ເທຍ໌ເລີຣ໌ ສວິຟຕ໌! ຄວ້າລາງວັນສິນລະປິນ ສ້າງຍອດຂາຍສູງສຸດໃນໂລກ
ເທຍ໌ເລີຣ໌ ສວິຟຕ໌ ນັກຮ້ອງສາວຊາວອາເມລິກັນ ຄວ້າລາງວັນສິນລະປິນ ທີ່ມີຍອດຂາຍສູງທີ່ສຸດໃນໂລກປະຈໍາປີ 2014 ເຖີງແມ່ນຄົນໃນວົງການເພງຈະອອກມາບອກວ່າ ເພງປະກອບພາບພະຍົນເລື່ອງ “ໂຟຣເຊັນ” ນ່າຈະມີຍອດຂາຍແຊງໜ້າສາວເທຍ໌ເລີຣ໌ ກໍ່ຕາມ
ສໍານັກຂ່າວຕ່າງປະເທດລາຍງານຈາກນະຄອນນິວຢອຣ໌ກ ປະເທດສະຫະລັດອາເມລິກາ ເມື່ອວັນທີ 24ກຸມພາ 2015 ວ່າ ສະຫະພັນ ຜູ້ຜະລິດສິ່ງບັນທຶກສຽງລະຫວ່າງປະເທດ (ໄອເອຟພີໄອ) ຖະແຫຼງວ່ານັກຮ້ອງສາວຊາວອາເມລິກັນ ເທຍ໌ເລີຣ໌ ສວິຟຕ໌ ເປັນສິນລະປິນທີ່ສ້າງຍອດຂາຍສູງສຸດໃນໂລກ ປະຈໍາປີ2014 ຫຼັງຈາກການຄໍານວນຍອດຂາຍທັງຈາກແຜນ ຊີດີ, ດາວໂຫຼດ ແລະ ການຟັງຜ່ານສະຕຣີມມິ່ງ
ທັ່ງນີ້ ເພັງຂອງ ສວິຟຕ໌ ໄດ້ຂຶ້ນອັນດັບຕິດຊາຣ໌ທເພງ ໃນສະຫະລັດເມື່ອປາຍປີທີ່ແລ້ວ ລວມທັງຍັງຕິດ 1ໃນ 5 ອັບດັບຊາຣ໌ທເພງ ໃນເຢຍລະມັນ ຢີ່ປຸ່ນ ແລະ ອັງກິດ ຊຶ່ງລ້ວນແລ້ວແຕ່ເປັນຕະຫຼາດເພງທີ່ໃຫຍ່ທີ່ສຸດຂອງໂລກ ຢ່າງໃດກໍ່ຕາມ ໄອເອຟພີໄອ ເຜີຍວ່າ ເພງປະກອບພາບພະຍົນເລື່ອງ “ໂຟຣເຊັນ” ທີ່ປະສົບຄວາມສໍາເລັດຢ່າງຖະຫຼົ່ມທະລາຍ ນ່າຈະສ້າງຍອດຂາຍໄດ້ຫຼາຍກວ່າ ເພງຂອງ ເທຍ໌ເລີຣ໌ ສວິຟຕ໌ຂະນະທີ່ ໄອເອຟພີໄອ ບໍ່ໄດ້ເປີດເຜີຍໂຕເລກຍອດຂາຍທີ່ແນ່ນອນອອກມາ ແຕ່ກໍ່ໄດ້ເຮັດການຈັດອັນດັບສິນລະປິນ ທີ່ມີຜົນງານຍອດນິຍົມອອກມາ
ສ່ວນອັນດັບ 2 ຕົກເປັນຂອງວົງບອຍແບນດ໌ຈາກເກາະອັງກິດ “ວັນໄດເຣ໊ດຊັ່ນ” ທີ່ເຄີຍຄອງຕໍາແໜ່ງອັນດັບ 1 ເມື່ອປີ2013 ຕາມຫຼັງມາດ້ວຍ “ເອ໊ດ ຊິແຣນ” ນັກຮ້ອງ ແລະ ນັກແຕ່ງເພງຊາວອັງກິດ ຢູ່ໃນອັນດັບທີ່ 3 ວົງໂຄລດ໌ເພລຍ໌ອັນດັບທີ່ 4 ວົງເອຊິດິຊິເປັນອັນດັບ 5 ແລະ ໄມເຄີລ ແຈ໊ກສັນ ຢູ່ໃນອັນດັບທີ່ 6 ເຖິງແມ່ນວ່າລາຊາເພງປ໊ອປຜູ້ນີ້ຈະຈາກໂລກໄປແລ້ວ ຕັ້ງແຕ່ປີ 2009 ກໍ່ຕາມ
ອັນລະບໍ້າ “1989” ຂອງ ສຕິຟຕ໌ ທີ່ອອກວາງຈໍາໜ່າຍເມື່ອປີທີ່ແລ້ວ ສ້າງຍອດຂາຍໄປໄດ້ 1.2 ລ້ານແຜ່ນໃນເວລາພຽງ 1 ອາທິດທໍາອິດ ທີ່ວາງຂາຍໃນສະຫະລັດ, ເຊິ່ງຫຼາຍທີ່ສຸດນັບຕັ້ງແຕ່ ເອ໊ມມິເນ໊ມ ແຮ໊ປເປີຣ໌ ໜຸ່ມຊາວອາເມລິກັນ ອັນລະບໍ້າ “ເດິ ເອ໊ມມິເນ໊ມ ໂຊວ໌” ເມື່ອປີ2002
ການທີ່ເພງ ຂອງ ເທຍ໌ເລີຣ໌ ສວິຟຕ໌ ຕິດອັນດັບ ມີຜົນມາຈາກການໃຫ້ບໍລິການຟັງເພງຜ່ານທາງລະບົບສະຕຣີມມິ່ງ ຊຶ່ງເມື່ອປີທີ່ແລ້ວສາວ ສວິຟຕ໌ ໄດ້ຖອດເພງຂອງລາວອອກຈາກ ສະປໍຕິຟາຍ ຜູ້ໃຫ້ບໍລິການຟັງເພງ ສະຕຣີມມິ່ງ ສັນຊາດສະວິເດນ ພ້ອມກັບອອກມາຮຽກຮ້ອງໃຫ້ບໍລິສັດເພີ່ມເງິນຄ່າຕອບແທນສິນລະປິນຫຼາຍກວ່າເກົ່າ
