ສະຫະລັດອາເມຣິກາ ພິຈາລະນາສົ່ງກອງກຳລັງ ພ້ອມກັບອາວຸດ ໄປໃຫ້ລັດຖະບານອູແກຣນ ສູ້ກັບຝ່າຍກອງກຳລັງນິຍົມຣັດເຊຍແລ້ວ.
ສຳນັກຂ່າວຕ່າງປະເທດ ລາຍງານໃນວັນທີ 3 ກຸມພານີ້ວ່າ ລັດຖະບານສະຫະລັດອາເມຣິກາ ກຳລັງພິຈາລະນາສົ່ງກອງກຳລັງ ພ້ອມທັງອາວຸດຍຸດໂທປະກອນ ໄປໃຫ້ກັບກອງທັບອູແກຣນ ເພື່ອທີ່ຈະໄປຕໍ່ສູ້ກັບກອງກຳລັງນິຍົມຣັດເຊຍ ໃນເຂດພື້ນທີ່ທາງພາກຕາເວັນອອກຂອງປະເທດອູແກຣນ ເຊິ່ງຄວາມພະຍາຍາມດັ່ງກ່າວນີ້ ຍິ່ງເປັນການເພີ່ມທະວີຄວາມຮຸນແຮງຂຶ້ນເລື້ອຍໆ ໂດຍອາວຸດທີ່ລັດຖະບານສະຫະລັດ ຈະສົ່ງໃຫ້ອູແກຣນໃນຄັ້ງນີ້ ຈະມີທັງອາວຸດຍິງຕໍ່ສູ້ອາກາດສະຍານ ແລະ ອາວຸດຕໍ່ສູ້ລົດຕັງ.
ທ່າທີຂອງສະຫະລັດອາເມຣິກາໃນເທື່ອນີ້ ແມ່ນໄດ້ຂັດແຍ້ງກັບຄຳເວົ້າຂອງ ທ່ານ ບາຣັກ ໂອບາມາ ປະທານາທິບໍດີສະຫະລັດອາເມຣິກາ ທີ່ໄດ້ເຄີຍບອກຜ່ານມາວ່າ ຄັດຄ້ານເລື່ອງການສະໜັບສະໜູນ ການຊ່ວຍເຫລືອທາງການທະຫານຕໍ່ລັດຖະບານອູແກຣນ ເນື່ອງຈາກຢ້ານຈະເປັນການຈູດຊະນວນໃຫ້ເກີດສົງຄາມໃນເອີຣົບ ທີ່ມີສະຫະລັດອາເມຣິກາ ແລະ ຣັດເຊຍເປັນຕົວແທນໃນອານາຄົດ.