ປັດຈຸບັນ ບັນຫາຢາເສບຕິດຢູ່ໃນສັງຄົມເຮົາ ໂດຍສະເພາະຢາບ້າ ໄດ້ແຜ່ລາມຢ່າງກວ້າງຂວາງ ແລະ ຂະຫຍາຍຕົວຢ່າງ
ວ່ອງໄວ ຈາກຕົວເມືອງໄປສູ່ຊົນນະບົດ ຈາກເຂດທົ່ງພຽງໄປສູ່ພູດອຍ ເຊິ່ງໃນເມື່ອກ່ອນຜູ້ທີ່ຕົກເປັນທາດຂອງຢາເສບຕິດ
ແມ່ນຊາວໜຸ່ມ ເຍົາວະຊົນ ນັກຮຽນ-ນັກສຶກສາເປັນສ່ວນໃຫຍ່ ແຕ່ໃນປັດຈຸບັນໄດ້ມີພໍ່ຄ້າຊາວຂາຍ ຊາວໄຮ່ນາ ກຳມະ
ກອນ ຊາວຜູ້ອອກແຮງງານຈຳນວນໜຶ່ງ ກໍໄດ້ຕົກເປັນທາດຂອງຢາບ້າເຊັ່ນດຽວກັນ.
ໃນໄລຍະຜ່ານມາ ການຈັດຕັ້ງທຸກຂັ້ນ ໄດ້ໃຫ້ການຮ່ວມມືໃນການແກ້ໄຂບັນຫາຢາເສບຕິດ (ຢາບ້າ) ມາຕະຫຼອດ ຍອມຮັບ
ວ່າແກ້ໄຂຍາກແກ້ແລ້ວແກ້ອີກ ແກ້ຊ້ຳໄປ-ຊ້ຳມາ ກາຍເປັນພະຍາດຊຳເຮື້ອທີ່ແກ້ບໍ່ຕົກ ເພາະວ່າພວກຄົນບໍ່ດີຈຳນວນໜຶ່ງ
ມີການເຄື່ອນໄຫວກະທຳຜິດດ້ວຍຫຼາຍຮູບການ ຫຼາຍວິທີ ແລະ ຫຼາຍເລ່ຫຼ່ຽມທີ່ແນບນຽນ ມີຄວາມຮຸນແຮງທ່ີເປັນອັນຕະ
ລາຍຕໍ່ສັງຄົມ.
ພວກເຂົານຳເອົາຢານະລົກນີ້ມາຈອບອອຍ ແລະ ເບື່ອເມົາໄວໜຸ່ມລູກຫຼານຜູ້ທີ່ຮູ້ເທົ່າບໍ່ເຖິງການ ຜ່ານມາໄດ້ເຮັດໃຫ້ນັກ
ຮຽນ-ນັກສຶກສາຈຳນວນໜຶ່ງເສຍທາດຂາດຄຸນ ເຮັດໃຫ້ເກີດສະພາບປະກົດການຫຍໍ້ທໍ້ຕ່າງໆໃນສັງຄົມ ເຊັ່ນ: ຂີ້ລັກ-ງັດ
ແງະ ປຸ້ນ-ຈີ້ ຊີງຊັບ ອາລະວາດຕີກັນ ຂີ່ລົດກວນເມືອງ ກາຍເປັນນັກເລງອັນຕະພານ ຫຼິ້ນກິນຟຸມເຟືອຍຕ່າງໆນາໆ ຢ່າງບໍ່
ຢ້ານຜິດຕໍ່ລະບຽບກົດໝາຍ.
ທ່ານ ພົຈວ ສີສະຫວາດ ແກ້ວມາລາວົງ ຫົວໜ້າກົມໃຫຍ່ຕຳຫຼວດ ກ່າວໃນກອງປະຊຸມແລກປ່ຽນຄວາມຄິດເຫັນຂະບວນ
ການຍຸຕິທຳ 4 ພາກສ່ວນ ໃນວັນທີ 24-25 ມັງກອນຜ່ານມາວ່າ: ປີ 2012 ໃນທົ່ວປະເທດມີຄະດີຢາເສບຕິດເກີດຂຶ້ນທັງໝົດ
1.303 ເລື່ອງ ກັກຜູ້ຕ້ອງຫາໄດ້ 2.219 ຄົນ ຍິງ 407 ຄົນ ຕ່າງປະເທດ 66 ຄົນ ຍິງ 4 ຄົນ.
ທຽບໃສ່ປີຜ່ານມາແມ່ນເພີ່ມຂຶ້ນ 376 ເລື່ອງ ເທົ່າກັບ 28,88% ສາມາດແກ້ໄຂໄດ້ສຳເລັດ 1.268 ລາຍ ຜູ້ຕ້ອງຫາ 2.078
ຄົນ ຍິງ 400 ຄົນ ຄົນຕ່າງປະເທດ 60 ຄົນ ຍິງ 8 ຄົນ ຂອງກາງທີ່ຢຶດໄດ້ມີເຮໂຣອິນ 54,84 ກິໂລກຼາມ ຢາບ້າ 12.000.906
ເມັດ ຢາຝິ່ນ 199,39 ກິໂລກຼາມ ກັນຊາແຫ້ງ 226.608 ກິໂລກຼາມ ຢຶດປືນໄດ້ 21 ກະບອກ ລູກປືນ 178 ລູກ ລະເບີດ 4
ໜ່ວຍ ລົດໃຫຍ່ 65 ຄັນ ລົດຈັກ 140 ຄັນ ໃນປັດຈຸບັນໄດ້ມີຜູ້ຕົກເປັນທາດຢາເສບຕິດຈຳນວນຫຼວງຫຼາຍ ທີ່ຄວນໄດ້ຮັບ
ການບຳບັດ.
ສະນັ້ນ ໝົດທຸກຄົນໃນສັງຄົມຕ້ອງເປັນເຈົ້າການຮ່ວມກັນ ເພື່ອຫາວິທີສະກັດກັ້ນບັນຫາດັ່ງກ່າວຊ່ວຍກັນໂດຍເລີ່ມຕົ້ນຈາກ
ຕົວເຮົາເອງ ສະຖາບັນຄອບຄົວຕ້ອງເຂັ້ມແຂງ ໂດຍສະເພາະພໍ່-ແມ່ຜູ້ປົກຄອງມີບົດບາດໃນການຮັບຜິດຊອບຊີວິດການ
ເປັນຢູ່ພາຍໃນຄອບຄົວ ຄວນສັ່ງສອນ ແນະນຳລູກຫຼານຂອງຕົນໃຫ້ຮູ້ເຖິງໄພອັນຕະລາຍຂອງຢາເສບຕິດ ຍົກເຫດຜົນຫົນ
ທາງທີ່ຈະກ້າວໄປເປັນທາດຂອງມັນ.
ການຈັດຕັ້ງຂັ້ນບ້ານ ຕ້ອງເດັດຂາດໃນການລົງກວດກາ ແລະ ຊຸກຍູ້ການແກ້ໄຂປະກົດການຫຍໍ້ທໍ້ໃນຂອບເຂດເມືອງຂອງ
ຕົນ ຖ້າບໍ່ດັ່ງນັ້ນ ລູກ-ຫຼານທີ່ເປັນອະນາຄົດຂອງຊາດ ອາດຕົກເປັນທາດຂອງຢາເສບຕິດກໍເປັນໄດ້.
ທີ່ມາ:http://www.vientianemai.net