ມົງໂກລີ ພົບຮ່າງລາມະຊາວທິເບດ ຮ່າງກາຍບໍ່ເໜົ່າເປື່ອຍ ຫລັງເສຍຊີວິດມາແລ້ວກ່ວາ 200 ປີ.
ສຳນັກຂ່າວຕ່າງປະເທດ ລາຍງານໃນວັນທີ 30 ມັງກອນຜ່ານມານີ້ວ່າ ສື່ຂອງມົງໂກລີ ໄດ້ເຜີຍແຜ່ພາບຮ່າງກາຍຂອງລາມະອົງໜຶ່ງ ເຊິ່ງຖືກຄົ້ນພົບໃນແຂວງ Songinokhairkhan ຂອງປະເທດມົງໂກລີ ໃນມື້ວັນທີ 27 ມັງກອນຜ່ານມາ ໂດຍໄດ້ສົ່ງຮ່າງດັ່ງກ່າວໄປໃຫ້ຜູ້ຊ່ຽວຊານກວດພິສູດ ທີ່ສູນນິຕິວິທະຍາ ນະຄອນຫລວງອູລານບາຕໍແລ້ວ ເພື່ອຊອກຫາສາເຫດວ່າ ເຫດໃດຮ່າງກາຍຂອງລາມະອົງດັ່ງກ່າວຈິ່ງບໍ່ເໜົ່າເປື່ອຍ.
ດ້ານຜູ້ຊ່ຽວຊານໄດ້ເຊື່ອວ່າ ລາມະອົງນີ້ແມ່ນໄດ້ມໍລະນະພາບມາແລ້ວກ່ວາ 200 ປີ ໂດຍອາດຈະມໍລະນະພາບໃນຂະນະທີ່ກຳລັງນັ່ງສະມາທິຢູ່ ເຊິ່ງຮ່າງກາຍໄດ້ຖືກຫຸ້ມຫໍ່ດ້ວຍໜັງສັດ ເຊິ່ງບໍ່ທັນເປັນທີ່ຮູ້ແຈ້ງວ່າເປັນໜັງຂອງສັດຊະນິດໃດ.
ນັກປະຫວັດສາດໄດ້ສັນນິຖານວ່າ ລາມະອົງນີ້ ອາດເປັນພະອາຈານຂອງ ລາມະ Dashi-Dorzho Itigilov ຜູ້ເຊິ່ງມີຊີວິດຢູ່ລະຫວ່າງປີ 1852-1927 ເຊິ່ງເປັນລາມະທິເບດ ທີ່ມໍລະນະພາບໄປແລ້ວໂດຍຮ່າງກາຍຍັງຄົງບໍ່ຖືກຍ່ອຍສະຫລາຍຈົນເໜົ່າເປື່ອຍ.
