຊົນ ນອກນີ້ ຍັງເປັນການສົ່ງເສີມການບັງຄັບໃຊ້ກົດໝາຍປ່າໄມ້ໃຫ້ໄດ້ດີຂຶ້ນ ກວ່າເດີມ, ເປັນການອຳນວຍຄວາມສະດວກໃນການເຂົ້າເຖິງຕະຫຼາດເອີຣົບໃຫ້ໄດ້ງ່າຍ ຂຶ້ນ ແລະ ບາງທີກໍອາດຈະລວມເຖິງຕະຫຼາດອື່ນໆທີ່ຮຽກຮ້ອງໃຫ້ມີຄວາມຖືກຕ້ອງ ທາງກົດໝາຍໃນແຫຼ່ງທີ່ມາຂອງໄມ້.
ເພື່ອແກ້ໄຂບັນຫາທັງໝົດເຫຼົ່ານັ້ນມັນຮຽກຮ້ອງໃຫ້ມີການປະສານ ງານກັນຢ່າງເຂັ້ມງວດ ລະຫວ່າງບັນດາເຈົ້າ ໜ້າທີ່ກ່ຽວຂ້ອງຂອງປະເທດຕ່າງໆ ໃນການປົກປັກຮັກສາປ່າໄມ້ທຳມະຊາດຈາກການຂຸດຄົ້ນ, ຊຶ່ງລັດຖະບານລາວ ໄດ້ສະແດງເຈດຈຳນົງທີ່ຈະມີສ່ວນຮ່ວມໃນຂະບວນການເປັນຄູ່ຮ່ວມການ ຄ້າແບບສະໝັກໃຈກັບອີຢູ ໂດຍຈະນຳໄປສູ່ການເຈລະຈາຂໍ້ຕົກລົງເພື່ອທີ່ຈະສົ່ງອອກໄມ້ ແລະ ຜະລິດຕະພັນໄມ້ທີ່ຖືກຕ້ອງຕາມກົດໝາຍຈາກລາວໄປຍັງຕະ ຫຼາດອີຢູ.
ບາງປະເທດທີ່ເປັນປາຍທາງການສົ່ງອອກຜະລິດຕະພັນໄມ້ທີ່ສຳຄັນ ຂອງລາວເຊັ່ນ ຫວຽດນາມ, ໄທ ກໍໄດ້ເລີ່ມ ມີສ່ວນຮ່ວມໃນຂະບວນການເຊັ່ນດຽວກັນນີ້ກັບທາງອີຢູ, ສ່ວນປະເທດອິນໂດເນເຊຍແມ່ນໄດ້ໃຫ້ສັດຕະຍາບັນ ຂໍ້ຕົກ ລົງ VPA ກັບອີຢູແລ້ວ ພວມຈັດຕັ້ງປະຕິບັດຂໍ້ຕົກລົງດັ່ງກ່າວ, ສຳລັບບັນດາປະເທດອາຊຽນ ເປັນຕົ້ນກຳປູເຈຍ, ຟີລິບປິນ, ມຽນມາກໍມີຄວາມສົນໃຈໃນຂະບວນການເປັນຄູ່ຮ່ວມທາງການຄ້າແບບ ສະໝັກໃຈ.
ກອງປະຊຸມທົບທວນກົດໝາຍການຄຸ້ມຄອງ ແລະ ການຄ້າໄມ້ຂອງສະຫະພາບເອີຣົບ ໄດ້ຈັດຂຶ້ນໃນວັນທີ 4 ມີນານີ້ ທີ່ສຳນັກງານໃຫຍ່ຂອງອີຢູປະຈຳ ນະຄອນຫຼວງວຽງຈັນ ໂດຍມີບັນດາສື່ມວນຊົນເຂົ້າຮ່ວມ.
ແຫລ່ງຂ່າວ: ເສດຖະກິດ – ສັງຄົມ