ກຸ່ມລັດອິດສະລາມເຜີຍແຜ່ຄລິບວິດີໂອລ່າສຸດ ໄດ້ສັງຫານ ທ້າວ ເຄັນຈິ ໂກໂຕະ ນັກຂ່າວອິດສະຫລະ ເຊິ່ງເປັນຕົວປະກັນຊາວຍີ່ປຸ່ນແລ້ວ ດ້ວຍການຕັດຄໍ.
ສຳນັກຂ່າວຕ່າງປະເທດ ລາຍງານໃນວັນທີ 1 ກຸມພາຜ່ານມານີ້ວ່າ ກຸ່ມລັດອິດສະລາມ ຫລື IS ໄດ້ເຜີຍແຜ່ຄລິບວິດີໂອອອກໃໝ່ ໂດຍຢືນຢັນການສັງຫານ ທ້າວ ເຄັນຈິ ໂກໂຕະ ນັກຂ່າວຊາວຍີ່ປຸ່ນດ້ວຍການຕັດຄໍ ຫລັງຈາກທີ່ໄດ້ສັງຫານ ທ້າວ ຮາຣຸນະ ຢູຄາວະ ຕົວປະກັນຊາວຍີ່ປຸ່ນອີກຄົນໜຶ່ງໄປກ່ອນແລ້ວ ດ້ວຍວິທີການດຽວກັນ.
ທັງນີ້ ກຸ່ມລັດອິດສະລາມ ໄດ້ຈັບກຸມຕົວ ທ້າວ ເຄັນຈິ ໂກໂຕະ ແລະ ທ້າວ ຮາຣຸນະ ຢູຄາວະ ເພື່ອຮຽກຄ່າໄຖ່ກັບລັດຖະບານຍີ່ປຸ່ນ ຈຳນວນ 200 ລ້ານໂດລາສະຫະລັດ ໂດຍກຸ່ມດັ່ງກ່າວໄດ້ອ້າງເຫດຜົນ ເພື່ອແກ້ແຄ້ນນະໂຍບາຍຂອງ ນາຍົກລັດຖະມົນຕີ ຊິນໂຊ ອາເບະ ຜູ້ນຳຍີ່ປຸ່ນ ທີ່ໄດ້ປະກາດເຂົ້າຮ່ວມກັບພັນທະມິດຕາເວັນຕົກ ຕໍ່ຕ້ານກຸ່ມລັດອິດສະລາມໃນທ້າຍປີທີ່ຜ່ານມາ ແລະ ໃນເມື່ອລັດຖະບານຍີ່ປຸ່ນບໍ່ສາມາດປະຕິບັດ ຕາມການຮຽກຮ້ອງດັ່ງກ່າວໄດ້ ຈິ່ງເຮັດໃຫ້ເກີດມີການສັງຫານທີ່ສະເທືອນຂັວນທັງຊາວຍີ່ປຸ່ນ ແລະ ທົ່ວທັງໂລກ.