ຈາກກະແສຂ່າວວ່າ ຕອນຄ່ຳຂອງວັນທີ 20 ກຸມພາ 2015 ທີ່ຜ່ານມາ ທ່ານ ຕົ້ງ ຫອມສົມບັດ ຫຼືທີ່ຮູ້ຈັກກັນໂດຍທົ່ວໄປວ່າ ເຮຍຕົ້ງ ຖືກຄົນຮ້າຍໄລ່ຖະຫຼົ່ມຍິງ ຄາລົດເກັງຂອງຕົນນັ້ນ ຫຼ້າສຸດມື້ນີ້ ວັນທີ 22 ກຸມພາ 2015 ຜູ້ໃຊ້ເຟສບຸກຜູ້ໜຶ່ງທີ່ຊື່ Tong Hsb ເຊິ່ງເຊື່ອວ່າເປັນເຟສບຸກຂອງທ່ານຕົ້ງເອງ ໄດ້ມີການໂພສຂໍ້ຄວາມທຳນອງຢືນຢັນວ່າ ຂ່າວທີ່ອອກໄປນັ້ນເປັນເລື່ອງຈິງ ແຕ່ກໍອະໂຫສິກຳໃຫ້ຄົນຮ້າຍ ເພື່ອເປັນການຍຸຕິບັນຫາ ເຊິ່ງຂໍ້ຄວາມດັ່ງກ່າວມີດັ່ງນີ:
“ສະບາຍດີ ທຸກໆທ່ານ ຂ້າພະເຈົ້າ ຕົ້ງຫອມສົມບັດ ໃນຂ່າວທໍລະໂຄງນັ້ນ ມັນມີຄວາມຈິງແທ້ເດີ ຜ່ານມາຂ້າພະເຈົ້າກໍເປັນນັກທຸລະກິດ ຫນຸ່ມນ້ອຍຜູ້ຫນຶ່ງ ເຊິ່ງເຮັດທຸລະກິດປະສົບຜົນສຳເລັດແດ່ ໃນໄລຍະຜ່ານມາ ແຕ່ການເຮັດທຸລະກິດຜ່ານມາມັນກໍ່ບໍ່ໄດ້ງ່າຍ ກວ່າຈະໄດ້ເງິນມາແຕ່ລະກີບ ແຕ່ຂ້າພະເຈົ້າຜ່ານມາເປັນຄົນທີ່ມີຄົນຮູ້ຈັກ ແລະກໍ່ມີຊື່ສຽຽຫລາຍສົມຄວນ ຍ້ອນນິດໄສຂ້າພະເຈົ້າເປັນຄົນມັກຊ່ວຍເຫລືອສັງຄົມ ມັກອອກສັງຄົມ ທຸລະກິດແຕ່ລະຢ່າງເຖິງວ່າມັນຈະຫຍຸ້ງຍາກແຕ່ກໍ່ຜ່ານມາໄດ້ ແລະກໍປະສົບຜົນສຳເດັດຂັ້ນຫນຶ່ງ ແຕ່ໄລຍະຜ່ານມາກໍ່ມີບຸກຄົນບໍ່ດີ ຫວັງຮ້າຍຕໍ່ຕົວຂ້າພະເຈົ້າມາຕະຫລອດສອງສາມປີຜ່ານມາ ໂດຍໃສ່ຂ່າວວ່າຂ້າພະເຈົ້າຄ້າຂາຍສິ່ງຜິດກົດຫມາຍ,ຖຶກຈັບກຸມ,ຢູ່ປະເທດນີ້ປະເທດນັ້ນ,ຖືກຂ້າຕາຍແລ້ວ, ຂ່າວຄາວຜ່ານມາກະຄ່ອຍໆງຽບຫາຍໄປ. ຈົນມາຮອດໃນວັນທີ່ 20/02/2015,ຈຶ່ງບໍ່ຄິດບໍ່ຝັນວ່າຈິດໃຈຂອງຄົນມັນໂຫດຮ້າຍເຖິງພຽຽນີ້. ແຕ່ຂ້າພະເຈົ້າກໍ່ຂໍອະໂຫສິກຳໃຫ້ຜູ້ທຳຮ້າຍຂ້າພະເຈົ້າ. ຂໍຂອບໄຈ.22/02/2015”
ທັງນີ້ ຂ່າວທີ່ຖືກເຜີຍແຜ່ອອກໄປກ່ອນໜ້ານັ້ນ ໄດ້ກ່າວວ່າລົດຂອງທ່ານຕົ້ງ ທີ່ມີທ່ານຕົ້ງແລະຄົນຂັບລົດນັ່ງຢູ່ໃນ ຖືກຍິງ 26 ນັດ ເຮັດໃຫ້ລູກປືນຖືກບ່າຄົນຂັບລົດ 4 ລູກ ສ່ວນທ່ານຕົ້ງແມ່ນບໍ່ໄດ້ຮັບບາດເຈັບ ແລະບໍ່ມີໃຜເສຍຊີວິດ.