ກຸ່ມລັດອິດສະລາມ ສັງຫານແລ້ວນັກບິນຈໍແດນ ດ້ວຍວິທີມະຫາໂຫດ ຈັບໃສ່ກົງເຫລັກຈູດໄຟເຜົາທັງເປັນ ຫລັງເຈລະຈາປ່ຽນຕົວປະກັນຫລົ້ມ.
ສຳນັກຂ່າວຕ່າງປະເທດ ລາຍງານໃນວັນທີ 4 ກຸມພານີ້ວ່າ ກອງກຳລັງລັດອິດສະລາມ ຫລື IS ໄດ້ເຜີຍແຜ່ຄລິບວີດີໂອ ການສັງຫານຕົວປະກັນລາຍລ່າສຸດ ທ່ານ ໂມອັດ ອັນ-ຄັດຊັດເບ ນັກບິນຈໍແດນ ດ້ວຍການເຜົາທັງເປັນ ເຊິ່ງວີດີໂອດັ່ງກ່າວ ແມ່ນເປັນພາບຂອງຜູ້ເຄາະຮ້າຍຖືກຂັງຢູ່ໃນກົງເຫລັກ ກ່ອນທີ່ຈະຖືກໄຟເຜົາທັງເປັນ ເຮັດໃຫ້ແປວໄຟລຸກຖ້ວມທົ່ວຮ່າງກາຍ ເຊິ່ງການປະຫານຊີວິດຕົວປະກັນລາຍນີ້ ແມ່ນຖືເປັນວິທີການທີ່ແຕກຕ່າງຈາກຕົວປະກັນລາຍອື່ນໆຜ່ານມາ ທີ່ຖືກກຸ່ມດັ່ງກ່າວສັງຫານດ້ວຍການຕັດຄໍ.
ການສັງຫານໂຫດດັ່ງກ່າວນີ້ ມີຂຶ້ນຫລັງທາງການຈໍແດນໄດ້ຮັບຂໍ້ສະເໜີຈາກກຸ່ມ IS ໃນການແລກປ່ຽນຕົວປະກັນລາຍດັ່ງກ່າວ ກັບນັກໂທດຍິງ ຊາຈິດາ ອັນ-ຣິຊາວີ ມືລະເບີດຍິງຂອງກຸ່ມເຄືອຂ່າຍລັດອິດສະລາມ ທີ່ຖືກຈໍແດນຈັບກຸມໄວ້ ໂດຍມີການຂີດເສັ້ນຕາຍພາຍໃນຕອນແລງຂອງວັນທີ 29 ມັງກອນຜ່ານມາ ແຕ່ການເຈລະຈາດັ່ງກ່າວໄດ້ຫລົ້ມລົງ ເມື່ອທາງຈໍແດນໄດ້ຂໍພິສູດຈາກກຸ່ມ IS ກ່ອນວ່າ ທ່ານ ໂມອັດ ອັນ-ຄັດຊັດເບ ຍັງຄົງມີຊີວິດຢູ່ແທ້ຈິງ ຫລື ບໍ່ ເຊທີ່ສຸດກໍນຳມາເຊິ່ງການສັງຫານໂຫດ ສະເທືອນຂັວນຄົນທັງໂລກອີກຄັ້ງໃນເທື່ອນີ້.
