ບໍລິສັດ ລັດສະກາຍໂທລະຄົມ (SKY TELECOM) ເປີດໂຕຢ່າງເປັນທາງການ ໃນວັນທີ 30 ມັງກອນ 2015 ທີ່ຜ່ານມາ ຢູ່ບ້ານຫັດສະດີ ເມືອງຈັນທະບູລີ ນະຄອນຫຼວງວຽງຈັນ ເຂົ້າຮ່ວມພາຍໃນງານມີທ່ານ ພົນໂທ ແສງນວນ ໄຊຍະລາດ ລັດຖະມົນຕີວ່າການກະຊວງປ້ອງກັນປະເທດ ທ່ານ ຫຽມ ພົມມະຈັນ ລັດຖະມົນຕີວ່າການ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ທ່ານ ຄຳຄິດ ໄຊສົງຄາມ ຜູ້ອຳນວຍການໃຫຍ່ບໍລິສັດ ລັດສະກາຍໂທລະຄົມ ພ້ອມດ້ວຍບັນດາພະນັກງານວິຊາການ ແລະ ແຂກຖືກເຊີນ.
ທ່ານ ຄຳຄິດ ໄຊສົງຄາມ ກ່າວວ່າ: ບໍລິສັດ ລັດສະກາຍໂທລະຄົມ ແມ່ນຫົວໜ່ວຍກົມກອງໜຶ່ງ ທີ່ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ທີ່ມີເປົ້າໝາຍເພື່ອສ້າງລະບົບພື້ນຖານໂຄງລ່າງ ທາງລະບົບຄົມມະນາຄົມ ແລະ ການສື່ສານ ໃຫ້ມີຄວາມເຂັ້ມແຂງ ມີຄວາມທົນທານ ມີຄວາມທັນສະໄໝ ແລະ ໄດ້ມາດຕະຖານສາກົນ ທັງນີ້ກໍ່ເພື່ອຮອງຮັບວຽກງານປົກປັກຮັກສາປະເທດຊາດ ໃຫ້ມີຄວາມສະຫງົບ ແລະ ໝັ້ນຄົງ ທັງເປັນການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວມີຄວາມສະດວກໃນການເຊື່ອມໂຍງກັບອະນຸພາກພື້ນ ແລະ ສາກົນ ເຮັດໃຫ້ປະເທດຫຼຸດພົ້ນອອກຈາກປະເທດດ້ອຍພັດທະນາ ໃນປີ 2020.
ບໍລິສັດ ລັດສະກາຍໂທລະຄົມ ໄດ້ສ້າງຕັ້ງໃນປີ 2011 ພາຍໃຕ້ການຊີ້ນຳຂອງຂັ້ນເທິງຢ່າງໃກ້ຊິດ ແລະ ການຮ່ວມມືຂອງບັນດາອົງການຈັດຕັ້ງທັງພາຍໃນ ແລະ ຕ່າງປະເທດ ຈຶ່ງເຮັດໃຫ້ມີການຂະຫຍາຍຕົວມາຮອດປັດຈຸບັນ ບໍລິສັດມີສຳນັກງານໃຫຍ່ທາງດ້ານການບໍລິການ 1 ແຫ່ງ ແລະ ສຳນັກງານທາງດ້ານເຕັກນິກ 1 ແຫ່ງ ມີ 117 ສູນບໍລິການ ລວມທັງນະຄອນຫຼວງວຽງຈັນ ແລະ 16 ແຂວງໃນທົ່ວປະເທດ ມີ 18 ໜ່ວຍງານເຝົ້າລະວັງໃນການຕິດຕັ້ງ-ສ້ອມແປງທາງສາຍໄຍແກ້ວຍຸດທະສາດ ແລະ ສຳຮອງ ມີພະນັກງານທັງໝົດ 505 ຄົນ ໃນນັ້ນຍັງໄດ້ກໍ່ສ້າງ-ຕິດຕັ້ງລະບົບສາຍໄຍແກ້ວລະບົບໃຕ້ດິນຜ່ານ ນະຄອນຫຼວງ ແລະ 16 ແຂວງໃນທົ່ວປະເທດ ເຊື່ອມຕໍ່ກັບ 5 ປະເທດໃກ້ຄຽງ ລວມມີ 11 ຈຸດເຊື່ອມຕໍ່ ສ້າງຕັ້ງລະບົບເຄື່ອຂ່າຍສູນກາງອິນເຕີເນັດຄວາມໄວສູງ IP DATA Network 6 ສະຖານີ BBSR ໄດ້ເຊື່ອມຕໍ່ອິນເຕີເນັດກັບຕ່າງປະເທດເຊັ່ນ: ປະເທດຈີນ ຫວຽດນາມ ແລະ ໄທ ສ້າງຕັ້ງລະບົບສູນກາງສົ່ງສັນຍານໂທລະພາບຄວາມໄວສູງ IPTV 24 ຊ້ອງສັນຍານ ກໍ່ສ້າງຕິດຕັ້ງລະບົບຮັບໃຊ້ການບໍລິການ ການຕະຫຼາດ ແລະ ການເງິນ Provisioning and Billing System ອີກດ້ວຍ.
ແຫລ່ງຂ່າວ: ວຽງຈັນໃໝ່